ວັນອາທິດ, 26 ພຶດສະພາ 2019

ຟຟລ ສາຂາເຊກອງ ສະຫຼຸບວຽກງານການເຄື່ອນໄຫວດຳເນີນທຸລະກິດປະຈໍາປີ 2018

ຂ່າວ:ພຸດທະສອນ

       ລັດວິສາຫະກິດໄຟຟ້າລາວ ສາຂາແຂວງເຊກອງ ໄດ້ສະຫຼຸບຕີລາຄາຄືນ ຜົນງານການເຄຶ່ອນໄຫວ ດຳເນີນທຸລະກິດປະຈໍາປີ 2018 ແລະວາງທິດທາງແຜນການປີ 2019 ຂຶ້ນໃນຕອນເຊົ້າວັນທີ 5 ເມສາ ນີ້ ຢູ່ທີ່ຫ້ອງປະຊຸມຫ້ອງການດັ່ງກ່າວ ໂດຍການເປັນປະທານຂອງທ່ານ ເພັດສະໝອນ ຄອນປະສິດ ຫົວໜ້າພະແນກພະລັງງານ ແລະ ບໍ່ແຮ່ແຂວງເຊກອງ, ມີ ທ່ານ ວິໄຊ ໄຍຍາສານ ຫົວໜ້າລັດວິສາຫະກິດ ຟຟລ ສາຂາເຊກອງ ພ້ອມດ້ວຍພະນັກງານລັດ ກຳມະກອນລັດວິສາຫະກິດໄຟຟ້າແຂວງ ແລະ ເມືອງເຂົ້າຮ່ວມ.

      ທ່ານ ວິໄຊ ໄຍຍາສານ ໄດ້ລາຍງານໃຫ້ຮູ້ວ່າ: ການດຳເນີນທຸລະກິດໃນປີ 2018 ມີລາຍຮັບ 25,230 ຕື້ກີບ, ທຽບໃສ່ແຜນປະຕິບັດໄດ້ 79,04% ເພີ່ມຂຶ້ນຈາກປີ2017 ເທົ່າກັບ 9%, ລາຍຈ່າຍ 31,021 ຕື້ກີບ, ທຽບໃສ່ແຜນ ໄດ້84,69% ເພີ່ມຂຶ້ນຈາກປີ 2017 ເທົ່າ 6%, ຂາດທຶນ 5,790 ຕື້ກີບ, ທຽບໃສ່ແຜນ 123,01% ຫຼຸດລົງຈາກປີ 2017 ເທົ່າ 6%; ສາເຫດທີ່ລາຍຮັບ-ລາຍຈ່າຍປະຕິບັດບໍ່ໄດ້ຕາມແຜນຍ້ອນ ການຈໍາໜ່າຍພະລັງງານໄຟຟ້າໃຫ້ລູກຄ້າ ບໍ່ສາມາດປະຕິບັດໄດ້ຕາມແຜນທີ່ກຳນົດໄວ້ ໄດ້ພຽງ 79,48% (ທຽບໃສ່ມູນຄ່າ), ໃນນີ້ ປະເພດທີ່ຢູ່ອາໃສ 95,47%, ປະເພດທຸລະກິດທົ່ວໄປ 75,52%, ປະເພດອຸດສາຫະກຳ 63,67%; ການຊື້-ຂາຍພະລັງງານໄຟຟ້າ(ສົມທຽບໃສ່BS2000) ໃນນີ້ຊື້ພະລັງງານໄຟຟ້າ 19,211ຕື້ກີບ ທຽບໃສ່ແຜນປະຕິບັດໄດ້ 77,23%, ທຽບໃສ່ປີ 2017 ເພີ່ມຂຶ້ນ 12%, ຈໍາໜ່າຍພະລັງງານໄຟຟ້າ 22,986 ຕື້ກີບ ທຽບໃສ່ແຜນໄດ້ 79,48% ທຽບໃສ່ປີ 2017 ເພີ່ມຂຶ້ນ 12%, ພະລັງງານຕົກເຮ່ຍ ໄດ້ 1,842 ຕື້ກີບ ທຽບໃສ່ແຜນ ໄດ້ 101% ທຽບໃສ່ປີ 2017 ເພີ່ມຂຶ້ນ 18%; ການບໍລິການຕິດຕັ້ງໄຟຟ້າເຂົ້າເຮືອນໄດ້ 541 ຫຼັງ (ແຜນປີ 907 ຫຼັງ) ມູນຄ່າ 984,138 ລ້ານກີບ ປະຕິບັດໄດ້ 59,64%; ນອກນີ້ ການປະຕິບັດມອບພັນທະອາກອນໃຫ້ລັດໄດ້ທັງໝົດ 2,3 ຕື້ກວ່າກີບ ເທົ່າກັບ 80% ຂອງແຜນການປີ; ໃນນີ້ ອາກອນມູນຄ່າເພີ່ມ 2,2 ລ້ານກວ່າກີບ ແລິອາກອນລາຍໄດ້ 88 ລ້ານກວ່າກີບ, ສົມທຽບໃສ່ປີ 2017 ເພີ່ມຂຶ້ນ 7%.

         ຕໍ່ຜົນງານການຈັດຕັ້ງປະຕິບັດວຽກງານໃນ 1 ປີຜ່ານມາ ສາມາດຕີລາຄາຍ້ອງຍໍ ໃຫ້ແກ່ພະນັກງານ ກຳມະກອນ ຜູ້ດີເດັ່ນໃນການປະຕິບັດໜ້າທີ່ວຽກງານ, ການບໍລິການ ຕາມມາດຖານຂໍ້ແຂ່ງຂັນ ເຊິ່ງສາມາດຈັດປະເພດໄດ້ຄື: ປະເພດ I ມີ 41 ຄົນ, ຍິງ 6 ຄົນ, ປະເພດ II ມີ 13 ຄົນ, ຍິງ 4 ຄົນ, ປະເພດ III ມີ 3 ຄົນ; ນອກນີ້ ຍັງມີ ຍ້ອງຍໍປະເພດຕາມໜ້າວຽກ ທີ່ໄດ້ຮັບໃບຍ້ອງຍໍ ແລະ ຂອງຂວັນດີເດັ່ນ ແມ່ນສູນບໍລິການໄຟຟ້າເມືອງທ່າແຕງ ເຊິ່ງດີເດັ່ນໃນການເກັບກູ້ໜີ້ສິນ (ເປັນເມືອງປອດໜີ້), ຍ້ອງຍໍປະເພດລວມໝູ່, ພະແນກ ແລະ ສູນບໍລິການ ປະເພດ I ມີ 1 ພະແນກ ແລະ 2 ສູນບໍລິການຄື: ພະແນກຄຸ້ມຄອງໝໍນັບໄຟ, ສູນບໍລິການໄຟຟ້າເມືອງທ່າແຕງ ແລະ ເມືອງກະລຶມ, ປະເພດ II ມີ 2 ສູນບໍລິການຄື: ສູນບໍລິການໄຟຟ້າເມືອງລະມາມ ແລະ ເມືອງດາກຈຶງ.

   ທ່ານ ເພັດສະໝອນ ຄອນປະສິດ ໄດ້ຕີລາຄາສູງຕໍ່ຜົນງານທີ່ຍາດມາໄດ້ ແລະ ໄດ້ເນັ້ນໃຫ້ຄະນະນໍາ ຕ້ອງເອົາໃຈໃສ່ວຽກງານການເມືອງແນວຄິດເປັນກົກ, ມີແບບແຜນວິທີນໍາພາ, ວິທີເຮັດວຽກທີ່ດີກວ່າເກົ່າ, ຮັກສາມຄວາມສາມັກຄີພາຍໃນ-ພາຍນອກໃຫ້ແໜ້ນແຟ້ນ, ສືບຕໍ່ເອົາໃຈໃສ່ປະຕິບັດວຽກງານວິຊາສະເພາະຢ່າງຫ້າວຫັນ ເພື່ອໃຫ້ມີປະສິດທິຜົນ ແລະປະສິດທິພາບທີ່ສູງຂຶ້ນກວ່າເກົ່າ ໂດຍສະເພາະ ເອົາໃຈໃສ່ເຕົ້າໂຮມ ແນວຄວາມຄິດໃໝ່ໆ ໃນການບໍລິການ ຂອງແຕ່ລະສູນ ເພື່ອເຮັດໃຫ້ໜ້າທີ່ວຽກງານ ມີຄວາມໜັກແໜ້ນເຂັ້ມແຂງ ໃຫ້ຜູ້ຊົມໃຊ້ໃນທົ່ວແຂວງ ໄດ້ຊົມໃຊໄຟຟ້າຢ່າງທົ່ວເຖິງ.