ວັນອັງຄານ, 11 ທັນວາ 2018

ເຊກອງ ແລກປ່ຽນບົດຮຽນ ໃນການຕິດຕາມກວດກາ ການປະຕິບັດກົດໝາຍກ່ຽວກັບການດໍາເນີນຄະດີການຄ້າມະນຸດ

ພາບ-ຂ່າວ: ພຸດທະສອນ
     ໃນຕອນ ເຊົ້າວັນທີ 23 ເມສາ ນີ້ ອົງການໄອຍະການ ປະຊາຊົນສູງສຸດ (ອອປສ) ແລະ ອົງການໄອຍະການ ປະຊາຊົນ ແຂວງເຊກອງ ໄດ້ຈັດກອງປະຊຸມ ຖອດຖອນ ບົດຮຽນໃນການ ຕິດຕາມ ກວດກາ ການປະຕິບັດ ກົດໝາຍ ກ່ຽວກັບການດໍາເນີນຄະດີ ການຄ້າມະນຸດ ຂອງອົງການ ສືບສວນ-ສອບສວນ ຂຶ້ນຢູ່ທີ່ຫ້ອງປະຊຸມ ອົງການໄອຍະການ ແຂວງເຊກອງ ໂດຍການເປັນປະທານ ຂອງ    ທ່ານ ບຸນຍັງ ຈັນດາລະສານ ຮອງຫົວໜ້າ ອົງການໄອຍະການ ປະຊາຊົນສູງສຸດ, ມີ ທ່ານ ສົມນິດ ສີລິບຸນລ້ຽງ ຫົວໜ້າ ອົງການ ໄອຍະການ ປະຊາຊົນ ແຂວງເຊກອງ, ພ້ອມດ້ວຍ ຄະນະ ຕະຫຼອດ ຮອດວິຊາການ ທີ່ມາຈາກ ອອປສ, ອົງການ ໄອຍະການ ປະຊາຊົນແຂວງ ແລະ ເຂດ ເຂົ້່າຮ່ວມ ເຊິ່ງກອງປະຊຸມ ດັ່ງກ່າວ ຈະໄດ້ເນີນເປັນເວລາ 2 ວັນ ( 23-24/4/2018) ຈຶ່ງຈະສໍາເລັດ.
     ທ່ານ ນາງ ວິໄລສິນ ແດນຫັນສາ ຫົວໜ້າ ພະແນກຮ່ວມມື ກັບຕ່າງປະເທດ, ຮອງຫົວໜ້າ ຮັບຜິດຊອບວຽກງານ ການດໍາເນີນ ຄະດີການຄ້າມະນຸດ ອອປສ ໄດ້ບັນລະຍາຍ ໃຫ້ຮູ້ ບັນດາ ບົດຮຽນ ກ່ຽວກັບ ການຕິດຕາມ ກວດກາ ໃນການດໍາເນີນການ ສືບສວນ-ສອບສວນ ຄະດີການຄ້າມະນຸດ ເຊິ່ງປະກອບມີ: ຄວາມຮູ້ທົ່ວໄປ ກ່ຽວກັບ ວຽກງານ ການຕ້ານ ການຄ້າມະນຸດ, ການຕິດຕາມ ກວດກາ ໃນການປະຕິບັດ ກົດໝາຍ ແລະ ການດໍາເນີນ ຄະດີອາຍາ ຂອງອົງການ ສືບສວນ-ສອບສວນ ແລະ ບັນຫາ ທີ່ນໍາມາແລກປ່ຽນ ບົດຮຽນ ເຊິ່ງກັນ ແລະ ກັນແມ່ນ ບັນດາ ສົນທິສັນຍາ ທີ່ກ່ຽວຂ້ອງ ກັບວຽກງານ ການຕ້ານ ການຄ້າມະນຸດ, ສະພາບການຄ້າ ມະນຸດໃນ ສປປ ລາວ, ໄຈ້ແຍກນິຍາມ ການຄ້າມະນຸດ, ຄວາມແຕກຕ່າງຂອງການກະທຳຜິດ ໃນສະຖານການ ຄ້າມະນຸດ ແລະ ການກະທໍາຜິດ ອື່ນໆ.
     ນອກຈາກນີ້ ຜູ້ເຂົ້າຮ່ວມ ໄດ້ຮ່ວມກັນສຶກສາ ແລະ ປະກອບຄໍາຄິດ ຄໍາເຫັນ ແລກປ່ຽນ ບົດຮຽນເຊິ່ງກັນ ແລະ ກັນ ກ່ຽວກັບວຽກງານ ການດໍາເນີນ ຄະດີ ໂດຍສະເພາ ະຄະດີອາຍາ ເຊິ່ງເຫັນວ່າ ຍັງມີຫຼາຍບັນຫາ ທີ່ຍັງມີຄວາມຫຍຸ້ງຍາກ ແລະ ບໍ່ທັນເປັນເອກະພາບ ໃນການຈັດຕັ້ງ ປະຕິບັດ ເທົ່າທີ່ຄວນ, ເພື່ອນໍາເອົາ ບົດຮຽນ ທີ່ຖອດຖອນໄດ້ ໄປຈັດຕັ້ງ ປະຕິບັດ ໃຫ້ສອດຄ່ອງ ກັບວຽກງານ ຕົວຈິງໃນຕໍ່ໜ້າ.
      ໃນວາລະ ກອງປະຊຸມ ຍັງຈະໄດ້ ແນະນໍາ ວຽກງານ ການຕິດຕາມ ກວດກາ ໃນການດໍາເນີນ ຄະດີການຄ້າມະນຸດ, ແນະນໍາ ບາງວຽກງານ ກ່ຽວກັບການຕິດຕາມ ກວດກາ ໃນການປະຕິບັດ ກົດໝາຍ ແລະ ການດໍາເນີນ ຄະດີອາຍາ ຂອງອົງການ ສືບສວນ-ສອບສວນ; ນອກນີ້ ຍັງຈະໄດ້ ຮັບຟັງ ການໂອ້ລົມ-ຊີ້ນໍາ ຕໍ່ການປະຕິບັດ ໜ້າທີ່ ວຽກງານ ດັ່ງກ່າວ ຈາກ ປະທານກອງປະຊຸມຕື່ມອີກ.
ລະຫັດຮູບ: 472,469,460,450