ວັນອາທິດ, 19 ສິງຫາ 2018

ບໍລິສັດເພັດທິດາກໍ່ສ້າງ ມອບຊຸດກິລາໃຫ້ທີມນັກກິລາຊາວໜຸ່ມສະພາປະຊາຊົນ ແຂວງເຊກອງ


            ໃນຕອນເຊົ້າ ວັນທີ 5 ເມສາ 2018 ນີ້ ທີ່ຫ້ອງປະຊຸມ ສະພາປະຊາຊົນ ແຂວງເຊກອງ ໄດ້ມີພິທີມອບ-ຮັບ ຊຸດກິລາ ໃຫ້ແກ່ທີມ ນັກກິລາ ຊາວໜຸ່ມສະພາ ປະຊາຊົນ ແຂວງ ເຊກອງ ຈຳນວນ 30 ຊຸດ ລວມມູນຄ່າ 2 ລ້ານກວ່າກີບ ໃຫ້ກຽດ ກ່າວມອບ ໂດຍທ່ານ ນາງ ໂຢຕີ້ ຄິວລະວົງ ອໍານວຍການບໍລິສັດ ເພັດທິດາ ກໍ່ສ້າງ ກ່າວຮັບໂດຍ ທ່ານ ຖາວອນ ເສີຍສົມບັດ ເລຂາໜ່ວຍຊາວໜຸ່ມ ສະພາປະຊາຊົນແຂວງ ພ້ອມດ້ວຍຄະນະ ເຂົ້າຮ່ວມເປັນສັກຂີພິຍານໃນຄັ້ງນີ້.
            ໃນໂອກາດນີ້ ທ່ານ ຖາວອນ ເສີຍສົມບັດ ກໍໄດ້ສະແດງ ຄວາມຂອບອົກ ຂອບໃຈ ມາຍັງ ບໍລິສັດດັ່ງກ່າວ ທີ່ໃຫ້ຄວາມສຳຄັນ ໃນວຽກງານກິລາ ໂດຍສະເພາະ ແມ່ນການ ປະກອບສ່ວນ ໃນຄັ້ງນີ້ ກໍເພື່ອນຳໃຊ້ ເຂົ້າໃນການແຂ່ງຂັນກິລາ ນັກຮຽນມັດທະຍົມ ສຶກສາທົ່ວແຂວງ ທັງເພື່ອເປັນການ ສະເຫຼີມສະຫຼອງ ແລະ ຂ່ຳນັບຮັບຕ້ອນ ບຸນປີໃໝ່ລາວ ທີ່ຈະມາເຖິງນີ້ ແລະ ເປັນການກໍ່ສ້າງ ຄັດເລືອກ ນັກກິລາ ເພື່ອກະກຽມເຂົ້າຮ່ວມ ການແຂ່ງຂັນ ໃນລະດັບປະເທດ ແລະ ຕ່າງປະເທດ. ພ້ອມນີ້ ກໍຫວັງວ່າ ວຽກງານກິລາ ຈະໄດ້ຮັບການຊ່ວຍເຫຼືອ ແລະ ສະໜັບສະໜູນ ຈາກບັນດາບໍລິສັດ ພາກລັດ ແລະ ບໍ່ລິສັດເອກະຊົນຕໍ່ໄປ.

                                                                                  ຂ່າວ-ພາບ: ນາລີວັນ