ວັນອັງຄານ, 23 ຕຸລາ 2018

ພະແນກການ ຕ່າງປະເທດ ແຂວງເຊກອງ ຕີລາຄາຄືນ ວຽກງານການຕ່າງປະເທດ ປະຈໍາປີ 2017

112 n

          ໃນວັນທີ 28 ມີນາ 2018 ນີ້ ພະແນກການຕ່າງປະເທດ ແຂວງເຊກອງ ໄດ້ຈັດກອງປະຊຸມ ສະຫຼຸບການເຄື່ອນໄຫວວຽກງານ ປະຈໍາປີ 2017 ແລະ ກໍານົດທິດທາງແຜນການ ປະຈຳປີ 2018 ຂຶ້ນ ທີ່ສະໂມສອນໃຫຍ່ ຫ້ອງວ່າການປແຂວງເຊກອງ ໂດຍການເປັນປະທານຂອງ ທ່ານ ປອ ຄໍາພຽມ ບົວລະພາ ຮອງເລຂາພັກແຂວງ ປະທານສະມາຄົມມິດຕະພາບ ລາວ-ຫວຽດນາມ, ທ່ານ ຄໍາເວີ ວາດສະຫງ່າ ຫົວໜ້າພະແນກການຕ່າງປະເທດແຂວງເຊກອງ, ມີບັນດາຄະນະພັກ-ຄະນະນໍາອ້ອມຂ້າງແຂວງ, ຄະນະນໍາ 4 ຕົວເມືອງ ພ້ອມດ້ວຍພະນັກງານ-ລັດຖະກອນ ພາຍໃນພະແນກການດັ່ງກ່າວເຂົ້າຮ່ວມ.

          ໃນພິທີ, ທ່ານ ນາງ ຂັນທະລີ ສິມທອງຄໍາ ຮອງ ຫົວໜ້າພະແນກການຕ່າງປະເທດ ແຂວງເຊກອງ ໄດ້ສະຫຼຸບຕີລາຄາຄືນ ຜົນການເຄື່ອນໄຫວວຽກງານ ການຕ່າງປະເທດ ໃນປີ 2017 ແລະ ແຜນວຽກຈຸດສຸມ ປະຈຳປີ 2018, ເຊິ່ງທ່ານໄດ້ຍົກໃຫ້ເຫັນ ສະພາບແວດລ້ອມ ໃນພາກພື້ນ ແລະ ສາກົນ ທີ່ພວມຜັນແປໄປຢ່າງສັບສົນ, ສະຫຼັບຊັບຊ້ອນ ມີທັງການຕໍ່ສູ້ແກ່ງແຍ້ງ, ມີທັງກາລະໂອກາດ ແລະ ສິ່ງທ້າທາຍ, ແຕ່ທ່າອ່ຽງໂດຍລວມ ຍັງແມ່ນການເສີມສ້າງ ສັນຕິພາບ, ການຮ່ວມມື ເພື່ອການພັດທະນາ ແລະ ການເຊື່ອມໂຍງ ບົນພື້ນຖານຫຼັກການ ຊ່ວຍເຫຼືອເຊິ່ງກັນ ແລະ ກັນ ຕ່າງຝ່າຍ ຕ່າງມີຜົນປະໂຫຍດ, ເສີມຂະຫຍາຍສາຍພົວພັນ ແບບຫຼາຍທິດ, ຫຼາຍຝ່າຍ, ຫຼາຍລະດັບ ຕາມທິດຊີ້ນໍາ ເພີ່ມມິດ-ຜ່ອນສັດຕູ ກໍ่ຄືເນື້ອໃນ ກອງປະຊຸມກະຊວງການຕ່າງປະເທດ ຄັ້ງທີ 13 ກ່ຽວກັບ ການທູດປ້ອງກັນປະເທດ ແລະ ບຸກທະລຸ ເພື່ອປົກປັກຮັກສາ ແລະ ພັດທະນາປະເທດຊາດ ຕິດພັນກັບການຍົກສູງຄວາມສາມາດ, ລັກສະນະນໍາໜ້າ ແລະ ຄວາມເປັນເຈົ້າການ ຂອງພະນັກງານ ໃນຂະແໜງການຕ່າງປະເທດ.

          ໃນສະພາບການດັ່ງກ່າວ, ໂດຍພາຍໃຕ້ການຊີ້ນໍາຢ່າງໃກ້ຊິດ ຈາກຄະນະພັກ-ຄະນະນໍາຂັ້ນເທິງ, ການເຄື່ອນໄຫວວຽກງານ ການຕ່າງປະເທດສືບຕໍ່ຍາດໄດ້ຜົນສໍາເລັດ ທີ່ພົ້ນເດັ່ນໃນຫຼາຍດ້ານ, ເປັນຕົ້ນ ໃນປີ 2017 ພະແນກການຕ່າງປະເທດແຂວງເຊກອງ ກັບ ບັນດາແຂວງພາກກາງ ສສ ຫວຽດນາມ ໄດ້ມີການສະເຫຼີມສະຫຼອງ ສອງວັນປະຫວັດສາດ ລາວ-ຫວຽດນາມຄື: ວັນສ້າງຕັ້ງສາຍພົວພັນການທູດ ຄົບຮອບ 55 ປີ ແລະ ວັນເຊັນສົນທິສັນຍາມິດຕະພາບ ແລະການຮ່ວມມືລາວ-ຫວຽດນາມ, ຫວຽດນາມ-ລາວ ຄົບຮອບ 40 ປີການນໍາແຂວງເຊກອງ ໄດ້ເຄື່ອນໄຫວຢ້ຽມຢາມ ມິດຕະພາບຢູ່ 3 ແຂວງ ກວາງນາມ, ນະຄອນດາໜັງ ແລະ ແຂວງເທື່ອທຽນເຫວ້ ແລະ ໄດ້ມີການຈັດກອງປະຊຸມ ຮອບວຽນ ຮ່ວມມືຮອບດ້ານ ເພື່ອທົບທວນຄືນ ແລະ ສະຫຼຸບຕີລາຄາຄືນ ຜົນການຈັດຕັ້ງປະຕິບັດ ເນື້ອໃນບົດບັນທຶກຊ່ວຍຈໍາ ຮ່ວມກັນ ແລະ ສໍາເລັດກອງປະຊຸມທີ່ກ່ຽວຂ້ອງ ອື່ນໆ ໄດ້ຢ່າງຈົບງາມ. ຂະນະທີ່ວຽກງານສະມາຄົມມິດຕະພາບລາວ-ຫວຽດນາມ ຂັ້ນແຂວງ ໄດ້ຕ້ອນຮັບຄະນະ ອະດີດຄູ-ອາຈານ ແລະ ນັກສຶກສາຄະນະປະຫວັດສາດ, ຄະນະແພດໝໍ ຈາກແຂວງກວາງນາມ ແລະ ນະຄອນໂຮ່ຈີມິງ ທີ່ມາຢ້ຽມຢາມ, ເຄື່ອນໄຫວ ກວດສຸຂະພາບ ຢູ່ ແຂວງເຊກອງໄດ້ 2 ຄັ້ງ, ຄະນະສະມາຄົມມິດຕະພາບ ລາວ-ຫວຽດນາມ ແຂວງເຊກອງ ໄປຢ້ຽມຢາມ ແລະ ຖອດຖອນບົດຮຽນກັບ ຄະນະສະມາຄົມມິດຕະພາບ ຫວຽດນາມ-ລາວ ແຂວງດັກລັກໄດ້ 1 ຄັ້ງ; ສໍາເລັດການສ້າງຕັ້ງ ສະມາຄົມມິດຕະພາບລາວ-ຈີນ ຂັ້ນເມືອງ ຂອງ 4 ຕົວເມືອງ, ສໍາເລັດການເກັບກໍາສະຖິຕິປະຊາຄົມຄົນຈີນ ທີ່ກໍາລັງດໍາເນີນທຸລະກິດ ແລະ ພັກເຊົາຢູ່ 3 ຕົວເມືອງ; ວຽກງານຊາຍແດນ ໃນປີ 2017 ກອງກວດກາປ່າໄມ້ ພະແນກກະສິກໍາ ແລະປ່າໄມ້ໄດ້ລົງນາມເຊັນບົດບັນທຶກຊ່ວຍຈໍາ ການຮ່ວມມືກັນ ໃນໄລຍະ 2017-2020 ກັບກອງກວດກາປ່າໄມ້ ແຂວງກວາງນາມ ແລະ ແຂວງເທື່ອທຽນເຫວ້ ວ່າດ້ວຍການຮ່ວມກັນຄຸ້ມຄອງ ແລະ ປົກປັກຮັກສາປ່າໄມ້ ລະຫວ່າງ ຊາຍແດນ ແລະແກ້ໄຂບັນຫາ ຜູ້ຍົກຍ້າຍຕັ້ງພູມລໍາເນົາ ຕາມລໍາພັງໃຈ ແລະ ສ້າງຄອບຄົວ ບໍ່ຖືກລະບຽບກົດໝາຍ ໃນຂອບເຂດບໍລິເວນຊາຍແດນ ລະຫວ່າງ ແຂວງເຊກອງ ແລະ ແຂວງກອນຕູມ, ແຂວງກວາງນາມ ແລະ ແຂວງເທື່ອທຽນເຫວ້ ສສ ຫວຽດນາມ. ນອກນັ້ນ, ບັນດາພະແນກການຕ່າງໆ ອ້ອມຂ້າງແຂວງ ແລະບັນດາ 4 ຕົວເມືອງ ກໍໄດ້ກອບສ່ວນອັນສໍາຄັນ ເຂົ້າໃນການສົ່ງເສີມ ການພົວພັນຮ່ວມມື ລະຫວ່າງ ສປປ ລາວ ກັບຕ່າງ ປະເທດ ກໍຄື ແຂວງເຊກອງ ກັບ ຕ່າງປະເທດ ເຫັນວ່າສາມາດປົກປ້ອງສິດຜົນປະໂຫຍດ ຂອງຊາດ-ຂອງທ້ອງຖິ່ນ ໃນລະດັບອັນແນ່ນອນ ແລະ ທັງເປັນການຍາດແຍ່ງ ການຊ່ວຍເຫຼືອສາກົນ, ດຶງດູດການລົງທຶນ ແລະ ການພົວພັນດ້ານເສດຖະກິດ ຢ່າງຕໍ່ເນື່ອງ.  

         ສໍາລັບທິດທາງແຜນການ ຈຸດສຸມ ໃນການເຄື່ອນໄຫວວຽກງານ ໃນປີ 2018 ໂດຍຈະໄດ້ສືບຕໍ່ ປັບປຸງແກ້ໄຂຂໍ້ຄົງຄ້າງ ຕາມຜົນຂອງກອງປະຊຸມ ວຽກງານການຕ່າງປະເທດ ຄັ້ງທີ 13 ທີ່ໄດ້ຈັດຂຶ້ນ ຢ່າງມີຜົນສໍາເລັດ ໃນທ້າຍປີ 2016 ແລະ ສືບຕໍ່ຢືດໝັ້ນ ປະຕິບັດນະໂຍບາຍການຕ່າງປະເທດ ຕາມມະຕິກອງປະຊຸມໃຫຍ່ ຄັ້ງທີ X ຂອງພັກ ມະຕິ IX ຂອງອົງຄະນະພັກແຂວງ ຢ່າງໜັກແໜ້ນ, ຄ່ອງແຄ້ວ ແລະ ມີຈຸດສຸມ.

 ໃນຕອນທ້າຍ, ທ່ານ ປອ ຄໍາພຽມ ບົວລະພາ ຮອງເລຂາພັກແຂວງ ປະທານສະມາຄົມມິດຕະພາບ ລາວ-ຫວຽດນາມ ກໍໄດ້ໃຫ້ກຽດມີຄຳເຫັນ ໂອ້ລົມ ຕໍ່ພິທີສະຫຼຸບການເຄື່ອນໄຫວ ວຽກງານການຕ່າງປະເທດ, ໂດຍໄດ້ສະແດງຄວາມຊົມເຊີຍຕໍ່ຜົນງານ ແລະ ໄດ້ພ້ອມກັນສັງເກດຕີລາຄາຄືນ ກ່ຽວກັບຜົນງານການຈັດຕັ້ງປະຕິບັດວຽກງານ ໃນໄລຍະໜຶ່ງປີຜ່ານມາ ໂດຍຍົກໃຫ້ເຫັນຜົນສຳເລັດ ກໍຄືສິ່ງທີ່ຄົງຄ້າງ ທີ່ຈະຕ້ອງເອົາໃຈໃສ່ແກ້ໄຂໃນຕໍ່ໜ້າ. ພ້ອມນີ້, ທ່ານຍັງໄດ້ຮຽກຮ້ອງ ໃຫ້ບັນດາພະນັກງານ-ລັດຖະກອນ ຂອງພະແນກການຕ່າງປະເທດ ຈົ່ງສືບຕໍ່ຊຸກຍູ້ສົ່ງເສີມຜົນສຳເລັດ ທີ່ຍາດມາໄດ້, ສືບຕໍ່ເອົາໃຈໃສ່ ຜັນຂະຫຍາຍແນວທາງນະໂຍບາຍຕ່າງປະເທດ ຕາມທິດທາງມະຕິ X ຂອງພັກ, ມະຕິ IX ຂອງອົງຄະນະພັກແຂວງ ທີ່ວາງອອກ ແລະ ມະຕິກອງປະຊຸມວຽກງານການຕ່າງປະເທດ ທົ່ວປະເທດ ຄັ້ງທີ 13 ໃຫ້ມີຜົນ ສຳເລັດຢ່າງຈົບງາມ. ຄຽງຄູ່ກັນນັ້ນ, ໃຫ້ສືບຕໍ່ເຄື່ອນໄຫວ ວຽກງານການຕ່າງປະເທດ ຢ່າງຕັ້ັງໜ້າ, ໃຫ້ມີການຂະຫຍາຍຕົວທັງລວງກ້ວາງ ແລະ ລວງເລິກ ຢ່າງມີປະສິດທິຜົນ,  ສືບຕໍ່ບາດກ້າວແຫ່ງການເຊື່ອມໂຍງພາກພື້ນ ແລະ ສາກົນ ຢ່າງເປັນເຈົ້າການ, ເຂົ້າຮ່ວມການເຄື່ອນໄຫວໃນຂອບການຮ່ວມມືຕ່າງໆ ຂອງພາກພື້ນ ແລະ ສາກົນຢ່າງຫ້າວຫັນ.

ຂ່າວ-ພາບ: ນາລີວັນ