ວັນອັງຄານ, 23 ຕຸລາ 2018

ຂົງເຂດທະນາຄານ ສາຂາ ແຂວງເຊກອງ ຫວນຄືນມູນເຊື້ອ ວັນສ້າງຕັ້ງ ຊປປ ລາວ ຄົບຮອບ 63 ປີ

ພິທີປາຖະກະຖາ ຫວນຄືນມູນເຊື້ອວັນສ້າງຕັ້ງຊາວໜຸ່ມປະຊາຊົນປະຕິວັດລາວ (ຊປປ ລາວ) ຄົບຮອບ 63 ປີ ໄດ້ມີຂຶ້ນໃນວັນທີ 29 ມີນາຜ່ານມານີ້ ຢູ່ທີ່ຫ້ອງປະຊຸມ ທຄຕລ ສາຂາເຊກອງ ໂດຍການເປັນປະທານຂອງທ່ານ ເລັດສະໝອນ ໄຊບົວເງິນ ເລຂາຄະນະພັກ,ຫົວໜ້າທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງເຊກອງ ພ້ອມດ້ວຍຄະນະໜ່ວຍຊາວໜຸ່ມຮາກຖານ ແລະສະມາຊິກຊາວໜຸ່ມທັງ 4 ທະນາຄານຄື: ທະນາຄານການຄ້າຕ່າງປະເທດລາວມະຫາຊົນ, ທະນາຄານພັດທະນາລາວ, ທະນາຄານສົ່ງເສີມກະສິກຳ ແລະທະນາຄານພົງສະຫວັນ ເຂົ້າຮ່ວມ.

ທ່ານ ຕຸລາ ວົງໜໍ່ແກ້ວ ຄະນະບໍລິຫານງານ ຊປປ ລາວ ແຂວງເຊກອງ, ເລຂາໜ່ວຍຊາວໜຸ່ມຮາກຖານ ທຄຕລ ມະຫາຊົນ ສາຂາແຂວງເຊກອງ ກ່າວວ່າ ຈຸດປະສົງ ແມ່ນເພື່ອເຮັດໃຫ້ສະມາຊິກຊາວໜຸ່ມທຸກຄົນ ຮັບຮູ້ເຖິງມູນເຊື້ອຂອງຊາວໜຸ່ມແຕ່ລະຮຸ່ນ ໃນການຕໍ່ສູ້ປົດປ່ອຍຊາດ, ມູນເຊື້ອຂອງຊາວໜຸ່ມໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃນລະບອບໃໝ່ ແລະ ບົດຮຽນໃນການເສີມຂະຫຍາຍມູນເຊື້ອດັ່ງກ່າວໃຫ້ດີຂຶ້ນໃນຕໍ່ໜ້າ, ເຊິ່ງບໍ່ວ່າຈະຢູ່ໃນໄລຍະໃດກໍ່ຕາມ ຊາວໜຸ່ມແມ່ນມີບົດບາດສໍາຄັນ ໃນການຕໍ່ສູ້ປົກປັກຮັກສາ ແລະ ສ້າງສາບ້ານເມືອງຊາວໜຸ່ມຈໍານວນບໍ່ໜ້ອຍໄດ້ເສຍສະຫຼະຊີວິດເພື່ອປົກປັກຮັກສາເອກະລາດ ແລະ ຜືນແຜ່ນດິນອັນແສນຮັກຂອງຕົນໄວ້ ແລະ ພວກເພິ່ນກໍ່ໄດ້ຍອມເສຍສະຫຼະເລືອດເນື້ອ ອັນໜຸ່ມແໜ້ນຂອງຕົນ ເພື່ອປະເທດຊາດ; ນັບແຕ່ມື້ສ້າງຕັ້ງພັກປະຊາຊົນປະຕິວັດລາວມານີ້ ຊາວໜຸ່ມ ໄດ້ຮັບຂະໜານນາມວ່າ ເປັນແຂນຂວາຂອງພັກເປັນກະດູກສັນຫຼັງ ແລະ ເປັນຜູ້ສືບທອດທີ່ຈົ່ງຮັກພັກດີຂອງປະເທດຊາດ

ໃນຜົນງານການຕໍ່ສູ້ບໍ່ຍອມຈຳນົນຂອງຊາວໜຸ່ມຮຸ່ນຕໍ່ຮຸ່ນ ແຕ່ລະສະໄໝນັ້ນ ພວກເຮົາສາມາດຍົກໃຫ້ເຫັນ ມູນເຊື້ອຂອງຊາວໜຸ່ມ ໃນການຕໍ່ສູ້ຕ້ານພວກຈັກກະພັດຝຣັ່ງ ແລະ ສັກດີນາສະຫຍາມ ສະນັ້ນ ຊາວໜຸ່ມຮຸ່ນທໍາອິດ ຈິ່ງເປັນຮຸ່ນບຸກເບີກເສັ້ນທາງຕໍ່ສູ້ປະຕິວັດ ພາຍໃຕ້ແສງສະຫວ່າງຂອງພັກຄອມມູນິດອິນດູຈີນ ຂະບວນການຕໍ່ຂອງຊາວໜຸ່ມ ໄດ້ລະເບີດຂຶ້ນຕັ້ງແຕ່ເໜືອຮອດໃຕ້ ເຊັ່ນໃນປີ 1933 ອົງການຊາວໜຸ່ມ ຄອມມູນິດຢູ່ໂຮງຮຽນມັດທະຍົມ ປາວີ (ວຽງຈັນ) ຊາວໜຸ່ມໂຮງຮຽນການຊ່າງປາກປ່າສັກ ໄດ້ລຸກຂຶ້ນປະທ້ວງ ປີ 1934 ພັກຄອມມູນິດແຄ້ວນລາວ ໄດ້ຕົກລົງແຕ່ງຕັ້ງຊາວໜຸ່ມລາວ ແລະໄດ້ບົ່ງຕົວ ຄະນະບໍລິຫານງານຊາວໜຸ່ມຊົ່ວຄາວຂຶ້ນ ເພື່ອປຸກລະດົມຊາວໜຸ່ມ ເຮັດການຕໍ່ສູ້ເພື່ອຄວາມເປັນເອກະລາດ ຂອງຊາດເຊິ່ງໃນໄລຍະສົງຄາມໂລກ ຄັ້ງທີ 2 ຈັກກະພັດຍີ່ປຸ່ນ ໄດ້ມາຮຸກຮານອາຊີຕາເວັນອອກ ໃນໄລຍະດັ່ງກ່າວ ຊາວໜຸ່ມລາວແຕ່ເໜືອຕະຫຼອດໃຕ້ ໄດ້ຫັນປາຍປືນມາຕໍ່ສູ້ກັບ ຈັກກະພັດຍີ່ປຸ່ນ ເຮັດໃຫ້ຍີ່ປຸ່ນອ່ອນເພຍ ເຮັດໃຫ້ປະຊາຊົນລາວຊາວໜຸ່ມລາວພາຍໃຕ້ການນຳພາ ຂອງພັກຄອມມູນິດອິນດູຈີນ ກໍ່ສາມາດຢຶດອໍານາດມາສູ່ມືປະຊາຊົນລາວປະກາດເປັນປະເທດເອກກະລາດ ໃນວັນທີ12 ຕຸລາ 1945 ຊາວໜຸ່ມຮຸ່ນທຳອິດ ສາມາດເຮັດພາລະກິດປະຫວັດສາດ ຂອງຕົນເປັນແບບຢ່າງແຫ່ງນໍ້າໃຈເສຍສະຫຼະເພື່ອປະເທດຊາດ ຢ່າງສຸດກົກສຸດປາຍ; ນອກຈາກນັ້ນຍັງມີຂະບວນການຕໍ່ສູ້ຂອງຊາວໜຸ່ມ ຮຸ່ນທີສອງ, ຮຸ່ນທີສາມ ແລະ ຮຸ່ນທີສີ່ ໄດ້ຂະຫຍາຍຕົວ ຢ່າງເປັນຂະບວນຟົດຟື້ນຈົນສາມາດຍາດໄດ້ໄຊຊະນະມາສູ່ກໍາມື ຂອງປະຊາຊົນລາວ ສາມາດປະກາດ ເປັນປະເທດສາທາລະນະລັດ ປະຊາທິປະໄຕປະຊາຊົນລາວ ໃນວັນທີ 2 ທັນວາ 1975; ມາຮອດປະຈຸບັນ ອົງການໄດ້ເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ ໄດ້ກາຍເປັນກໍາລັງປະຈັນບານ ແລະ ສືບທອດທີ່ໄວ້ເນື້ອເຊື່ອໃຈຂອງພັກ ແລະ ຂອງຊາດ.

ຂ່າວ-ພາບ: ພຸດທະສອນ