ວັນອັງຄານ, 23 ຕຸລາ 2018

ເມືອງກະລຶມ ສະຫຼຸບ ການຈັດຕັ້ງປະຕິບັດ ກິດຈະກຳຮອບວຽນທີ 14 ແລະ 15

       ພີທີສະຫຼຸບການຈັດຕັ້ງປະຕິບັດ ກິດຈະກຳຮອບວຽນທີ 14 ປີ 2017 ແລະ ຮອບວຽນທີ 15 ປີ 2018 ຂອງ ກອງທຶນຫຼຸດຜ່ອນຄວາມທຸກຍາກ ເມືອງກະລຶມ ຫຼື ທລຍ ໄດ້ມີຂຶ້ນໃນວັນທີ 19 ມີນາ 2018 ນີ້ ຢູ່ທີສະໂມສອນຂອງເມືອງ ໂດຍພາຍໃຕ້ການເປັນປະທານຂອງ ທ່ານ ອໍບົວລາ ອ່ອນມະໄລວົງ ຮອງເລຂາພັກເມືອງ ຮອງເຈົ້າເມືອງກະລຶມ,ມີ ທ່ານ ວິແຊມ ໄຊສຶກສາຮອງຫົວໜ້າພະແນກກະສິກຳ ແລະ ປ່າໄມ້ ແຂວງເຊກອງ ພ້ອມດ້ວຍແຂກຖືກເຊີນຈາກຂະແໜງການທີ່ກ່ຽວຂ້ອງ ແລະ ບັນດາເລຂາຄະນະພັກຮາກຖານກຸ່ມບ້ານ, ນາຍບ້ານເຂົ້າຮ່ວມ.

     ທ່ານ ສູນທອນ ສີຫາລາດ ຫົວໜ້າທິມງານ ທລຍ ເມືອງກະລຶມ ລາຍງານໃຫ້ຮູ້ວ່າ: ຜ່ານການຈັດຕັ້ງປະຕິບັດ ໂຄງການດັງກ່າວໃນໄລຍະຜ່ານມາ ເຫັນວ່າໄດ້ຮັບຜົນສຳເລັດຢ່າງຢືນຢົງ ຈາກຜົນສຳເລັດເລົ່ານີ້ ກໍຍ້ອນພໍ່ແມ່ປະຊາຊົນ ໃຫຄວາມຮ່ວມມືເປັນຢ່າງດີ ແລະ ດ້ວຍຄວາມເປັນເຈົ້າການເອົາໃຈໃສ່ ຈັດຕັ້ງປະຕິບັດໜ້າທີ່ວຽກງານ ຢ່າງຕັ້ງໜ້າຂອງພະນັກງານ ທລຍ ໂດຍການປະສານສົມທົບ ກັບ ພາກສ່ວນທີ່ກ່ຽວຂ້ອງ ພ້ອມທັງໄດ້ຮັບການຊີ້ນຳໆ ພາຈາກອຳນາດການປົກຄອງເມືອງ ເຊິ່ງການຈັດຕັ້ງປະຕິບັດກິດຈະກຳຮອບວຽນທີ 14 ປີ 2017 ແມ່ນປະກອບມີ 8 ໂຄງການຄື ໂຄງການ ກໍ່ສ້າງຫໍພັກ ຄົນເຈັບ ບ້ານສອງຄອນ 1 ໂຄງການ,ກໍ່ສ້າງນ້ຳລິນ 6 ໂຄງການ ແລະ ໂຄງການສອ້ມແປງນ້ຳລິນ ບ້ານຕີນຕືມ 1 ໂຄງການ ລວມມູນຄ່າທັງໝົດ 1.804.967.961 ກີບ ແລະ ຮອບວຽນທີ 15 ປີ 2018 ມີ 9 ໂຄງການ ໃນນັ້ນໂຄງການກໍ່ສ້າງໂຮງຮຽນມີ 3 ໂຄງການ,ກໍ່ສ້າງນ້ຳລິນ 3 ໂຄງການ,ກໍ່ສ້າງຜາຍນ້ຳລົ້ນ 2 ໂຄງການ ແລະ ໂຄງການກໍ່ສ້າງ ຫ້ອງນ້ຳຫໍພັກຄົນເຈັບ 1 ໂຄງການ ລວມມູນຄ່າ 2 ຕື້ກວ່າກີບ ແລະ ພ້ອມກັນນັ້ນ ກອງທຶນຫຼຸດຜ່ອນຄວາມທຸກຍາກ ຫຼື ທລຍ ຍັງໄດ້ສືບຕໍ່ຈັດຕັ້ງປະຕິບັດກິດຈະກຳຮອບວຽນທີ 16 2018 ທີ່ຖືກຮັບຮອງແລ້ວ ມີທັງໝົດ 14 ໂຄງການ ຄື ໂຄງການກໍ່ສ້າງໂຮງຮຽນ 1 ໂຄງການ, ສ້ອມແປງນ້ຳລິນ 5 ໂຄງການ,ສ້ອມແປງຜາຍນ້ຳລົ້ນ 2 ໂຄງການ,ຈັດຊື້ອຸປະກອນເຟີນິເຈີໂຮງຮຽນ 2 ໂຄງການ,ກໍ່ສ້າງນ້ຳລິນ 2 ໂຄງການ, ໂຄງການຈັດຊື້ອຸປະກອນກິລາໃຫ້ໂຮງຮຽນ 1 ໂຄງການ ແລະ ໂຄງການສ້ອມແປງເສັ້ນທາງເຂົ້າບ້ານ 1 ໂຄງການ ລວມມູນຄ່າທັງໝົດເກືອບ 2 ຕື້ກີບ ທັງນີ້ກໍເພື່ອ ເຮັດໃຫ້ພໍ່ແມ່ປະຊາຊົນ ບັນດາເຜົ່າ ໄດ້ຫຼຸດພົ້ນອອກຈາກຄວາມທຸກຍາກ ເທື່ອລະກ້າວ.