ວັນສຸກ, 14 ທັນວາ 2018

ແຂວງເຊກອງເລົ່າຄືນມູນເຊື້ອ63 ປີ ວັນສ້າງຕັ້ງແມ່ຍິງລາວ

                                     

                                                       

• ຂ່າວ-ພາບ : ສັນຍາ pc.1.2
         (ເຊກອງ, ວັນທີ 19/07/2018 ) * ເພື່ອທົບທວນຄືນ ມູນເຊື້ອ ການສ້າງຕັ້ງ ສະຫະພັນແມ່ຍິງລາວ ຄົບຮອບ 63 ປີ, ທັງເປັນການ ສຶກສາອົບຮົມ ສະມາຊິກ ສະຫະພັນແມ່ຍິງລາວ ພາຍໃນແຂວງ ເຊກອງ ໄດ້ຮັບຮູ້ ແລະ ເຂົ້າໃຈ ຢ່າງເລິກເຊິ່ງກວ່າເກົ່າ, ຕໍ່ການປະກອບສ່ວນ ຂອງແມ່ຍິງ ລາວເຂົ້າໃນ ພາລະກິດ ປົດປ່ອຍຊາດ, ປົກປັກຮັກສາ ແລະ ສ້າງສາ ພັດທະນາ ປະເທດຊາດ ໃນສະໄໝກ່ອນ, ຄະນະບໍລິຫານງານ ສະຫະພັນແມ່ຍິງ ແຂວງເຊກອງ ຈຶ່ງໄດ້ຈັດ ພິທີ ປາຖະກະຖາ ຂຶ້ນໃນ ວັນທີ 19 ກໍລະກົດ 2018 ຢູ່ສະໂມສອນ ຫ້ອງວ່າການແຂວງເຊກອງ.
         ໃຫ້ກຽດ ເປັນປະທານ ແລະ ເລົ່າຄືນມູນເຊື້ອ ວັນສ້າງຕັ້ງ ສະຫະພັນແມ່ຍິງ ລາວຄັ້ງນີ້ ໂດຍແມ່ນ ທ່ານ ນາງ ວິໄລວັນ ດາລາສິນ ຮອງປະທານ ສະຫະພັນ ແມ່ຍິງແຂວງ, ພ້ອມນີ້ ກໍມີບັນດາ ທ່ານຫົວໜ້າ-ຮອງພະແນກ, ຫ້ອງການ, ບໍລິ ສັດ - ລັດວິສາຫະກິດ, ພະນັກງານ ບຳນານ, ພ້ອມດ້ວຍຄະນະ ສະຫະພັນ ແມ່ຍິງ ຂະແໜງການ ຕ່າງໆ ອ້ອມຂ້າງແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.

 


        ໃນພິທີ ທ່ານຮອງປະທານ ສະຫະພັນແມ່ຍິງ ແຂວງ ກໍໄດ້ກ່າວເຖິງ ປະຫວັດ ຄວາມເປັນມາ ຂອງການສ້າງຕັ້ງ ອົງການຈັດຕັ້ງ ສະຫະພັນແມ່ຍິງລາວ ທີ່ຕິດພັນ ກັບພາລະກິດ ປົກປັກຮັກສາ ແລະ ການເຄື່ອນໄຫວ ການຈັດຕັ້ງ ຂອງແມ່ຍິງ ໃນໄລຍະຜ່ານມາ ກໍຄື ພາລະບົດບາດ ຂອງແມ່ຍິງ ໃນພາລະກິດ ປົດປ່ອຍ, ປົກປັກຮັກສາ ແລະ ພັດທະນາປະເທດຊາດ, ພ້ອມດຽວກັນນີ້ ຍັງເນັ້ນ ໃຫ້ເຫັນເຖິງ ໜ້າທີ່ຂອງການຈັດຕັ້ງ ແມ່ຍິງ ໃນເມື່ອກ່ອນ ແລະ ປັດຈຸບັນ ໂດຍໜ້າທີ່ ອັນທີໜຶ່ງ ແມ່ນການເບິ່ງແຍງລ້ຽງດູ, ຊຸກເຊື່ອງຕິດຕໍ່, ສົ່ງຂ່າວພະນັກງານ, ທະຫານປະຕິວັດ, ສົ່ງເອກະສານ ຕ່າງໆໃຫ້ພະນັກງານ, ທະຫານ ທີ່ປະຕິບັດໜ້າທີ່ ຢູ່ແນວໜ້າ ແລະ ໃນເຂດຄວບຄຸມ ຂອງສັດຕູ ດ້ວຍຫຼາຍຮູບແບບ ແລະຫຼາຍວິທີ, ສອງລໍາລຽງສະບຽງອາຫານ, ອາວຸດ ແລະເຄື່ອງນຸ່ງຫົ່ມໃຫ້ພະນັກງານ-ນັກຮົບຢູ່ແນວໜ້າ, ສາມປຸກລະດົມຊາວໝຸ່ມລູກຫຼານອອກຮັບໃຊ້ປະເທດຊາດ, ສີ່ປຸກລະດົມຂະບວນການຂອງແມ່ຍິງປະຕິບັດວຽກແນວຫຼັງ, ເພີ່ມພູນ ຜະລິດຜົນ ຫາລ້ຽງກຸ້ມຕົນເອງ ປະຢັດເຂົ້າປາອາຫານ ເພື່ອສົ່ງໄປແນວໜ້າ ແລະ ປະຕິບັດວຽກງານ ຕາມການຈັດຕັ້ງມອບໝາຍ ດ້ວຍຄວາມຮັບຜິດຊອບສູງ ແລະ ສຸດທ້າຍແມ່ນ ຄົ້ນຄວ້າກຳ ນົດພາລະບົດບາດ, ກົດລະບຽບ ແລະ ໂຄງການ ດຳເນີນງານ ເພື່ອເປັນພື້ນຖານ ໃຫ້ແກ່ການຈັດຕັ້ງ, ເຕົ້າໂຮມ ຄວາມສາມັກຄີ, ສຶກສາອົບຮົມ ປຸກລະດົມ ຂົນຂວາຍ ຂະບວນການແມ່ຍິງລາວ ບັນດາເຜົ່າ ເຂົ້າເປັນກຳລັງແຮງ ໃຫ້ແກ່ການປະຕິວັດ ປົດປ່ອຍຊາດ, ສະນັ້ນ ເພື່ອເຮັດໃຫ້ ບັນດາເອື້ອຍ ນ້ອງແມ່ຍິງພາຍໃນ ແຂວງເຊກອງ ກໍຄືແມ່ຍິງລາວ ທົ່ວປະເທດ ໄດ້ຮັບຮູ້ ແລະ ເຂົ້າໃຈເຖິງ ພາລະບົດບາດ, ທັງນຳເອົາໜ້າທີ່ 5 ຢ່າງນີ້ ໄປໝູນໃຊ້ ໃຫ້ສອດຄ່ອງ ກັບການຈັດຕັ້ງ ປະຕິບັດຕົວ ຈິງໃນຍຸກປັດຈຸບັນ.
        ພ້ອມດຽວກັນນີ້ ກໍຍັງໄດ້ ຮັບຟັງການເລົ່າປະຫວັດ ຄວາມເປັນມາ ແລະ ການເຄື່ອນໄຫວ ຂອງອົງການຈັດຕັ້ງ ສະຫະພັນແມ່ຍິງ ແຂວງເຊກອງ ແລະ ຈັດກິດຈະກຳຕ່າງໆ ທັງນີ້ ກໍເພື່ອ ແນໃສ່ ເຮັດໃຫ້ການສະເຫຼີມສະຫຼອງ ມີບັນຍາກາດ ຟົດຟື້ນ ແລະ ເຕັມໄປດ້ວຍ ເນື້ອໃນ ຄວາມໝາຍ ສຳຄັນ ອັນເລິກເຊິ່ງ.