ວັນອາທິດ, 19 ສິງຫາ 2018

ທ່ານ ປອ ຄໍາຜາ ພິມມະສອນ ເຄື່ອນໄຫວ ຢ້ຽມຢາມ ແລະ ເຮັດວຽກ ຢູ່ ບ້ານ 3 ສ້າງ ຈຸນລາ

8661 o

ໃນຕອນບ່າຍຂອງວັນທີ 26 ມີນາ 2018ນີ້ ທ່ານ ປະລິນຍາເອກ (ປອ) ຄໍາຜາ ພິມມະສອນ ຮອງຫົວໜ້າຫ້ອງວ່າການສູນກາງພັກ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ບ້ານ 3 ສ້າງ ຈຸນລາ ເມືອງ ທ່າແຕງ ແຂວງ ເຊກອງ ໂດຍໃຫ້ກຽດຕ້ອນຮັບຈາກທ່ານ ພູຂາວ ທອງຊົມພູ ເລຂາຄະນະພັກຮາກຖານບ້ານ-ນາຍບ້ານ 3 ສ້າງຈຸນລາ, ມີທ່ານ ຄໍາສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງ-ເມືອງ ທ່າແຕງ, ຫົວໜ້າເຂດຈຸດສຸ່ມພັດທະນາ,ຄະນະກໍາມະການຊີ້ນໍາວຽກງານ 3 ສ້າງຂັ້ນແຂວງ ແລະ ເມືອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມຕ້ອນຮັບຢ່າງອົບອຸ່ນ.

ທ່ານ ພູຂາວ ທອງຊົມພູ ເລຂາຄະນະພັກຮາກຖານບ້ານ-ນາຍບ້ານ 3 ສ້າງຈຸນລາ ໄດ້ລາຍງານວ່າ: ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ພາຍໃນບ້ານຜ່ານມາ ໂດຍສະເພາະ ສະພາບລວມ ຂອງບ້ານເຊີ່ງທົ່ວບ້ານມີເນື້ອທີ່ທັງໝົດ 2.979 ເຮັກຕາ, ມີປະຊາກອນ 2.180 ຄົນ,ຍິງ 1.070 ຄົນ, ມີ 479 ຄອບຄົວ,ມີ 388 ຫຼັງຄາເຮືອນ ພາຍໃນບ້ານ ມີສະຖຽນລະພາບທາງດ້ານການເມືອງສັງຄົມມີຄວາມສະຫງົບ,ເສດຖະກິດຂອງບ້ານ ຂະຫຍາຍຕົວດ້ວຍຈັ່ງຫວະໝັ້ນທ່ຽງລວມຍອດຜະລິດຕະພັນພາຍໃນບ້ານ ຫຼື GDP ຂະຫຍາຍຕົວໃນລະດັບດີ ສະເລ່ຍຕໍ່ຫົວຄົນບັນລຸໄດ້ 1.020 ໂດລາສະຫະລັດຕໍ່ປີສ່ວນຂະບວນການຜະລິດກະສິກໍາການປູກ-ການລ້ຽງຂອງປະຊາຊົນ ສືບຕໍ່ຂະຫຍາຍຕົວເພີ່ມຂຶ້ນ ຕາມລໍາດັບ ໂດຍສະເພາະ ການຜະລິດເຂົ້າ, ພືດຜັກ, ກາເຟ, ການລ້ຽງປາ, ໝູ ແລະ ອື່ນໆ ນອກນີ້ ປະຊາຊົນຍັງໄດ້ມີວຽກເຮັດງານທໍາ ເປັນຕົ້ນ: ການຂີດຢາງພາລາ ໃນເນື່ອທີ່ທັງໝົດ 360 ເຮັດຕາ.

ໂອກາດດັ່ງກ່າວ ທ່ານ ປະລິນຍາເອກ (ປອ) ຄໍາຜາ ພິມມະສອນ ຮອງຫົວໜ້າຫ້ອງວ່າການສູນກາງພັກ ໄດ້ເນັ້ນໃຫ້ ຄະນະນຳຂັ້ນເມືອງ-ບ້ານ ສືບຕໍ່ເອົາໃຈໃສ່ ບາງບັນຫາສຳຄັນເປັນຕົ້ນ: ວຽກງານປ້ອງກັນຊາດ-ປ້ອງກັນຄວາມສະຫງົບ ຖືເປັນວຽກງານພື້ນຖານຍາວນານ ຊຶ່ງເປັນໜ້າທີ່ຂອງຄະນະພັກແຕ່ລະຂັ້ນ ເພື່ອຕ້ານກົນອຸບາຍຂອງອິດທິກຳລັງປໍລະປັກ ແລະ ກຸ່ມຄົນບໍ່ດີທີ່ຫວັງມ້າງເພທຳລາຍພັກເຮົາ ດ້ວຍການຫັນລົງຮາກຖານ ເພື່ອປຸກລະດົມຈິດໃຈປະຊາຊົນໃຫ້ມີສະຕິລະວັງຕົວສູງຂຶ້ນ ພ້ອມທັງເອົາໃສ່ ສະກັດກັ້ນປະກົດການຫຍໍ້ທໍ້ໃນສັງຄົມ ໃຫ້ຫຼຸດນ້ອຍຖອຍລົງເທື່ອລະກ້າວສືບຕໍ່ຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ໃຫ້ຂະຫຍາຍຕົວຢ່າງຕໍ່ເນື່ອງປຸກລະດົມປະຊາຊົນເອົາໃຈໃສ່ ການປູກ-ການລ້ຽງ ໃຫ້ມີປະສິດທິຜົນ ດ້ວຍການຫັນຈາກການຜະລິດແບບຄອບຄົວ ມາຜະລິດແບບເປັນກຸ່ມຈັດສັນພູມລຳເນົາພື້ນທີ່ທຳການຜະລິດທີ່ຢູ່ອາໃສ ແລະ ຈັດສັນອາຊີບຄົງທີ່ ໃຫ້ປະຊາຊົນຢ່າງລະອຽດ ເພື່ອກ້າວໄປສູ່ຄອບຄົວພົ້ນທຸກ ເທື່ອລະກ້າວວຽກງານ 3 ສ້າງ ໃຫ້ເອົາໃຈໃສ່ ສະຫຼຸບຕີລາຄາຄືນ ບ່ອນທີ່ເປັນຈຸດສຸມຂອງເມືອງ ເພື່ອເປັນຕົວແບບຂະຫຍາຍໄປສູ່ເຂດອື່ນໆ ເພື່ອສົມທຽບການພັດທະນາ ຂອງບ້ານ ທີ່ເປັນບ້ານ 3 ສ້າງ ແລະ ບ້ານທີ່ບໍ່ແມ່ນບ້ານ 3 ສ້າງ ມີຄວາມແຕກຕ່າງກັນ ໜ້ອຍຫຼາຍປານໃດ? ແລະ ມີຈັກບ້ານທີ່ບໍ່ເປັນຫົວໜ່ວຍພັດທະນາ. ນອກນີ້ ການແບ່ງງານແບ່ງຂັ້ນຄຸ້ມຄອງແບ່ງສິດແບ່ງຄວາມຮັບຜິດຊອບ ລະຫວ່າງ ເມືອງກັບບ້ານ ມີຄວາມເໝາະສົມກັບວຽກງານຕົວຈິງແລ້ວບໍ? ບົນພຶ້ນຖານແນວທາງນະໂຍບາຍ ແລະ ກົດລະບຽບພັກຮັບປະກັນຄວາມເປັນເອກະພາບ ທາງດ້ານການເມືອງແນວຄິດການຈັດຕັ້ງ ແລະ ການກະທຳຂອງພັກພັກປະຊາຊົນປະຕິວັດລາວ ຖືເອົາປະຊາຊົນເປັນກົກຮັບໃຊ້ປະຊາຊົນດ້ວຍຄວາມບໍລິສຸດສັດຊື່, ເຄື່ອນໄຫວຕາມແນວທາງຂອງພັກ ໄປພ້ອມກັບການພັດທະນາຕົນເອງ ບໍ່ຢຸດຢັ້ງ ເພື່ອໃຫ້ທຽບທັນກັບຄວາມຮຽກຮ້ອງຕ້ອງການ ແຫ່ງການນຳພາຂອງພັກ ໃນແຕ່ລະໄລຍະ ເຂົ້າໃນການຈັດຕັ້ງປະຕິບັດ ໃຫ້ໄດ້ຮັບຜົນສຳເລັດ ແລະ ມີປະສິດທິພາບເປັນຢ່າງດີ.

ຈາກນັ້ນ ກໍ່ໄດ້ໄປຢ້ຽມຢາມ ຄອບຄົວຕົວແບບ ການປູກໝາກກະລໍ່າປີ, ໝາກສະເຫີ່ວ ຢູ່ ບ້ານ ຫຼັກຂາວ ແລະ ໂຮງງານຜະລິດເຫຼົ້າໝາກໄມ້ ຢູ່ ເມືອງ ທ່າແຕງຕື່ມອີກ.

ຂ່າວ-ພາບ: ພອນ ບຸນອຸທິດ