ວັນສຸກ, 14 ທັນວາ 2018

ຄະນະປະຈໍາພັກແຂວງ ເຊກອງ ຕ້ອນຮັບຫົວໜ້າກອງບັນຊາການທະຫານແຂວງ ກອນຕູມ #ໂດຍ: ນາລີວັນ

 

         ຕອນບ່າຍ ວັນທີ 9 ຕຸລາ 2018 ທີ່ຫ້ອງປະຊຸມ ຫ້ອງວ່າການ ແຂວງເຊກອງ, ທ່ານ ຖາວອນ ພົມມະໄລລຸນ ຄະນະປະຈໍາພັກແຂວງ ຮອງເຈົ້າແຂວງ ເຊກອງ ສປປ ລາວ ໄດ້ໃຫ້ກຽດ ຕ້ອນຮັບ ການມາຢ້ຽມຢາມ ແລະ ເຮັດວຽກ ຢູ່ແຂວງເຊກອງ ຂອງ ທ່ານ ພ.ອ ຟ້າມຫງັອກຟູ໋ ຫົວໜ້າກອງບັນຊາການ ທະຫານ ແຂວງກອນຕູມ ສສ ຫວຽດນາມ ພ້ອມດ້ວຍຄະນະ.  

 


           ໃນໂອກາດດັ່ງກ່າວ, ທ່ານ ຖາວອນ ພົມມະໄລລຸນ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ການມາຢ້ຽມຢາມ ແລະ ເຄື່ອນໄຫວເຮັດວຽກ ຢູ່ແຂວງເຊກອງ ຂອງ ທ່ານ ພ.ອ ຟ້າມຫງັອກຟູ໋ ພ້ອມຄະນະ ໃນຄັ້ງນີ້ ພ້ອມທັງ ຕີລາຄາສູງ ຕໍ່ການພົວພັນ ຮ່ວມມື ໃນດ້ານຕ່າງໆ ລະຫວ່າງ ລາວ ແລະ ຫວຽດນາມ ເວົ້າລວມ, ເວົ້າສະເພາະ ແມ່ນການຮ່ວມມື ລະຫວ່າງ ແຂວງເຊກອງ ແລະ ແຂວງ ກອນຕູມ ຊຶ່ງເປັນການ ປະ ກອບສ່ວນ ທີ່ສຳຄັນ ເຂົ້າໃນການ ເສີມຂະຫຍາຍ ສາຍພົວພັນ ຮ່ວມມືລະຫວ່າງ ສອງຊາດລາວ-ຫວຽດນາມ, ເຊກອງ-ກອນຕູມ ໃຫ້ນັບມື້ ນັບແໜ້ນແຟ້ນ ຍິ່ງຂຶ້ນ ແລະ ໄດ້ມີ ບາດກ້າວເຕີບໃຫຍ່ ຂະຫຍາຍຕົວ ເປັນກ້າວໆ ແລະສືບຕໍ່ໃນການສະໜັບສະໜູນ, ຊ່ວຍເຫຼືອເຊິ່ງກັນ ແລະກັນຕະຫຼອດໄປ ໂດຍສະ ເພາະແມ່ນ ການພົວພັນຮ່ວມມື ວຽກງານຊາຍແດນ ຂອງສອງແຂວງ ໃຫ້ມີຄວາມສະຫງົບປອດໄພ, ມີຄວາມເປັນລະບຽບຮຽບຮ້ອຍ ແລະ ມີຄວາມຜາສຸກ. ຈາກນັ້ນ ກໍຈະຕ້ອງໄດ້ສືບຕໍ່ ພົວພັນ ຮ່ວມມື ຊ່ວຍເຫຼືອ ເຊິ່ງກັນ ແລະ ກັນ ໃນດ້ານຕ່າງໆ ຕື່ມອີກ ເປັນຕົ້ນ: ດ້ານການສຶກສາ, ສາທາລະນະສຸກ, ການພັດທະນາ ຊັບພະຍາກອນມະນຸດ ລວມທັງການແລກປ່ຽນບົດຮຽນເຊິ່ງກັນ ໃນການຄຸ້ມຄອງພົນລະເມືອງທັງສອງປະເທດ ກໍຄືສອງແຂວງ ໃຫ້ຢູ່ໃນສະພາບປົກກະຕິ ແລະມີຄວາມເປັນລະບຽບຮຽບຮ້ອຍ.

 


          ໂອກາດດຽວກັນ, ທ່ານ ພ.ອ ຟ້າມຫງັອກຟູ້ ກໍໄດ້ກ່າວສະແດງຄວາມຂອບໃຈ ຕໍ່ການຕ້ອນ ຮັບ ຂອງ ທ່ານ ຄະນະປະຈໍາພັກແຂວງເຊກອງ ພ້ອມທັງ ແຈ້ງໃຫ້ຮູ້ກ່ຽວກັບຈຸດປະສົງ ການມາຢ້ຽມຢາມແຂວງເຊກອງ ໃນຄັ້ງນີ້ ຫຼັກໆກໍ ເພື່ອມາແຈ້ງເຊີນ ທ່ານ ເລຂາພັກແຂວງເຊກອງ ພ້ອມຄະນະເພື່ອ ເຂົ້າຮ່ວມກອງປະຊຸມ ຊາຍແດນເຊກອງ-ກອນຕູມຄັ້ງທີ I ທີ່ຈະຈັດຂຶ້ນໃນມໍ່ໆນີ້ ທີ່ແຂວງກອນຕູມ ສສ ຫວຽດນາມ ແລະ ແຈ້ງຜົນສຳເລັດ ຂອງການ ມາເຄື່ອນໄຫວ ຢ້ຽມຢາມ ແລະ ເຮັດວຽກ ຢູ່ ສປປ ລາວ ກໍຄືແຂວງເຊກອງ ໃນຄັ້ງນີ້ ພ້ອມທັງ ຢືນຢັນ ຕໍ່ ທ່ານ ຮອງເຈົ້າແຂວງວ່າ: ຈະສືບຕໍ່ ເສີມຂະຫຍາຍ ສາຍພົວພັນ ມິດຕະພາບ ແລະ ການຮ່ວມມື ຫຼາຍດ້ານ ທັງສອງຝ່າຍ ໃຫ້ເກີດດອກອອກຜົນ ຍິ່ງໆຂຶ້ນ.