ວັນອາທິດ, 19 ສິງຫາ 2018

ສະພາປະຊາຊົນແຂວງເຊກອງເປີດກອງປະຊຸມສະໄໝສາມັນເທື່ອທີ 5

• ຂ່າວ-ພາບ : ສັນຍາ


            (ເຊກອງ,ວັນທີ 02/08/2018) * ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງເຊກອງຊຸດທີ I ໄດ້ໄຂຂຶ້ນຢ່າງເປັນທາງການ ໃນຕອນເຊົ້າມື້ນີ້ (2 ສິງຫາ 2018) ທີ່ສະພາປະຊາຊົນແຂວງເຊກອງ ພາຍໃຕ້ການເປັນປະທານ ຂອງ ທ່ານ ພອນເພັດ ຄິວລະວົງ ປະທານສະພາປະຊາຊົນແຂວງ ໂດຍການເຂົ້າຮ່ວມ ຂອງ ທ່ານ ຄຳເຜີຍ ບຸດດາວຽງ ເຈົ້າແຂວງໆເຊກອງ, ທ່ານ ວິໄລວົງ ບຸດດາຄຳ ປະທານກຳມາທິການ ແຜນການ, ການເງິນ ແລະ ການກວດສອບສະພາແຫ່ງຊາດ, ມີ ທ່ານຮອງເຈົ້າແຂວງ, ຮອງປະທານ ສພຂ, ບັນດາ ສສຊ ແລະ ສສຂ ປະຈຳເຂດເລືອກຕັ້ງ, ອະດີດການນຳຂອງແຂວງ, ຕາງໜ້າອົງການແນວລາວສ້າງຊາດ, ອົງການຈັດຕັ້ງມະຫາຊົນ, ບັນດາພະແນກ, ຫ້ອງການ, ອົງການທຽບເທົ່າ, ລັດວິສາຫະ ກິດພ້ອມດ້ວຍແຂກຖືກເຊີນເຂົ້າຮ່ວມ.

 


     ໃນກອງປະຊຸມ ທ່ານ ພອນເພັດ ຄິວລະວົງ ໄດ້ກ່າວໄຂກອງປະຊຸມວ່າ: ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງເຊກອງຊຸດທີ I ໄຂ້ຂຶ້ນໃນທ່າມກາງບັນຍາກາດ ທີ່ທົ່ວພັກ, ທົ່ວກອງທັບ ແລະປະຊາຊົນລາວທັງຊາດ ໂດຍສະເພາະແຂວງເຊກອງ ສຸມໃສ່ປະຕິບັດມະຕິ X ຂອງພັກ, ມະຕິ IX ຂອງອົງຄະນະພັກແຂວງ ຢ່າງເປັນຂະບວນຟົດຟື້ນ, ເພື່ອ ພິຈາລະນາ ແລະ ຮັບຮອງເອົາບັນດາບັນຫາສຳຄັນ ເພື່ອນຳເອົາແຂວງເຊກອງກ້າວຂຶ້ນຕະຫຼອດ 5 ປີ ກໍຄືໃນປີ 2018 ໃນທ່ວງ ທ່າແຫ່ງການຂະຫຍາຍຕົວ ໂດຍສະເພາະ ແມ່ນການຫັນແຂວງ ເປັນຫົວໜ່ວຍຍຸດທະສາດ, ຫັນເມືອງ ເປັນຫົວໜ່ວຍ ເຂັ້ມແຂວງຮອບດ້ານ ແລະ ສ້າງອົງການນິຕິບັນຍັດຂອງທ້ອງຖິ່ນ ໃນຖານະເປັນຕົວແທນແຫ່ງສິດ ຜົນປະໂຫຍດຂອງປະຊາຊົນ ບັນດາເຜົ່າ, ເຮັດພາລະບົດບາດພິຈາລະນາ, ຮັບຮອງ ແລະກວດກາການຈັດຕັ້ງປະຕິບັດ ລັດຖະທຳມະນູນ ແລະກົດໝາຍ, ກວດກາການປະຕິບັດ ແຜນພັດທະນາ ເສດຖະກິດ-ສັງຄົມ ແລະ ວຽກງານອື່ນໆ ເພື່ອໃຫ້ ສສຊ ປະຈຳເຂດເລືອກຕັ້ງທີ 16 ແລະ ສສຂ ໄດ້ເຮັດໜ້າທີ່ຕາມທີ່ໄດ້ກຳນົດໄວ້ ດ້ວຍຄວາມຮັບຜິດຊອບສູງ.
        ທ່ານຍັງໄດ້ຮຽກຮ້ອງໃຫ້ບັນດາ ທ່ານ ສສຊ ແລະ ສສຂ ຈົ່ງໄດ້ຍົກສູງ ຄວາມຮັບຜິດຊອບໜ້າທີ່ການເມືອງ ຂອງຕົນສຸມ ທຸກສະຕິປັນຍາ ເຂົ້າໃນການປະກອບຄຳເຫັນ ຕໍ່ບັນຫາເນື້ອໃນ ທີ່ນຳມາພິຈາລະນາ ແລະຮັບຮອງ ໃນກອງປະຊຸມ ຄັ້ງນີ້ຢ່າງມີຈຸດສຸມ, ມີເຫັດມີຜົນ ແລະ ຮັບປະກັນຄວາມຖືກຕ້ອງ ສອດຄ່ອງກັບແນວທາງນະໂຍບາຍຂອງ ພັກ-ລັດ ແລະ ກົດໝາຍ ກໍຄືສະພາບ ຄວາມເປັນຈິງ ໃນການພັດທະນາ ເສດຖະກິດ-ສັງຄົມ ແລະ ການເຊື່ອມໂຍງກັບສາກົນ ໃນໄລຍະ ໃໝ່ຂອງແຂວງເຊກອງ.
       ກອງປະຊຸມຄັ້ງນີ້ ຈະໄດ້ຮັບຟັງ, ພິຈາລະນາ ແລະ ຮັບຮອງເອົາການສະເໜີແຕ່ງຕັ້ງ ປະທານສານປະຊາຊົນເຂດ I; ຮັບຟັງບົດລາຍງານ ຂອງ ທ່ານເຈົ້າແຂວງ ແລະ ຂະແໜງການ ກ່ຽວກັບການພັດທະນາ ເສດຖະກິດ-ສັງຄົມ, ແຜນງົບປະມານ ແຫ່ງລັດຂອງແຂວງປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2018; ຮັບຟັງບົດລາຍງານ ຂອງຄະນະປະຈຳ ສະພາປະຊາຊົນແຂວງ ກ່ຽວກັບການປະຕິບັດວຽກງານ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2018; ຮັບຟັງບົດລາຍງານຂອງອົງການໄອຍະການ ປະຊາຊົນແຂວງ ແລະ ກອງບັນຊາການ ປກສ ແຂວງກ່ຽວກັບ ຂະບວນການສືບສວນ-ສອບສວນ, ຄຳສັ່ງກັກຕົວ, ຈັບຕົວ, ກັກຂັງພາງ, ປ່ອຍຕົວພາງ, ການສັ່ງຟ້ອງ ຜູ້ຖືກຫາ ໃນຄະດີອາຍາຂຶ້ນສານ ແລະ ຮັບຟັງບົດລາຍງານ ກ່ຽວກັບປະກົດການຫຍໍ້ທໍ້ໃນສັງຄົມ ເປັນຕົ້ນບັນຫາອຸບັດຕິເຫດ ແລະ ບັນຫາຢາເສບຕິດ ທັງນີ້ແນໃສ່ໃຫ້ສັງຄົມ ມີຄວາມສະຫງົບ ໂດຍພື້ນ ຖານ.
ລະຫັດຮູບ: 353, 354