ວັນສຸກ, 14 ທັນວາ 2018

ການນຳແຂວງເຊກອງ ອວຍພອນການນໍາ 3 ແຂວງ ສສ ຫວຽດນາມ

     ໃນລະຫວ່າງ ວັນທີ 3-5 ກຸມພາ 2016 ນີ້ ທ່ານ ດຣ ຄຳພຽມ ບົວລະພາ ຮອງເລຂາພັກແຂວງເຊກອງ ພ້ອມຄະນະ ໄດ້ເຄື່ອນໃຫວ ອວຍພອນການນໍາ 3 ແຂວງ ພາກກາງ ແຫ່ງ ສສ ຫວຽດນາມ ຊຶ່ງເລີ່ມຈາກ ແຂວງກອນຕູມ, ກວາງນາມ ແລະ ແຂວງ ເທື່ອທຽນເຫວ້ ໂດຍການຕ້ອນຮັບຂອງທ່ານ ນາງ ອີເໝີຍ ຮອງເລຂາພັກແຂວງກອນຕູມ ຜູ້ປະຈຳການ, ພ້ອມຄະນະ, ມີທ່ານ ຟາມຫວຽດເກືອງ ກຳມະການສູນກາງພັກກອມມູນິດຫວຽດນາມ, ຮອງເລຂາຄະນະພັກກວາງນາມ, ຜູ້ປະຈຳການພັກແຂວງ ພ້ອມຄະນະ, ມີທ່ານ ເລເຈືອງລິວ ກຳມະການສູນກາງພັກກອມມູນິດຫວຽດນາມ, ຮອງເລຂາຄະນະພັກແຂວງ ເທື່ອທຽນເຫວ້, ຜູ້ປະຈຳການພັກແຂວງ ພ້ອມຄະນະ.

     ການເຄື່ອນໄຫວ ອວຍພອນການນຳ 3 ແຂວງພາກກາງຂອງ ສສ ຫວຽດນາມ ຂອງຄະນະນຳແຂວງເຊກອງຄັ້ງນີ້ ແມ່ນໄດ້ນຳເອົາ ກະຕ່າດອກໄມ້ ເຂົ້າອວຍພອນການນຳ ແຂວງກອນຕູມ, ກວາງນາມ ແລະ ແຂວງເທື່ອທຽນເຫວ້ ເນື່ອງໃນໂອກາດທີ່ຄະນະນຳ ປະເທດຫວຽດນາມ ກໍຄືປະຊາຊົນໃນ ທົ່ວປະເທດ ພວມເບີກບານມວນຊື່ນ ສະເຫຼີມສະຫຼອງ ວັນສ້າງຕັ້ງພັກກອມມູນິດ ຫວຽດນາມ ວັນທີ 3 ກຸມພາ 1930-3 ກຸມພາ 2016 ຄົບຮອບ 86 ປີ ແລະ ສະເຫຼີມສະຫຼອງບຸນປີໃໝ່ ຂອງຊາວຫວຽດນາມ ທີ່ຈະມາເຖິງຊຶ່ງກົງກັບວັນທີ 8 ກຸມພາ 2016 ເປັນວັນຂຶ້ນປີໃໝ່, ພ້ອມທັງຊົມເຊີຍ ຜົນສຳເລັດ ກອງປະຊຸມໃຫຍ່ຄັ້ງທີ 12 ຂອງສູນກາງພັກ ກອມມູນິດຫວຽດນາມ, ເຊິ່ງໄດ້ປ່ອນບັດຄັດເລືອກ ເອົາ ຄະນະບໍລິຫານງານສຸນກາງພັກກອມມູນິດ ຫວຽດນາມຈຳນວນ 180 ສະຫາຍ, ສຳຮອງ 20 ສະຫາຍ, ກົມການເມືອງສູນກາງພັກ 19 ສະຫາຍ, ນອກນີ້ກໍເພື່ອເປັນການຮັດແໜ້ນ ຄວາມສາມັກຄີແບບພິເສດ ລະຫວ່າງສອງຊາດລາວ-ຫວຽດນາມ, ທີ່ມີມູນເຊື້ອຕໍ່ສູ້ກູ້ຊາດ ຕີສັດຕູໂຕດຽວກັນ, ເວົ້າລວມ, ເວົ້າສະເພາະແມ່ນ 3 ແຂວງພາກກາງຂອງ ສສ ຫວຽນາມ ທີ່ມີຊາຍແດນ ຕິດຈອດກັບແຂວງເຊກອງ, ຊຶ່ງໃນໄລຍະຜ່ານມາ ແຂວງເຊກອງ ແລະ 3 ແຂວງຂອງ ສສ ຫວຽດນາມ ໄດ້ສືບຕໍ່ ພົວພັນຮ່ວມມື ຢ່າງໃກ້ຊິດຕິດແທດ ໃນການ ພັດທະນາເສດຖະກິດ-ສັງຄົມ  ເຄື່ອນໄຫວໄປ-ມາ ພົບປະແລກປ່ຽນ ຖອດຖອນບົດຮຽນ ແລະ ຊ່ວຍ ເຫຼືອເຊິ່ງກັນຢ່າງມີຜົນສຳເລັດ.
ຂ່າວ: ທິດສາຄອນ ວົງມະນີ,ໂທ: 020 5550 3434.