ວັນສຸກ, 18 ມັງກອນ 2019

ທລຍ ທຸ້ມງົບກວ່າ 10 ຕື້ກີບ ປະຕິບັດ 41 ໂຄງການ ແກ້ທຸກຍາກຢູ່ເຊກອງ #ໂດຍ: ນາລີວັນ

 

 

       (ເຊກອງ,ວັນທີ 24/12/2018) * ການຈັດຕັ້ງປະຕິບັດ ໂຄງການຍ່ອຍ ຂອງກອງທຶນ ຫຼຸດຜ່ອນຄວາມທຸກຍາກ (ທລຍ) ແຂວງເຊກອງ ໃນຮອບວຽນທີ 14 ແລະ 15 ປະຈຳປີ 2017-2018 ໃນ 3 ເມືອງຄື: ເມືອງລະມາມ, ກະລຶມ ແລະ ເມືອງດາກຈຶງ ລວມທັງໝົດ 41 ໂຄງການ ມູນຄ່າກວ່າ 10 ຕື້ກີບ, ໃນນີ້ມີທຶນຊຸມຊົນ ປະກອບສ່ວນ 650 ລ້ານກວ່າກີບ.
    ວັນທີ 24 ທັນວາ 2018 ນີ້ ທລຍ ແຂວງເຊກອງ ໄດ້ຈັດຕັ້ງກອງປະຊຸມ ສະຫຼຸບຜົນການຈັດຕັ້ງປະຕິບັດ ວຽກງານກອງທຶນ ຫຼຸດຜ່ອນຄວາມທຸກຍາກ ໄລຍະທີ 3 ຮອບວຽນທີ 14, 15 ປະຈຳປີ 2017-2018 ແລະວາງທິດທາງແຜນການຮອບວຽນທີ 16 ປະຈຳປີ 2019 ໂດຍພາຍໃຕ້ການເປັນປະທານຂອງ ທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງ ຜູ້ຊີ້ນໍາວຽກງານເສດຖະກິດຂັ້ນແຂວງ, ພ້ອມນີ້ ກໍມີບັນດາຜູ້ຕາງໜ້າ ພະແນກການ, ຫ້ອງການກ່ຽວຂ້ອງ ຂັ້ນແຂວງ-ເມືອງ, ເລຂາຄະນະພັກ ຮາກຖານ ກຸ່ມບ້ານ ແລະນາຍບ້ານເຂົ້າຮ່ວມ.
   ໃນວາລະ ກອງປະຊຸມ ທ່ານ ພົມມາ ວໍລະສິງ ຫົວໜ້າຜູ້ປະສານງານ ໂຄງການກອງທຶນ ຫຼຸດຜ່ອນຄວາມທຸກຍາກ ປະຈຳແຂວງເຊກອງ ໄດ້ລາຍງານໃຫ້ຮູ້ວ່າ: ກອງທຶນຫຼຸດຜ່ອນ ຄວາມທຸກຍາກ ຫຼື (ທລຍ) ໄດ້ປະກອບສ່ວນ ສຳຄັນເຂົ້າໃນການ ຈັດຕັ້ງປະຕິບັດ ວຽກງານ ການແກ້ໄຂ ຄວາມທຸກຍາກ ຂອງປະຊາຊົນ ບັນດາເຜົ່າ ໃນທົ່ວປະເທດ  ກໍຄື ແຂວງເຊກອງ ຊຶ່ງໃນຮອບວຽນທີ 14, 15 ປະຈຳປີ 2017-2018 ກໍ່ໄດ້ສຸມທຶນຮອນ ເຂົ້າໃນການປະຕິບັດ ກິດຈະກຳຕ່າງໆ ຂອງໂຄງການ ລວມມູນຄ່າ ຫຼາຍກວ່າ 10 ຕື້ກີບ ທັງນີ້ ກໍເພື່ອ ແນໃສ່ຍົກລະດັບ ແລະ ແກ້ໄຂຊີວິດ ການເປັນຢູ່ ຂອງປະຊາຊົນ ບັນດາເຜົ່າຢູ່ 3 ເມືອງ ທຸກຍາກ ຂອງແຂວງເຊກອງ ໃຫ້ນັບມື້ດີຂຶ້ນ ເປັນກ້າວໆ.

 


      ການຈັດຕັ້ງ ປະຕິບັດວຽກງານ ທລຍ ໄລຍະທີ 3 ເຊິ່ງເລີ່ມແຕ່ ຮອບວຽນທີ 14 ແລະ ຮອບວຽນທີ 15 ປະຈຳປີ 2017-2018 ລວມມີທັງໝົດ 41 ໂຄງການ ລວມມູນຄ່າຫຼາຍກວ່າ 10,656 ຕື້ກີບ ໃນນີ້ ເປັນທຶນຊຸມຊົນ ປະກອບສ່ວນ 650 ລ້ານກວ່າກີບ ໂດຍກວມເອົາ 4 ຂະແໜງການຄື: ຂະແໜງສຶກສາທິການ-ກີລາ 23 ໂຄງການມູນຄ່າ 6 ຕື້ກວ່າກີບ, ຮອງມາຂະແໜງສາທາລະນະສຸກ 11 ໂຄງການມູນຄ່າ 1,5 ຕື້ ກວ່າກີບ, ຂະແໜງກະສິກຳ-ປ່າໄມ້ 5 ໂຄງການ 1,4 ຕື້ກວ່າກີບ ແລະ ຂະແໜງໂຍທາທິການ-ຂົນສົ່ງ 2 ໂຄງການມູນຄ່າ 600 ລ້ານກວ່າກີບ.
    ສ່ວນທິດທາງ ແຜນການໃນຕໍ່ໜ້າ ທ່ານ ພົມມາ ວໍລະສິງ ຫົວໜ້າຜູ້ປະສານງານໂຄງການ ທລຍ ແຂວງເຊກອງ ໃຫ້ຮູ້ວ່າ: ໃນຮອບວຽນທີ 16 ປະຈຳປີ 2019 ທລຍ ຍັງໄດ້ສືບຕໍ່ ຈັດຕັ້ງປະຕິບັດ ບັນດາກິດຈະກຳ ໂດຍສະເພາະ ແມ່ນໂຄງການຍ່ອຍ ທີ່ຖືກຮັບຮອງແລ້ວ ມີທັງໝົດ 46 ໂຄງການ, ໃນນີ້ເມືອງລະມາມມີ 11 ໂຄງການ, ກະລຶມ 19 ໂຄງການ, ດາກຈຶງ 16 ໂຄງການ ຊຶ່ງນອນໃນຂະແໜງສຶກສາທິການ-ກີລາ 22 ໂຄງການ, ຂະແໜງສາທາລະນະສຸກ 18 ໂຄງການ, ຂະແໜງກະສິກຳ-ປ່າໄມ້ 2 ໂຄງການ ແລະ ຂະແໜງໂຍທາທິການ ແລະຂົນສົ່ງ 4 ໂຄງການ.