ວັນຈັນ, 19 ພະຈິກ 2018

ຮອງເຈົ້າແຂວງ ລົງກວດກາຄວາມເສຍຫາຍ ຕາມຂອບເຂດ ເທດສະບານ ເມືອງກະລຶມ

 

  ໃນວັນທີ 23 ສິງຫານີ້  ທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ ພ້ອມດ້ວຍຄະນະ ໄດ້ລົງເຄື່ອນໄຫວ ຕິດຕາມ ກວດກາ ຜົນເສຍຈາກໄພນ້ຳຖ້ວມ ຢູ່ບ້ານວັກໃຕ້ ແລະ ບ້ານວັກເໜືອ ເມືອງກະລຶມ ແຂວງເຊກອງ ໂດຍມີ ທ່ານ ອໍບົວລາ ອ່ອນມະໄລວົງ ຮອງເລຂາພັກເມືອງກະລຶມ ພ້ອມດ້ວຍ ຂະແໜງການທີ່ກ່ຽວ ຂ້ອງເຂົ້າຮ່ວມ.

ໃນການລົງກວດກາ ຜົນເສຍຫາຍ ຈາກໄພນໍ້າຖວ້ມ ຂອງ ທ່ານຮອງເຈົ້າແຂວງ ພ້ອມຄະນະ ໃນຄັ້ງນີ້ ໄດ້ໄປເບິ່ງ ຈຸດເຂດນ້ຳຖ້ວມ ຂອງບ້ານວັກໃຕ້ ທີ່ເຫັນວ່າ ໄດ້ຮັບຜົນເສຍຫາຍ ຢ່າງຫຼວງຫຼາຍ, ກວດກາເຂດບ້ານ ຈັດສັນ ຢູ່ຊົ່ວຄາວ, ເບິ່ງອາຄານ ໂຮງຮຽນ ບ້ານວັກເໜືອ, ກວດກາເຂດ ການກໍສ້າງ ຈັດສັນຍົກຍ້າຍ ບ້ານວັກເໜືອ, ບ້ານວັກໃຕ້, ເບິ່ງສະຖານທີ່ຕັ້ງອາຄານ ໂຮງຮຽນບ້ານວັກເໜືອ ຊົ່ວຄາວ ແລະ ໄດ້ເຄື່ອນໄຫວ ກວດກາ ເຂດອ່າງນ້ຳປະປາ ທີ່ຖຶກຜົນກະທົບ ຈາກດິນເຈື່ອນ ຖົມຫົວງານ ຕາມປ່ອງນ້ຳເຂົ້າອ່າງນ້ຳ.


     ທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ ໄດ້ຖືເອົາໂອກາດນີ້ ພົບປະໂອ້ລົມອຳນາດການປົກຄອງເມືອງ ແລະ ແຂວງ  ເຊີ່ງທ່ານໄດ້ເນັ້ນ ໃຫ້ຂະແໜງການ ທີ່ກ່ຽວຂ້ອງ ພ້ອມກັນເອົາໃຈໃສ່ ເປັນເຈົ້າການ ປະສານສົມທົບກັນຢ່າງລະອຽດ ເພື່ອຟື້ນຟູຂອບເຂດ ທີ່ໄດ້ຮັບຄວາມເສຍຫາຍ ຢ່າງຮີບດ່ວນ ໂດຍສະເພາະ ແມ່ນວຽກງານສາທາລະນະສຸກ ຕ້ອງລົງສຳຫຼວດ ຊອກຫາແຫຼ່ງນ້ຳ ທີ່ເໝາະສົມ ແກ່ການກໍ່ສ້າງນ້ຳລິນ ໃນຂອບເຂດຈັດສັນ ຍົກຍ້າຍບ້ານດັ່ງກ່າວ ພ້ອມທັງເອົາໃຈໃສ່ ໂຄສະນາເຜິຍແຜ່ ການປ້ອງກັນ ພະຍາດຕ່າງໆ ທີ່ມັກເກີດໃນລະດູນີ້ ໃຫ້ປະຊາຊົນຮັບຮູ້ ຢ່າງທົ່ວເຖິງ, ດ້ານວຽກງານການສຶກສາ ແມ່ນໃຫ້ຮີບຮ້ອນ ປັບປຸງ ກໍ່ສ້າງອາຄານໂຮງຮຽນ ຊົ່ວຄາວໃຫ້ທ່ວງທັນ ສົກຮຽນໃໝ່ 2018-2019 ນີ້, ວຽກງານໂຍທາ ແລະ ວຽກງານກະສິກຳ ຕ້ອງເອົາໃຈໃສ ເປັນເຈົ້າການຕິດຕາມ ກວດກາ ການກໍ່ສ້າງປົວແປງ ເຂດທີ່ໄດ້ຮັບຜົນກະທົບ ແລະ ເຂດຈັດສັນ ຍົກຍ້າຍ ບ້ານທີ່ມີຄວາມສ່ຽງ ໃປຢູ່ຕາມຈຸດທີ່ລັດຖະບານ ກຳນົດໄວ້ ເປັນຕົ້ນ ແມ່ນການກໍ່ສ້າງ, ຈັດສັນ, ຍົກຍ້າຍ ບ້ານວັກເໜືອ, ບ້ານວັກໃຕ້, ການສ້ອມແປງເສັ້ນທາງ ແຕ່ເມືອງ ຫາ ແຂວງ ແລະ ກະກຽມອຸປະກອນ, ພາຫະນະທີ່ຈຳເປັນ ເພື່ອຮັບມື ກັບໄພທຳມະຊາດ ທີ່ອາດຈະເກີດຂຶ້ນ ໃໝ່ໄດ້ຢ່າງ ທັນການ.