ວັນຈັນ, 20 ສິງຫາ 2018

ເຊກອງ ຫວນຄືນມູນເຊື້ອ ວັນສ້າງຕັ້ງ ຊປປ ລາວ ຄົບຮອບ 63 ປີ

 

                          

        ພິທີປາຖະກະຖາຫວນຄືນມູນເຊື້ອ ວັນສ້າງຕັ້ງ ຊາວໜຸ່ມປະຊາຊົນປະຕິວັດລາວ (ຊປປ ລາວ) ຄົບຮອບ 63 ປີ ໄດ້ຈັດຂຶ້ນໃນຕອນບ່າຍວັນທີ 4 ເມສາ ນີ້ ທີ່ສະໂມສອນໃຫຍ່ຂອງແຂວງ ໂດຍການເປັນປະທານ ຂອງທ່ານຄໍາພຽມ ບົວລະພາ ຮອງເລຂາພັກ​ແຂວງຜູ້ຊີ້ນຳວຽກງານຂົງເຂດພັກພະນັກງານ, ມີຄະນະບໍລິຫານງານ ຊປປ ລາວ ແຂວງເຊກອງ, ມີຄະນະບໍລິຫານງານຊາວໜຸ່ມຮາກຖານ, ຄະນະໜ່ວຍຮາກຖານ ແລະສະມາຊິກຊາວໜຸ່ມຈາກພະແນກການ, ກົມກອງອ້ອມຂ້າງແຂວງເຂົ້າຮ່ວມ.

        ທ່ານ ຄໍາພຽມ ບົວລະພາ ຮອງເລຂະພັກແຂວງ ໄດ້ເປັນກຽດ ເລົ່າຄືນປະຫວັດຄວາມເປັນມາ ວັນສ້າງຕັ້ງ ຊຊປ ລາວ ເຊິ່ງໃຫ້ກ່າວວ່າຊາວໜຸ່ມໄດ້ປະກອບສ່ວນທີ່ສໍາຄັນເຂົ້າໃນຂະບວນການປະຕິວັດຊາດປະຊາທິປະໄຕເຊິ່ງມີຫຼາຍຮຸ່ນຫຼາຍໄລຍະ, ຊາວໜຸ່ມຮຸ່ນທໍາອິດ ເປັນຮຸ່ນບຸກເບີກເສັ້ນທາງຕໍ່ສູ້ປະຕິວັດ ພາຍໃຕ້ແສງສະຫວ່າງຂອງພັກ ກອມມູນິດອິນດູຈີນ ຂະບວນການຕໍ່ຂອງຊາວໜຸ່ມ ໄດ້ລະເບີດຂຶ້ນຕັ້ງແຕ່ເໜືອຮອດໃຕ້ ເປັນຕົ້ນ​​ໃນປີ 1933 ອົງການຊາວຄອມມູນິດ ຢູ່ ໂຮງຮຽນມັດທະຍົມ ປາວີ ( ວຽງຈັນ ) ຊາວໜຸ່ມໂຮງຮຽນການຊ່າງປາກປ່າສັກ ໄດ້ລຸກຂຶ້ນປະທ້ວງ ຈັກກະພັດຍີ່ປຸ່ນ ໄດ້ມາຮຸກຮານເຂົ້າອາຊີຕາເວັນອອກ ໃນໄລຍະດັ່ງກ່າວ ຊາວໜຸ່ມລາວແຕ່ເໜືອຕະຫຼອດໃຕ້ ໄດ້ຫັນປາຍປືນມາຕໍ່ສູ້ກັບຈັກກະພັດຍີ່ປຸ່ນ ເຮັດໃຫ້ຍີ່ປຸ່ນອ່ອນເພຍ ເຮັດໃຫ້ປະຊາຊົນລາວ, ຊາວໜຸ່ມລາວພາຍໃຕ້ການນຳພາ ຂອງພັກຄອມມູນິດອິນດູຈີນ ກໍ່ສາມາດຢຶດອໍານາດມາສູ່ມືປະຊາຊົນລາວ, ປະກາດເປັນປະເທດເອກກະລາດໃນວັນທີ 12 ຕຸລາ 1945 ຊາວໜຸ່ມຮຸ່ນທຳອິດ ສາມາດເຮັດພາລະກິດປະຫວັດສາດ ຂອງຕົນສໍາເລັດ; ນອກຈາກນັ້ນ ຍັງມີຂະບວນການຕໍ່ສູ້ ຂອງຊາວໜຸ່ມຮຸ່ນທີສອງ ທີ່ຈັກກະພັດຝຣັ່ງເຂົ້າມາຮຸກຮານລາວເປັນຄັ້ງທີສອງ ປະຊາຊົນລາວກໍຄືຊາວໜຸ່ມລາວ ທີ່ຢູ່ໃນຕົວເມືອງ ແລະ ຊົນນະບົດ ໄດ້ຖືຄໍາຂວັນທີ່ວ່າ ຍອມຕາຍແຕ່ບໍ່ຍອມເປັນຂ້ອຍຂ້າ ຊາວໜຸ່ມຈໍານວນຫຼາຍໄດ້ອອກຈາກເຮືອນຊານບ້ານຊ່ອງ, ໂຮງຈັກໂຮງງານ ເຂົ້າຮ່ວມແນວລາວອິດສະຫຼະເພື່ອຕໍ່ສູ້ຍາດເອົາເອກະລາດຄືນມາ, ຮຸ່ນທີສາມ ໄລຍະທີ່ຈັກກະພັດຝຣັ່ງເຂົ້າມາຮຸກຮານລາວ ການຕໍ່ສູ້ຂອງກໍາລັງກໍາມະກອນ ໄຟຟ້າລາວ, ການຕໍ່ສູ້ຂອງຊາວໜຸ່ມນັກຮຽນນັກສຶກສາ ແຕ່ເໜືອຮອດໃຕ້ ຊາວໜຸ່ມໄດ້ກາຍເປັນກໍາລັງແຮງທີ່ສໍາຄັນ ຂອງກໍາລັງປະຕິວັດ ໃນການໂຄ່ນລົ້ມລະບອບລ່າເມືອງຂຶ້ນ ແລະ ສັກດີນາ ຍາດເອົາອໍານາດການປົກຄອງ ມາສູ່ກໍາມືຂອງປະຊາຊົນລາວ ສາມາດປະກາດເປັນ ປະເທດສາທາລະນະລັດປະຊາທິປະໄຕປະຊາຊົນລາວ ໃນວັນທີ 2 ທັນວາ 1975 ແລະ ຮຸ່ນທີສີ່ ພາຍຫຼັງທີ່ໄດ້ຮັບການປົດປ່ອຍຢ່າງສົມບູນ, ຄະນະຂົນຂວາຍ ສ້າງຕັ້ງຊາວໜຸ່ມປະຊາຊົນປະຕິວັດລາວ ໄດ້ສືບຕໍ່ ປັບປຸງຍົກສູງຄຸນນະພາບ ຂອງສະມາຊິກຊາວໜຸ່ມ ປຸກລະດົມຊາວໜຸ່ມ ເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບ, ປູກຝັງ, ລ້ຽງສັດ ແລະ ສຶກສາຮໍ່າຮຽນ ໄດ້ເປີດບັ້ນຂໍ້ແຂ່ງຂັນ 3 ສາມັກຄີ 4 ບຸກຂຶ້ນ ເຊິ່ງການຈັດຕັ້ງປະຕິບັດ ຂໍ້ແຂ່ງຂັນດັ່ງກ່າວແມ່ນນັບມື້ເປັນຟົດຟື້ນ, ສະມະຊິກຊາວໜຸ່ມ ໄດ້ອາສາສະໝັກປະຕິບັດໜ້າທີ່ ທັງເວັນທັງຄືນ ໂດຍບໍ່ຮຽກຮ້ອງຄ່າຕອບແທນໃດໆ;

       ມາຮອດປະຈຸບັນ ອົງການຊາວໜຸ່ມ ໄດ້ເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ ໄດ້ກາຍເປັນກໍາລັງປະຈັນບານ ແລະ ສືບທອດທີ່ໄວ້ເນື້ອເຊື່ອໃຈຂອງພັກ ແລະ ຂອງຊາດ, ການປາຖະກະຖາມູນເຊື້ອ ວັນສ້າງຕັ້ງຊາວໜຸ່ມປະຊາຊົນປະຕິວັດລາວ (ຊປປ ລາວ) ຄົບຮອບ 63 ປີ ຄັ້ງນີ້ ແມ່ນໄດ້ເຮັດໃຫ້ສະມາຊິກຊາວໜຸ່ມທຸກຄົນ ຮັບຮູ້ເຖິງມູນເຊື້ອຂອງຊາວໜຸ່ມແຕ່ລະລຸ້ນ ໃນການປະກອບສ່ວນ​ ເຂົ້າໃນຂະບວນການຕໍ່ສູ້ປົດປ່ອຍຊາດ, ການປົກປັກຮັກສາ ແລະ ສ້າງສາພັດທະນາປະເທດຊາດ​ ໃນແຕ່ລະໄລຍະ,​ ເຊິ່ງຊາວໜຸ່ມແມ່ນມີບົດບາດສໍາຄັນເປັນກໍາລັງແຮງຕົ້ນຕໍ ປະກອບສ່ວນ​ທີ່​ສໍາຄັນ​ ເຂົ້າ​ໃນ​ຂະ​ບວນການ​ປະຕິວັດ​ຊາດ ປະຊາທິປະ​ໄຕແລະ ສະມະຊິກຊາວໜຸ່ມຈໍານວນບໍ່ໜ້ອຍ ໄດ້ເສຍສະຫຼະຊີວິດ ເພື່ອປົກປັກຮັກສາເອກະລາດ ແລະ ຜືນແຜ່ນດິນອັນແສນຮັກຂອງຕົນໄວ້; ຍ້ອນແນວນັ້ນ ຊາວໜຸ່ມໄດ້ຂະໜານນາມວ່າ ເປັນແຂນຂວາຂອງພັກ, ເປັນກະດູກສັນຫຼັງຂອງປະເທດຊາດເປັນຜູ້ສືບທອດທີ່ຈົ່ງຮັກພັກດີຂອງປະເທດຊາດ.

                                                                                 ພາບ-ຂ່າວ: ພຸດທະສອນ