ວັນພຸດ, 20 ມິຖຸນາ 2018

ຍທຂ ເຊກອງ ສະຫຼຸບວຽກງານ ປະຈໍາປີ 2017

           ກອງປະຊຸມສະຫຼຸບ ວຽກງານໂຍທາທິການ ແລະ ຂົນສົ່ງ ແຂວງເຊກອງ (ຍທຂປະຈຳປີ 2017 ແລະ ວາງທິດທາງແຜນການ ປີ 2018 ໄດ້ໄຂຂຶ້ນໃນວັນທີ 29 ມີນານີ້ ໂດຍການເຂົ້າຮ່ວມຂອງທ່ານ ສີດາສຸວັນນະສາຍ ຮອງເລຂາພັກແຂວງຮອງເຈົ້າແຂວງເຊກອງທ່ານສຸດສະນະ ສີຫາວົງ ກຳມະການພັກແຂວງເລຂາຄະນະພັກຮາກຖານຫົວໜ້າພະແນກ ຍທຂ ເຊກອງ ພ້ອມດ້ວຍຄະນະພັກ, ຄະນະພະແນກ ຕະຫຼອດຮອດສະມາຊິກພັກ, ພະນັກງານລັດຖະກອນ ພາຍໃນພະແນກ ແລະ ມີເຈົ້າເມືອງ ຫຼື ຮອງເຈົ້າເມືອງ ເມືອງ ແລະ ແຂກຖືກເຊີນ ຈາກພະແນກການອ້ອມຂ້າງແຂວງ ເຂົ້າຮ່ວມ.

        ທ່ານ ບຸນທະວີ ນະຄອນສິດ ຮອງຫົວໜ້າພະແນກ ຍທຂ ເຊກອງ ໄດ້ສະຫຼຸບຄືນ ການຈັດຕັ້ງປະຕິບັດວຽກງານ ຍທຂ ປະຈໍາປີ 2017 ເຊິ່ງທ່ານ ໄດ້ລາຍງານວ່າ: ຜ່ານການຈັດຕັ້ງປະຕິບັດໜ້າທີ່ວຽກງານ ໃນສົກປີຜ່ານມາ ຄະນະພັກ, ຄະນະພະແນກພວກເຮົາ ໄດ້ເອົາໃຈໃສ່ຊີ້ນຳ-ນຳພາ ວຽກງານຢ່າງໃກ້ຊິດຕິດແທດ ແລະ ພະນັກງານລັດຖະກອນທຸກຄົນ ກໍໄດ້ເອົາໃຈໃສ່ ປະຕິບັດໜ້າທີ່ວຽກງານ ດ້ວຍຄວາມຈູບຈ້າວຫ້າວຫັນ ເຮັດໃຫ້ວຽກງານ ດ້ານວິຊາສະເພາະ ໄດ້ຮັບຜົນສຳເລັດເປັນທີ່ໜ້າເພິ່ງພໍໃຈ ເຊິ່ງ ທົ່ວແຂວງເຊກອງ ມີເສັ້່ນທາງທັງໝົດ 250 ເສັ້ນ, ມີລວງຍາວ 2.028,7 ກິໂລແມັດ (ກມ) ທຽບໃສ່ປີ 2016 ເຫັນວ່າຈຳນວນເສັ້ນທາງຍັງເທົ່າເດີມ, ໃນນັ້ນມີເສັ້ນທາງປູອັດສະຟານ 1,79 ກມ, ທາງປູຢາງ 241,01 ກມ, ທາງປູແຮ່ (ດິນແດງ) 796,60 ກມ, ທາງດິນທຳມະຊາດ 992,34 ກມ ແລະ ໄດ້ຈັດແບ່ງເສັ້ນທາງອອກເປັນ 6 ປະເພດເພດຄື: ທາງຫຼວງແຫ່ງຊາດມີ 4 ເສັ້ນ, ຍາວ 206,93 ກມ,ທາງຫຼວງຂອງແຂວງ 2 ເສັ້ນ,ຍາວ 310,70 ກມ, ທາງຫຼວງເມືອງ 12 ເສັ້ນ, ຍາວ 262,01 ກມ, ທາງເທສະບານ 139 ເສັ້ນ, ຍາວ 77,36 ກມ, ທາງຊົນນະບົດ 76 ເສັ້ນ, ຍາວ 1.062,66 ກມ, ທາງສະເພາະ 17 ເສັ້ນ, ຍາວ 109,10 ກມ; ມີຂົວທັງໝົດ 29 ແຫ່ງ, ຍາວ 1.349,04 ແມັດຍາວ, ໃນນັ້ນຂົວເບຕົງ 16 ແຫ່ງ, ຍາວ 9967 ແມັດ, ຂົວເບເລ 10 ແຫ່ງ, ຍາວ 288,04 ແມັດ,ຂົວປະສົມ 1 ແຫ່ງ, ຍາວ 25 ແມັດ, ຂົວໄມ້ 2 ແຫ່ງ, ຍາວ 39 ແມັດ; ບ້ານທີ່ມີເສັ້ນທາງເຂົ້າເຖິງ 195 ບ້ານ, ກວມເອົາ 98, ບ້ານບໍ່ມີເສັ້ນທາງເຂົ້າເຖິງ 2 ບ້ານ, ກວມເອົາ 1%,ບ້ານມີເສັ້ນທາງເຂົ້າເຖິງ ທຽວໄດ້ລະດູດຽວ 95 ບ້ານ, ກວມ 48% ແລະ ສາມາດທຽວໄດ້ສອງລະດູ 100 ບ້ານ, ກວມ 51%(ຈໍານວນບ້ານທັງໝົດທົ່ວແຂວງ 197 ບ້ານ).

          ມາຮອດປະຈຸບັນ, ອັດຕາການປົກຄຸມຄວາມໜາແໜ້ນ ສະເລ່ຍ ຕໍ່ພື້ນທີ່ໃນທົ່ວແຂວງ ແມ່ນ 26,4ກມ/100 ກິໂລຕາແມັດ ແລະ ໃນປີ 2020 ອັດຕາພື້ນທີ່ການປົກຄຸມຄວາມໜາແໜ້ນ ສະເລ່ຍຕໍ່ພື້ນທີ່ ໃນທົ່ວແຂວງ ຈະເພີ່ມຂຶ້ນເປັນ 34,5 ກມ/100 ກມ2, ລະບົບການຄຸ້ມຄອງເຄຫາ-ຜັງເມືອງ ໄດ້ຈັດຕັ້ງປະຕິບັດ ການສໍາຫຼວດ-ອອກແບບ ແລະ ໄດ້ຜ່ານການຮັບຮອງເອົາຜັງຊີ້ນໍາລວມແລ້ວ ທັງ 4 ເມືອງ, ລວມມີເນື້ອທີ່ 10.065 ເຮັກຕາ, ໃນນັ້ນມີ 1 ເມືອງພວມດໍາເນີນການຈັດຕັ້ງປະຕິບັດ ຕັດຕາຜ້າຜັງເມືອງຢູ່ໃນປະຈຸບັນຄື: ເມືອງດາກຈຶງ; ລະບົບການໍາຊົມໃຊ້ນໍ້າປະປາ ປະຊາຊົນໄດ້ຮັບການຊົມໃຊ້ນໍ້າສະອາດ ທັງໝົດ 39.253 ຄົນ, ໃນຈໍານວນ 6.608 ຄົວເຮືອນ, ເທົ່າກັບ 33% ກວມເອົາ 36 ບ້ານຂອງປະຊາກອນທົ່ວແຂວງ; ການຄຸ້ມຄອງການຂົນສົ່ງ ກໍໄດ້ເປີດບໍລິການສາຍທາງ ແລ່ນລົດໄດ້ທັງໝົດ 8 ສາຍທາງ ໃນນັ້ນມີສາຍທາງພາຍໃນປະເທດ 6 ສາຍ, ສາຍທາງຕ່າງປະເທດ 2 ສາຍ ສາມາດ ຕອບສະໜອງດ້ານຂົນສົ່ງສິນຄ້າ 2.818 ໂຕນ, ທຽບໃສ່ ປີ 2016 ຫຼຸດລົງ 25,44, ຂົນສົ່ງໂດຍສານໄດ້ 31.210 ຄົນ, ຫຼຸດລົງ 70,44%; ລະບົບການຄຸ້ມຄອງພາຫະນະ ແລະ ການຂັບຂີ່ ໄດ້ນໍາໃຊ້ເຄື່ອງມືທີ່ທັນສະໄໝ ເຂົ້າມາບໍລິການຮັບໃຊ້ສັງຄົມ ຢ່າງສະດວກສະບາຍ ເປັນຕົ້ນແມ່ນ ໄດ້ນໍາໃຊ້ລະບົບການຄຸ້ມຄອງ ແລະ ຈັດພິມເອກກະສານ ໃບທະບຽນລົດ, ໃບຂັບຂີ່ທຸກປະເພດ ແບບທັນສະໄໝ ທີ່ສາມາດພິມໄດ້ກັບທີ່ ເຮັດໃຫ້ວ່ອງໄວ, ທັນການ ສາມາດເຊື່ອມໂຍງ ແລະ ກວດສອບໄດ້ ໃນຂອບເຂດທົ່ວປະເທດ; ອັນທີ່ພົ້ນເດັ່ນແມ່ນ ໄດ້ປະກາດການປະມູນຄືນໂຄງການກໍ່ສ້າງຂົວເບຕົງ 7 ແຫ່ງ, ຕາມເສັ້ນທາງ 7511 ເຊກອງ-ກະລຶມ, ຜ່ານການປະມູນ ສາມາດປະຢັດງົບປະມານໄດ້ 40,2 ຕື້ກີບ.

ຂ່າວ-ພາບໂດຍ: ພຸດທະສອນ