ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເມືອງທ່າແຕງ ເຊັນບົດບັນທຶກ ໂຄງການພັດທະນາກະສິກໍາຊຸມຊົນໄລຍະທີ II.

   ພິທີເຊັນບົດບັນທຶກ ຄວາມເຂົ້າໃຈ MOU ກ່ຽວກັບໂຄງການ ພັດທະນາກະສິກໍາຊຸມຊົນ ໄລຍະທີ II ໄດ້ມີຂື້ນວັນທີ 11 ມັງກອນ 2017 ນີ້ ຢູ່ທີ່ສະໂມສອນເມືອງ ທ່າແຕງ ແຂວງ ເຊກອງ, ໂດຍການເປັນປະທານຂອງທ່ານ ສົມເພັດ ເອິດລັດດາ ຮອງເຈົ້າເມືອງ ທ່າແຕງ ຜູ້ຊີ້ນໍາຂົງເຂດເສດຖະກິດ, ເປັນກຽດເຂົ້າຮ່ວມຂອງທ່ານ ສູນທອນ ພິມມະວົງສາ ຮອງຫົວໜ້າ ພະແນກກະສິກໍາ ແລະ ປ່າໄມ້ ແຂວງເຊກອງ, ມີຂະແໜ່ງການກ່ຽວຂ້ອງຂັ້ນແຂວງ ແລະ ຂັ້ນເມືອງ, ແຂກຖືກເຊີນ ພ້ອມດ້ວຍນາຍບ້ານ 12 ບ້າເປົ້າໝາຍ ເຂົ້າຮ່ວມ.

   ທ່ານ ນາງ ສຸກແກ້ວ ສີສະຫງ່າ ຜູ້ຕາງໜ້າ ໂຄງການພັດທະນາກະສິກໍາຊຸມຊົນ ລາຍງານຄວາມເປັນມາຂອງໂຄງການ ໂດຍກ່າວວ່າ: ເປົ້າໝາຍຫຼັກ ຂອງໂຄງການແມ່ນ ເພື່ອປັບປຸງການຄໍ້າປະກັນ ດ້ານສະບຽງອາຫານ ໃຫ້ມີຄວາມຍືນຍົງ ໃນດ້ານປະລິມານ, ຄວາມປອດໄພ, ການກຸ້ມຕົນເອງ ດ້ານສະບຽງອາຫານໃຫ້ບັນດາ 12 ບ້ານເປົ້າໝາຍ ຂອງເມືອງທ່າແຕງ ເປັນຕົ້ນການກໍານົດຄາດໝາຍ ຕ້ານການຂາດສະບຽງອາຫານຫຼັກ ປະເພດເຂົ້າກິນໃຫ້ຫຼຸດລົງເທື່ອລະກ້າວ, ບັນດາຄອບຄົວ ທີ່ນອນຢູ່ໃນເປົ້າໝາຍຂອງໂຄງການ ຕ້ອງໃຫ້ໄດ້ຈໍາໜ່າຍຜົນຜະລິດຂອງຕົນເຊັ່ນ: ພືດຜັກ, ໝາກໄມ້ໃຫ້ເພີ່ມຂື້ນ 20%,ຈໍານວນເດັກນ້ອຍ ອາຍຸຕໍ່າກວ່າ 6 ເດືອນໃນ 80% ໃຫ້ໄດ້ກິນນົມແມ່ພຽງຢ່າງດຽວ, ອັດຕາສ່ວນຄົວເຮືອນ ໄດ້ກິນໝາກໄມ້ ຫຼື ພືດຜັກຕ່າງໆ ຢ່າງໜ້ອຍ ໜຶ່ງເທື່ອຕໍ່ມື້ ເພີ່ມຂື້ນ 75%, ອັດຕາສ່ວນຂອງຄົວເຮືອນ ໃຫ້ບໍລິໂພກທາດຊີ້ນ ຢ່າງໜ້ອຍ ສອງເທື່ອຕໍ່ອາທິດ ເພີ່ມຂື້ນ75% ແລະ ຊ່ວຍຄູສອນສ້າງທຸກເງື່ອນໄຂ ອໍານວຍຄວາມສະດວກໃຫ້ເດັກ ຮອດເກນອາຍຸເຂົ້າຮຽນເປັນປົກກະຕິ ພ້ອມທັງ ພັດທະນາຫ້ອງອ່ານໜັງສື່ໃນບາງບ້ານ ທີ່ເຫັນວ່າມີຄວາມຈໍາເປັນ ລວມມູນຄ່າລົງທືນ ທັງໝົດ 5,054,94 ໂດລາສະຫະລັດ, ສະໜັບສະໜູນໃຫ້ທືນໂດຍ ອົງການຝຣັ່ງເພື່ອການພັດທະນາ(AFD) ແລະ ອົງການເທຍອົດສະຕາລີ, ມູນນິທິເອກະຊົນແຫ່ງໜຶ່ງ ທີ່ປະທດອົດສະຕາລີ ເຊິ່ງໂຄງການນີ້ ຈະໄດ້ດໍາເນີນເປັນເວລາ 3 ປີແຕ່ວັນທີ 1 ມັງກອນ 2017 ເຖິງວັນທີ 31 ທັນວາ 2019 ຈິ່ງຈະສິ້ນສຸດໂຄງການລົງ.
  ນອກຈາກ ເຊັນບົດບັນທຶກຄວາມເຂົ້າໃຈ MOU ກ່ຽວກັບ ໂຄງການພັດທະນາກະສິກໍາຊຸມຊົນ ໄລຍະທີ II ຢ່າງເປັນທາງການແລ້ວ ທັງສອງຟ່າຍຍັງປຶກສາຫາລືຕື່ມ ກ່ຽວກັບການສະໜັບສະໜູນ ໂຄງການດັ່ງກ່າວໃນຕໍ່ໜ້າ ເປັນຕົ້ນການຮັກສາໝາກຜົນ ທີ່ມີຜົນສໍາເລັດຂອງໂຄງການ, ເພື່ອສືບຕໍ່ຊີ້ນໍາໆພາ ເພື່ອເຮັດໃຫ້ປະຊາຊົນໃນບ້ານເປົ້າໝາຍດັ່ງກ່າວ ໃຫ້ມີຄວາມເຂັ້ມແຂງ ດ້ານສະບຽງອາຫານ, ການຄໍ້າປະກັນ ແລະ ໂພສະນາການໃຫ້ດີຂື້ນກວ່າເກົ່າ ດ້ວຍການສົ່ງເສີມກະສິກໍາ ໃຫ້ມີຄຸນນະພາບ, ສະອາດ, ໝັ້ນຄົງ ແລະ ຍືນຍົງ ໂດຍສ້າງ ຄວາມເຂັ້ມແຂງໃຫ້ແກ່ ຜູ້ມີສ່ວນຮ່ວມໃນທ້ອງຖິ່ນ ເພື່ອຄໍ້າປະກັນຄວາມໝັ້ນຄົງ ດ້ານສະບຽງອາຫານ.
   ໃນພິທີເຊັນສັນຍາຄັ້ງນີ້, ຕາງໜ້າ ໂຄງການພັດທະນາກະສິກໍາຊຸມຊົນ ລົງນາມທ່ານ ໄຊຍະລົງ ສິດທິສັກ ແລະ ຕາງໜ້າກະຊວງກະສິກໍາ ແລະ ປ່າໄມ້ ທ່ານ ສູນທອນ ພິມມະວົງສາ ຮອງຫົວໜ້າ ພະແນກກະສິກໍາ ແລະ ປ່າໄມ້ແຂວງເຊກອງ, ໂດຍມີປະທານ ແລະ ພະນັກງານທັງສອງຝ່າຍ ພ້ອມພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.
                                                                             ຂ່າວພາບໂດຍ: ພອນ ບຸນອຸທິດ