ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ທນບ ເມືອງລະມາມ ປ່ອຍສິນເຊື່ອບັນລຸເກືອບ 50 ຕື້ກີບ

     ໃນປີ 2016 ທະນາຄານນະໂຍບາຍ (ທນບ) ໜ່ວຍບໍລິການເມືອງລະມາມ ປ່ອຍສິນເຊື່ອ ໃນເຂດຈຸດສຸມ ແລະ ບ້ານ 3 ສ້າງເປັນເງິນເກືອບ 50 ຕື້ກີບ ຊຶ່ງໄດ້ປະກອບສ່ວນສຳຄັນ ໃນການພັດທະນາ ເສດຖະກິດ-ສັງຄົມ ຂອງແຂວງ ແລະ ການພັດທະນາ ຊີວິດການເປັນຢູ່ ຂອງປະຊາຊົນ ໃນເຂດຊົນນະບົດ ໃຫ້ຫຼຸດພົ້ນອອກຈາກຄວາມທຸກຍາກ ເທື່ອລະກ້າວ ໂດຍສະເພາະແມ່ນ ປະຊາຊົນທີ່ອາໄສຢູ່ເຂດຈຸດສຸມ ແລະ ບ້ານ 3 ສ້າງ.
    ທ່ານ ແກ້ວປະເສີດ ພົມມະວັນ ຫົວໜ້າ ທະນາຄານນະໂຍບາຍ ໜ່ວຍບໍລິການເມືອງລະມາມ ໃຫ້ຮູ້ວ່າ: ທະນາຄານນະໂຍບາຍ ໜ່ວຍບໍລິການເມືອງລະມາມ ສ້າງຕັ້ງຂຶ້ນ ແລະ ເປີດບໍລິການໃນວັນທີ 17 ສິງຫາ 2016 ເພື່ອປະຕິບັດ ພາລະບົດບາດ ວຽກງານ ທນບ ທົ່ວແຂວງເຊກອງ ແລະ ສະໜອງສິນເຊື່ອ ໃນເຂດຈຸດສຸມ ແລະ ບ້ານ 3 ສ້າງຢູ່ 2 ເມືອງລະມາມ ແລະ ທ່າແຕງ. ໂດຍ ການປ່ອຍສິນເຊື່ອຂອງ ທນບ ໃນ 2016 ນີ້ເປັນຈຳນວນເງິນ 48,08 ຕື້ກີບ, ໃນນີ້ໄດ້ປ່ອຍ ໃນບ້ານສາມສ້າງ 20,1 ຕື້ກີບ ແລະ ປ່ອຍໃນເຂດຈຸດສຸມ 27 ຕື້ກວ່າກີບ ຊຶ່ງເປົ້າໝາຍ ການປ່ອຍສິນເຊື່ອ ໂດຍສ່ວນໃຫຍ່ ແມ່ນເລັ່ງໃສ່ ສົ່ງເສີມການຜະລິດກະສິກຳ (ປູກຝັງ-ລ້ຽງສັດ) ເປັນສິນຄ້າ ອັນໄດ້ເຮັດໃຫ້ຊີວິດການເປັນຢູ່ ຂອງປະຊາຊົນໃນເຂດດັ່ງກ່າວ ດີຂຶ້ນເປັນກ້າວໆ.
    ສຳລັບແຜນການ ແລະ ມາດຕະການປີ 2017 ນີ້ ທ່ານ ແກ້ວປະເສີດ ພົມມະວັນ ກ່າວວ່າ: ຍັງສືບຕໍ່ສຸມໃສ່ ເກັບກູ້ໜີ້ສິນ, ເກັບກຳຂໍ້ມູນ, ສູ້ຊົນສະໜອງສິນເຊື່ອ ໃນເຂດຈຸດສຸມ ແລະ ບ້ານ 3 ສ້າງໃນ 2 ເມືອງໃຫ້ບັນລຸກວ່າ 20 ຕື້ກີບ, ໃນນີ້ຢູ່ເມືອງລະມາມ 9,1 ຕື້ກີບ ແລະ ເມືອງທ່າແຕງ 10,9 ຕື້ກີບ ເພື່ອປະກອບສ່ວນເຂົ້າໃນການ ແກ້ໄຂຄວາມທຸກຍາກ ຂອງປະຊາຊົນຕາມແນວທາງນະໂຍບາຍ ຂອງພັກ ແລະ ລັດວາງອອກ.

                                                                ( ຂ່າວ : ສັນຍາ ແກ້ວໄຊຍະວົງ )