ວັນພຸດ, 23 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເມືອງລະມາມ ໄຂກອງປະຊຸມເປີດກວ້າງຄົບຄະນະບໍລິຫານງານພັກ ຄັ້ງທີ 5 ສະໄໝທີ VIII

   

    ໃນລະຫວ່າງ ວັນທີ 14-16 ທັນວາ 2016 ນີ້ ເມືອງລະມາມ ແຂວງເຊກອງ ໄດ້ໄຂກອງປະຊຸມເປີດກວ້າງ ຄົບຄະນະບໍລິຫານງານ ພັກເມືອງ ຄັ້ງທີ 5 ສະໄໝທີ 8 ຢ່າງເປັນທາງການ ຢູ່ທີ່ສະໂມສອນ ຫ້ອງວ່າການປົກຄອງເມືອງ ພາຍໄຕ້ ການເປັນປະທານຂອງທ່ານ ເຫຼັກໄຫຼ ສີວິໄລ ຄະນະປະຈຳພັກແຂວງ ຮອງເຈົ້າແຂວງເຊກອງ ຜູ່ຊີ້ນຳ ຂົງເຂດວຽກງານເສດຖະກິດ, ທ່ານ ປອ ແພງສີ ສີລາວີ ກຳມະການພັກແຂວງ ເລຂາພັກເມືອງ ເຈົ້າເມືອງລະມາມ ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຮອງຫ້ອງການ ຕະຫຼອດຮອດ ຄະນະພັກຮາກຖານ, ອຳນາດການປົກຄອງບ້ານເຂົ້າຮ່ວມ ຢ່າງພ້ອມພຽງ.
   ກອງປະຊຸມດັ່ງກ່າວ ໄດ້ຮັບຟັງ ການສະຫຼຸບຕີລາຄາ ຊີ້ນໍາ-ນໍາພາຮອບດ້ານ ຂອງຄະນະບໍລິຫານງານ ພັກເມືອງ ໃນ 6 ເດືອນຕົ້ນປີ ແລະ ວາງທິດທາງແຜນການ ຊີ້ນຳ ນໍາພາຮອບດ້ານ 6 ເດືອນຂອງສົກປີ 2016-2017 ຈາກທ່ານ ໄຊຍະຫວັດ ກ້ອນຄຳໝັັັ້ນ ຄະນະປະຈຳພັກ ຮອງເລຂາພັກ ເມືອງລະມາມ ເຊິ່ງ ທ່ານໄດ້ກ່າວວ່າ: ທົ່ວເມືອງລະມາມ ມີສະຖຽນລະພາບ ທາງດ້ານການເມືອງ ໜັກແໜ້ນ, ສັງຄົມມີຄວາມສະຫງົບ ໂດຍພື້ນຖານ ເຊີ່ງເຫັນໄດ້ຢ່າງຈະແຈ້ງຄື: ສາມາດສ້າງບ້ານ ປ້ອງກັນຄວາມສະຫງົບດີ ໄດ້36 ບ້ານ, ຖອດອາວຸດລ່າເນື້ອໄດ້ 745 ກະບອກ, ປະກາດ ບ້ານພັດທະນາໄດ້ 7 ບ້ານ ມາຮອດປະຈຸບັນ ທົ່ວເມືອງລະມາມ ມີບ້ານພັດທະນາ28 ບ້ານ ເທົ່າກັບ 65,11%, ດ້ານ ແຜນການ-ການລົງທຶນ ໄດ້ເອົາໃຈໃສ່ ເຜີຍແຜ່ ແນະນຳການຈັດຕັ້ງປະຕິບັດ ແຜນພັດທະນາ ເສດຖະກິດສັງຄົມ ໃຫ້ຂະແໜງການ ອ້ອມຂ້າງເມືອງ ສົກປີ 2015-2016, ຕິດພັນກັບ ການຈັດຕັ້ງປະຕິບັດ ໂຄງການລົງທຶນ ໃຫ້ມີປະສິດທິພາບ ແລະ ປະສິດທິຜົນ ພ້ອມນີ້ ໄດ້ເອົາໃຈໃສ່ 8 ແຜນງານ, 99 ໂຄງການ ແລະ 112 ໂຄງງການຍ່ອຍ ທີ່ຮັບຮອງ ໃນມະຕິ ກອງປະຊຸມໃຫຍ່ ຄັ້ງທີ 8 ຂອງອົງຄະນະພັກເມືອງ; ດ້ານໂຍທາທິການ ແລະ ຂົນສົ່ງ ໄດ້ເອົາໃຈໃສ່ສືບຕໍ່ ບູລະນະປັບປຸງ ສ້ອມແປງທາງຫຼວງ ເລກທີ16 ຕາມຄວາມຮັບຜິດຊອບ, ຕິດຕາມ ການກໍ່ສ້າງຍົກລະດັບເສັ້ນທາງ ໃນຕົວເມືອງ ແລະ ໂຄງການສຳຫຼວດ ເສັ້ນທາງ ເຂດຊົນນະບົດ, ໄດ້ບຸກເບີກ ຕັດຜັງເມືອງໃໝ່ ເຂດຝາກເຊ ສຳເລັດ ໃນຂັ້ນພື້ນຖານ, ວຽກງານ ອພບຕ ໄດ້ເອົາໃຈໃສ່ ຢ່າງເປັນເຈົ້າການ ກ່ຽວກັບວຽກກຳຈັດຂີ້ເຫຍື່ອ ອອກຈາກເທດສະບານເມືອງ ເພື່ອເຮັດໃຫ້ເມືອງມີສີສັນ ຕິດພັນກັບການ ສ້າງເຂດໃຈກາງຕົວເມືອງ ປາກົດມີສີຂຽວ, ວຽກພະລັງງານ ແລະ ບໍ່ແຮ່ ໄດ້ເອົາໃຈໃສ່ ການຂະຫຍາຍ ຕາຂ່າຍໄຟຟ້າ ນັບແຕ່ຕົວເມືອງ ຮອດຊົນນະບົດ, ເຊິ່ງມາຮອດປັດຈຸບັນ ບ້ານໄດ້ມີໄຟຟ້າໃຊ້ ໃນລະບົບ-ນອກລະບົບ ທັງໝົດ 38 ບ້ານກວມເອົາ 88,37% ໃນນີ້ໃນລະບົບກວມ 79,06%; ຂົງເຂດວັດທະນະທຳ - ສັງຄົມ ຄະນະພັກ ອຳນາດການປົກຄອງເມືອງ ໄດ້ເອົາໃຈໃສ່ ແລະ ຖືສຳຄັນ ໃນການພັດທະນາ ຊັບພະຍາກອນມະນຸດ ໂດຍເລັງໃສ່ ພັດທະນາການສຶກສາ ຕາມ 3 ແຜນງານໃຫຍ່ ຕາມກະຊວງສຶກສາທິການ ແລະ ກິລາໄດ້ວາງອອກ ເຊັ່ນ: ພັດທະນາພຶ້ນຖານໂຄງລ່າງ ຮັບໃຊ້ການສຶກສາ ເປັນຕົ້ນແມ່ນ ການກໍ່ສ້າງ ແລະ ສ້ອມແປງອາຄານຮຽນ, ຂະຫຍາຍຫ້ອງຮຽນ ເພື່ອຮອງຮັບອັດຕາເຂົ້າຮຽນ ທີ່ເພີ່ມຂຶ້ນ. ອັດຕາເຂົ້າຮຽນສຸດທິ ຊັ້ນປະຖົມບັນລຸໄດ້ 98,55%, ອັດຕາເຂົ້າຮຽນ ລວມມັດທະຍົມຕອນຕົ້ນ 108,79% ເພີ່ມຂຶ້ນ 8,36% ແລະ ອັດຕາເຂົ້າຮຽນ ລວມມັດທະຍົມຕອນປາຍ 73,95% ເພີ່ມຂຶ້ນ 7,53% ອັນພົ້ນເດັ່ນ ສຳເລັດຈັດພິທີ ປະກາດເມືອງ ຈົບຊັ້ນມັດທະຍົມຕອນຕົ້ນ ເປັນເມືອງທີ 2 ຂອງແຂວງ.
    ທ່ານ ຮອງເລຂາພັກເມືອງ ກ່າວຕື່ມວ່າ ສ່ວນທິດທາງ ແຜນການ 6 ເດືອນທ້າຍປີ ສົກ 2016 - 2017; ສູ້ຊົນ ຮັບປະກັນ ໃຫ້ມີສະຖຽນລະພາບ ທາງດ້ານການເມືອງ ມີຄວາມໜັກແໜ້ນ ບົນພື້ນຖານ ໃຫ້ມີຄວາມເຂັ້ມແຂງ, ໝັ້ນຄົງແລະ ມີປະຊາທິປະໄຕ ມີຄວາມເປັນປຶກແຜ່ນ ພາຍໃນ ແລະ ຄວາມສະໝັກຄີປອງດອງ ລະຫວ່າງເຜົ່າ ໃຫ້ມີຄວາມໜັນແໜ້ນ ສັງຄົມມີຄວາມສະຫງົບ ມີຄວາມເປັນລະບຽບຮຽບຮ້ອຍ ໂດຍພື້ນຖານ, ສູ້ຊົນ ເຮັດໃຫ້ອັດຕາ ການຂະຫຍາຍຕົວ GDP ເພີ່ມຂຶ້ນ 15,02% ຂຶ້ນໄປ
                                                         ຂ່າວພາບ: ໜູໄຊ ສັກພາສິດ