ວັນພຸດ, 23 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ແຂວງເຊກອງໄຂກອງປະຊຸມເປີດກ້ວາງຄົບຄະນະບໍລິຫານງານພັກແຂວງຄັ້ງທີ 5 ສະໄຫມທີ IX

 

 ໃນຕອນເຊົ້າວັນທີ 16 ມິຖຸນາ 2017ນີ້ ຢູ່ທີ່ຫ້ອງປະຊຸມຊັ້ນ 3 ຫ້ອງວ່າການປົກຄອງແຂວງເຊກອງ ໄດ້ໄຂກອງປະຊຸມຄົບຄະນະບໍລິການງານພັກແຂວງ ຄັ້ງທີ 5 ສະໄຫມທີ IX ຂຶ້ນ ໂດຍການເປັນປະທານຂອງສະຫາຍ ຄຳເຜີຍ ບຸດດາວຽງ ກຳມະການສູນກາງພັກ, ເລຂາພັກແຂວງ, ເຈົ້າແຂວງ-ແຂວງເຊກອງ, ມີບັນດາຄະນະປະຈໍາພັກແຂວງ, ກຳມະການພັກແຂວງ, ຫົວຫນ້າພະແນກ, ຫົວຫນ້າອົງການທຽບເທົ່າ, ຫົວຫນ້າກອງບັນຊາການ ສອງກໍາລັງປ້ອງກັນອາວຸດ, ອຳນວຍການລັດວິສາຫະກິດ ພ້ອມດ້ວຍອະດີດພະນັກງານການນຳຂອງແຂວງເຂົ້າຮ່ວມ.

   ສະຫາຍ ເຫລັກໄຫລ ສີວິໄລ ກໍາມະການປະຈໍາພັກແຂວງ, ຮອງເຈົ້າແຂວງ ຜູ້ຊີ້ນຳວຽກງານເສດຖະກິດຂັ້ນແຂວງ ໄດ້ລາຍງານ ການຈັດຕັ້ງປະຕິບັດແຜນພຫດທະນາເສດຖະກິດ-ສັງຄົມ 5 ເດືອນຕົ້ນປີ ແລະ ທິດທາງແຜນການ 7 ເດືອນ ທ້າຍປີ 2017 ໃຫ້ຮູ້ວ່າ: ຄະນະບໍລິຫານງານພັກແຂວງ ໄດ້ເປັນເຈົ້າການໃນການເພີ່ມທະວີການສຶກສາອົບຮົມ ປະຊາຊົນບັນດາເຜົ່າເຊື່ອມຊຶມ ເປັນເຈົ້າການເຂົ້າຮ່ວມປະຕິບັດ ພັນທະວຽກງານປ້ອງກັນຊາດ-ປ້ອງກັນຄວາມສະຫງົບ ຍົກສູງສະຕິລະວັງຕົວ, ຕ້ານ ແລະ ສະກັດກັ້ນປະກົດການຫຍໍ້ທໍ້ໃນສັງຄົມ ແລະ ກົນອຸບາຍທຳລາຍມ້າງເພ ໂດຍສັນຕິຂອງອິດທິກຳລັງປໍລະປັກ ແລະ ກຸ່ມຄົນບໍ່ດີ, ຖືເອົາວຽກງານປ້ອງກັນຊາດ-ປ້ອງກັນຄວາມສະຫງົບ ຕິດພັນກັບວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ, ເຮັດໃຫ້ແຂວງເຊກອງ ສືບຕໍ່ມີສະຖຽນລະພາບທາງດ້ານການເມືອງ ຢ່າງໜັກແໜ້ນ, ສັງຄົມສືບຕໍ່ມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ, ທົ່ວປວງຊົນບັນດາເຜົ່າ ມີຄວາມສາມັກຄີປອງດອງເປັນປຶກແຜ່ນ ແໜ້ນໜາ, ສະພາບການຈັດຕັ້ງແຜນພັດທະນາເສດຖະກິດ-ສັງຄົມ ແລະ ໂຄງການລົງທຶນຂອງລັດ ໄດ້ເລີ່ມປະຕິບັດໄປຕາມແຜນວາງໄວ້ ເຮັດໃຫ້ ອັດຕາການຂະຫຍາຍຕົວເສດຖະກິດຂອງແຂວງມີທ່າອຽງດີຂຶ້ນເລື້ອຍໆ ແລະ ຄາດຄະເນວ່າໝົດປີ 2017 ອັດຕາການຂະຫຍາຍຕົວ (GDP) ເພີ່ມຂຶ້ນສະເລ່ຍ 9,1%, ລວມຍອດຜະລິດຕະພັນພາຍໃນ ບັນລຸໄດ້ 1.555 ຕື້ກີບ ແລະ ມີມູນຄ່າ (GDP) ສະເລ່ຍຕໍ່ຫົວຄົນ ບັນລຸໄດ້ 13,2 ລ້ານກີບ ຫຼື ເທົ່າກັບ 1.660 ໂດລາສະຫະລັດ.
   ນອກນີ້ ສາມາດເກັບລາຍຮັບເຂົ້າງົບປະມານ ພູດຂອງແຂວງໄດ້ 22,22 ຕື້ກີບ, ທຽບໃສ່ແຜນປະຕິບັດໄດ້ 32,2%, ສົມທຽບໃສ່ໄລຍະດຽວກັນຂອງປີກ່ອນເພີ່ມຂຶ້ນ 6,35% ແລະ ປະຕິບັດລາຍຈ່າຍງົບປະມານໄດ້ 127,68 ຕື້ກີບ, ທຽບໃສ່ແຜນປີປະຕິບັດໄດ້ 31,69%; ການນຳເຂົ້າສິນຄ້າປະຕິບັດໄດ້ໃນມູນຄ່າ 40,93 ລ້ານໂດລາ, ປະຕິບັດລື່ນແຜນການທີ່ວາງໄວ້ ເກືອບ 3 ເທົ່າຕົວ ( ສາຍເຫດທີ່ພາໃຫ້ການນຳເຂົ້າເພີ່ມຂຶ້ນ; ສ່ວນໃຫຍ່ແມ່ນ ການນຳເຂົ້າເຄື່ອງກົນຈັກທີ່ມານຳໃຊ້ສ້ອມແປງເຂື່ອນໄຟຟ້າ ເຊກະໝານ 3, ພາຫະນະ ແລະ ເຄື່ອງມືຮັບໃຊ້ການຜະລິດ ) ແລະ ການສົ່ງອອກສິນຄ້າບັນລຸໄດ້ 8,18 ລ້ານໂດລາ ທຽບໃສ່ແຜນປະຕິບັດໄດ້ 39,37%.
   ສໍາລັບທິດທາງແຜນການ 7 ເດືອນທ້າຍປີ 2017 ຈະສູ້ຊົນເຮັດໃຫ້ລວມຍອດຜະລິດຕະພັນພາຍໃນ (GDP) ເພີ່ມຂຶ້ນໃນລະດັບ 9,1% ແລະ ສ້າງມູນຄ່າເພີ່ມຕາມລາຄາໃນປີ ໃຫ້ໄດ້ປະມານ 1.507 ຕື້ກີບ, ລາຍໄດ້ສະເລັ່ຍຕໍ່ຄົນ 13,0 ລ້ານກີບ ຫຼື ເທົ່າກັບ 1.615 ໂດລາສະຫະລັດ ໃນນັ້ນ: ຂະແໜງກະສິກຳ-ປ່າໄມ້ເພີ່ມຂຶ້ນ 8% ກວມເອົາ 38,1%; ຂະແໜງອຸດສະຫະກຳເພີ່ມຂຶ້ນ 7,5% ກວມເອົາ 22,3%; ຂະແໜງການບໍລິການ ເພີ່ມຂຶ້ນ 11,0% ກວມເອົາ 39,6% ຂອງ GDP ແລະ ໃນສົກປີ 2017 ນີ້ຕ້ອງສູ້ຊົນຊອກທຸກແຫຼ່ງທຶນ ເພື່ອພັດທະນາພື້ນຖານໂຄງລ່າງຂອງແຂວງ ໃຫ້ໄດ້ທັງໝົດ 545,8 ຕື້ກີບ ກວມເອົາ 36,2% ຂອງ GDP ໃນນັ້ນ: ການລົງທຶນຈາກງົບປະມານລັດ 61 ຕື້ກີບ ກວມເອົາ 11,2%; ທຶນຊ່ວຍເຫຼືອລ້າ ແລະ ກູ້ຢືມ 81,87 ຕື້ກີບ ຫຼື 10,23 ລ້ານໂດລາ ກວມເອົາ 15,0%; ທຶນຂອງເອກະຊົນພາຍໃນ ແລະ ຕ່າງປະເທດ 272,91 ຕື້ກີບ ຫຼື 34,11 ລ້ານໂດລາ ກວມເອົາ 50,0% , ທຶນສິນເຊື່ອທະນາຄານ 130 ຕື້ກີບ ກວມເອົາ 23,8% ຂອງການລົງທຶນທັງໝົດ, ສູ້ຊົນເກັບລາຍຮັບພາຍໃນ ( ພູດຂອງແຂວງ ) ໃຫ້ບັນລຸໄດ້ 53,65 ຕື້ກີບ ( ຄາດຄະເນໝົດປີ 75,87 ຕື້ກີບ ສົມທຽບໃສ່ແຜນການປີ ລື່ນແຜນ 9,96% ) ແລະ ຄຸ້ມຄອງລາຍຈ່າຍງົບປະມານ ລວມໃຫ້ຢູ່ໃນລະດັບ 282,84 ຕື້ກີບ ( ຄາດຄະເນໝົດປີ 410,52 ຕື້ກີບ ສົມທຽບໃສ່ແຜນການປີ ລື່ນແຜນ 1,8% ), ສູ້ຊົນເຮັດໃຫ້ການສົ່ງອອກສິນຄ້າໃຫ້ບັນລຸໄດ້ 35 ລ້ານໂດລາ ແລະ ຄຸ້ມຄອງການນຳເຂົ້າສິນຄ້າໃຫ້ຢູ່ໃນລະດັບ 12 ລ້ານໂດລາສະຫະລັດ.

                                                       ພາບ-ຂ່າວ: ພຸດທະສອນ