ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ແຂວງເຊກອງ ເປີດກອງປະຊຸມເປີດກ້ວາງຄົບຄະນະບໍລິຫານງານ ຄັ້ງທີ 4 ສະໄໝທີ IX

    ກອງປະຊຸມເປີດກວ້າງ ຄົບຄະນະບໍລິຫານງານພັກ ແຂວງເຊກອງ ຄັ້ງທີ 4 ສະໄໝທີ IX ໄດ້ເປີດຂຶ້ນຢ່າງເປັນທາງການ ໃນຕອນເຊົ້າວັນທີ 20 ທັນວາ 2016 ນີ້ ທີ່ສະໂມສອນໃຫຍ່ຂອງແຂວງ ໂດຍ ການເປັນປະທານ ຂອງທ່ານ ຄຳເຜີຍ ບຸດດາວຽງ ກຳມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ, ມີຮອງເລຂາ-ຄະນະປະຈຳພັກແຂວງ, ກຳມະການພັກແຂວງ, ເລຂາພັກເມືອງ, ເລຂາ ຄະນະໜ່ວຍພັກ, ຫົວໜ້າ-ຮອງພະແນກ, ຫ້ອງການ, ພະນັກງານປະຕິວັດອາວຸໂສ ແລະ ອຳນວຍການລັດວິສາຫະກິດພາຍໃນແຂວງເຂົ້າຮ່ວມ.
    ໃນວາລະກອງປະຊຸມ ທ່ານ ຄຳເຜີຍ ບຸດດາວຽງ ໄດ້ກ່າວໄຂກອງປະຊຸມ ຊຶ່ງໄດ້ກ່າວໃຫ້ຮູ້ວາລະ-ຂັ້ນຕອນ ຂອງກອງປະຊຸມວ່າ: ກອງປະຊຸມຄົບຄະນະຄັ້ງນີ້ ແມ່ນຈະໄດ້ດຳເນີນ ເປັນເວລາ 4 ວັນນັບແຕ່ວັນທີ 20-23 ທັນວາ 2016 ແລະ ມີ 2 ພາກ, ຊຶ່ງບັນດາຜູ້ແທນເຂົ້າຮ່ວມ ຈະໄດ້ພ້ອມກັນສຸມໃສ່ສະຕິປັນຍາ ເຂົ້າໃນການຄົ້ນຄວ້າ, ປະກອບຄຳຄິດຄຳເຫັນ ຢ່າງກົງໄປ-ກົງມາ ແລະ ພາວະວິໄສ ເພື່ອຕີລາຄາຄືນຜົນງານ ແລະ ຜົນສຳເລັດທີ່ຍາດມາໄດ້ໃນການຊີ້ນຳໆພາຮອບດ້ານ ຂອງອົງຄະນະພັກແຂວງ ຕໍ່ການພັດທະນາເສດຖະກິດ, ວັດທະນະທຳ-ສັງຄົມ, ຕໍ່ ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານການແກ້ໄຂ ຄວາມທຸກຍາກ ແລະ ດ້ານອ່ອນຂໍ້ຄົງຄ້າງ ໃນໄລຍະຜ່ານມາ ກໍຄືທິດທາງ ຄາດໝາຍສູ້ຊົນໃນຕໍ່ໜ້າ ທັງນີ້ ເພື່ອເຮັດໃຫ້ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII ຂອງແຂວງ ທີ່ມະຕິກອງປະຊຸມໃຫຍ່ຄັ້ງທີ IX ອົງຄະນະພັກແຂວງ ວາງອອກປະກົດຜົນເປັນຈິງ.
    ພ້ອມນັ້ນ, ກອງປະຊຸມ ຍັງຈະໄດ້ດຳເນີນ ການສຳຫຼວດກວດກາ ແລະ ຕີລາຄາການຊີ້ນຳ-ນຳພາວຽກງານ ຂອງຄະນະບໍລິຫານງານ ແຕ່ລະສະຫາຍໃນໄລຍະຜ່ານມາ ຊຶ່ງນັບແຕ່ກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງຈົນເຖິງປັດຈຸບັນ, ຕີລາຄາດ້ານດີ, ດ້ານອ່ອນ ແລະ ຂໍ້ຄົງຄ້າງ ເພື່ອປັບປຸງແກ້ໄຂ, ເຮັດໃຫ້ການນຳພາວຽກງານມີປະສິດທິຜົນດີຂຶ້ນກວ່າເກົ່າ.

                                                     ( ຂ່າວ : ສັນຍາ ແກ້ວໄຊຍະວົງ )