ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ພະແນກ ກປຂ ຈັດສຳມະນາກ່ຽວກັບວຽກງານການຈົດທະບຽນພື້ນທີ່ປູກ ແລະ ສະຖານທີ່ຫຸ້ມຫໍ່ຜະລິດຕະພັນພືດ ທີ່ຕິດພັນກັບການຜະລິດເປັນສິນຄ້າເພື່ອສົ່ງອອກ

   ກອງປະຊຸມສໍາມະນາໄດ້ຈັດຂຶ້ນ ທີ່ພະແນກກະສິກໍາ ແລະ ປ່າໄມ້ ແຂວງເຊກອງ ໂດຍການເປັນ ປະທານຂອງທ່ານ ເສີມສີ ສຸລິຕະ ຮອງຫົວໜ້າ ພະແນກ ກະສິກຳ ແລະ ປ່າໄມ້ແຂວງ ເຊກອງ,ມີພະນັກງານ ວິຊາການ ຈາກພະແນກຄຸ້ມຄອງ ການປູກຝັງ,ກົມປູກຝັງ, ມີຫົວໜ້າໜ່ວຍງານ ແລະ ວິຊາການໜ່ວຍງານປູກຝັງ ຈາກຫ້ອງການກະສິກຳ ແລະ ປ່າໄມ້ 4 ເມືອງ,ມີຫົວໜ້າຂະແໜງ ພ້ອມດ້ວຍວິຊາການ ຂະແໜງປູກຝັງ ພະແນກ ກປຂ ເຂົ້າຮ່ວມ,ກອງປະຊຸມດັ່ງກ່າວ ແມ່ນຈະໄດ້ດຳເປັນເວລາ 2 ວັນ,ຈຶ່ງຈະສຳເລັດ (ວັນທີ 31 ມັງກອນ ຫາ 1 ກຸມພາ 2017).
ເຊິ່ງຈຸດປະສົງຂອງກອງປະຊຸມສໍາມະນາ ກ່ຽວກັບວຽກງານການຈົດທະບຽນ ພື້ນທີ່ປູກ ແລະ ສະຖານທີ່ຫຸ້ມຫໍ່ຜະລິດຕະພັນພືດ ທີ່ຕິດພັນກັບການຜະລິດເປັນສິນຄ້າ ເພື່ອສົ່ງອອກ ໃນຄັ້ງນີ້ກໍ່ເພື່ອເປັນການເຜີຍແຜ່ນິຕິກຳ ໃຫ້ແກ່ບໍລິສັດ,ຜູ້ປະກອບການ,ຜູ້ຜະລິດກະສິກຳ,ຂະແໜງການ ທີ່ກ່ຽວຂ້ອງ ຕະຫລອດຜູ້ດຳເນີນທຸລະກິດກະສິກຳ ສົ່ງອອກ-ນຳເຂົ້າພືດ,ຜະລິດຕະພັນ ເພື່ອສົ່ງອອກ ພາຍໃນ ແລະ ຕ່າງປະເທດ ໃຫ້ຖືກຕ້ອງ ຕາມລະບຽບຫລັກການ ຂອງບັນດາປະເທດພາຄີວາງອອກ.
   ໃນພິທີ ທ່ານ ບຸນສີ ສິງພິສິດ ຫົວໜ້າຂະແໜງ ປູກຝັງ ພະແນກກະສິກໍາ ແລະ ປ່າໄມ້ ໄດ້ລາຍງານວ່າ: ສະພາບການຜະລິດພືດເປັນສິນຄ້າ ເພື່ອສົ່ງອອກ ຢູ່ແຂວງ ເຊກອງ ແມ່ນມີທ່າອ່ຽງ ນັບມື້ນັບເພີ່ມຂຶ້ນ ເຊິ່ງຕ້ອງໄດ້ເນັ້ນໃສ່ການຜະລິດທີ່ມີຄຸນນະພາບ ແລະ ໄດ້ຕາມມາດຕະຖານຂອງຄູ່ຄ້າ ເຊິ່ງເປັນສາຍເຫດທີ່ຕ້ອງໄດ້ ນຳໃຊ້ປັດໃຈການຜະລິດເຂົ້າຊ່ວຍ (ນຳໃຊ້ແນວພັນຄຸນນະພາບ ແລະ ນຳໃຊ້ຝຸ່ນ ແລະ ຢາປາບສັດຕູພືດທີ່ຖືກວິທີ) ຈຶ່ງຕ້ອງມີເງື່ອນໄຂ ທີ່ຈຳເປັນຕໍ່ການ ສົ່ງອອກ ເຊິ່ງເປັນປັດໄຈໜຶ່ງ ທີ່ສຳຄັນ ເປັນຕົ້ນແມ່ນ ການຈົດທະບຽນພື້ນທີ່ປູກ ແລະ ສະຖານທີ່ ຫຸ້ມຫໍ່ຜະລິດຕະພັນພືດ ກ່ອນການສົ່ງອອກ ແລະ ການຄຸ້ມຄອງເຕັກນິກວິຊາການ ດ້ານການປູກຝັງ ເພື່ອບັນລຸໄດ້ເປົ້າໝາຍຄ້ຳປະກັນສະບຽງອາຫານ ແລະ ຜະລິດເປັນສິນຄ້າ ທັງນີ້ເພື່ອເຮັດໃຫ້ຜະລິດຕະພັນພຶດທີ່ຈະສົ່ງອອກຮັັບປະກັນໄດ້ທັງປະລິ
ມານ ແລະ ຄຸນະພາບ.
   ເຊິ່ງເອກກະສານທີ່ນຳມາຮຽນມີ: ຂໍ້ຕົກລົງ ຂອງລັດຖະມົນຕີ ວ່າດ້ວຍ ການຄຸ້ມຄອງ ແລະ ນຳໃຊ້ແນວພັນພືດ,ຄູ່ມືການກວດກາ ຄຸນນະພາບເມັດພັນເຂົ້າ,ຄູ່ມືການກວດກາ ການນຳໃຊ້ຢາປາບສັດຕູພືດໃນ ສປປ ລາວ,ບົດແນະນຳກ່ຽວກັບການ ຈົດທະບຽນພື້ນທີ່ປູກ ແລະ ສະຖານທີ່ຫຸ້ມຫໍ່ຜະລິດຕະພັນພືດເພື່ອ ສົ່ງອອກ ເຊິ່ງມີ 4 ແບບຟອມໃນການ ເກັບກຳຂໍ້ມູນ ດັ່ງກ່າວ,ນອກນີ້ ບັນດາຜູ້ເຂົ້າຮ່ວມ ໄດ້ຜັດປ່ຽນກັນ ປະກອບຄຳຄິດຄຳເຫັນ ເພື່ອແລກປ່ຽນບົດຮຽນ ເຊິ່ງກັນ ແລະ ເພື່ອຖອດເອົາບົດຮຽນໃໝ່ໆ ໄປນຳໃຊ້ເຂົ້າໃນ ວຽກງານຕົວຈິງ ໃຫ້ເກີດປະໂຫຍດ ສູງສຸດໃນຕໍ່ໜ້າ.
                                                                                      ພາບ-ຂ່າວ:ພຸດທະສອນ