ວັນພຸດ, 11 ທັນວາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເຊກອງ - ກອນຕູມ ຮ່ວມມື ທາງດ້ານ ການສຶກສາ ແຕ່ນີ້ ຮອດ 2020

ເຊກອງ-ກອນຕູມ ຮ່ວມມືທາງດ້ານການສຶກສາ ແຕ່ນີ້ຮອດ 2020

        ໃນວັນທີ 13 ພຶດສະພາ ນີ້, ທີ່ຫ້ອງປະຊຸມ ຊັ້ນ3 ຫ້ອງວ່າການປົກຄອງແຂວງ ເຊກອງ, ໄດ້ມີການ ເຊັນບົດບັນທຶກ ຊ່ວຍຈຳ ລະຫວ່າງ ອໍານາດການ ປົກຄອງ ແຂວງເຊກອງ ສປປ ລາວ ແລະ ຄະນະ ກໍາມະການ ປະຊາຊົນ ແຂວງ ກອນຕູມ ສສ ຫວຽດນາມ ກ່ຽວກັບ ການຮ່ວມມື ໃນຂົງເຂດ ວຽກງານ ການສຶກສາ ໄລຍະ ປີ 2015-2020 ໂດຍພາຍໃຕ້ ການເຂົ້າຮ່ວມ ຂອງ ທ່ານ ຖາວອນ ພົມມະໄລລຸນ ຄະນະປະຈໍາ ພັກແຂວງ, ຮອງເຈົ້າແຂວງ ເຊກອງ ແລະ ທ່ານ ຫງວຽນດຶກຕິວ ກໍາມະການ ພັກແຂວງ, ຮອງເຈົ້າແຂວງ, ຮອງປະທານ ຄະນະກໍາມະການ ປະຊາຊົນ ແຂວງ ກອນຕູມ ແລະ ພາກສ່ວນ ທີ່ກ່ຽວຂ້ອງ ທັງສອງຝ່າຍ ເຂົ້າຮ່ວມ.

       ໂດຍອີງ ສັນຍາ ຮ່ວມມື ໃນຂົງເຂດ ເສດຖະກິດ, ວັດທະນະທໍາ - ສັງຄົມ, ການສຶກສາ ແລະ ວິທະຍາສາດເທັກໂນໂລຊີ ລະຫວ່າງ ສອງລັດຖະບານ ລາວ - ຫວຽດນາມ ໄລຍະ ສົກປີ 2011-2015 ແລະ ບົນຈິດໃຈ ການຮ່ວມມື ດ້ານການ ສຶກສາ ລະຫວ່າງ ແຂວງເຊກອງ ແລະ ແຂວງ ກອນຕູມ ໄດ້ລະບຸ ໄວ້ໃນ ບົດບັນທຶກຊ່ວຍຈໍາ ໃນວຽກງານ ການກໍ່ສ້າງ ດ້ານຊັບພະຍາກອນ ມະນຸດ ໃຫ້ແກ່ ແຂວງເຊກອງ, ທັັງສອງຝ່າຍ ຈຶ່ງໄດ້ ສ້າງ ບົດບັນທຶກ ຊ່ວຍຈໍາ ສະບັບນີ້ ຊຶ່ງເນື້ອໃນ ລະບຸວ່າ : ອໍານາດ ການປົກຄອງ ແຂວງເຊກອງ ແລະ ຄະນະກໍາມະການ ປະຊາຊົນ ແຂວງກອນຕູມ ເຫັນດີ ເປັນເອກະພາບ ສືບຕໍ່ ຜັນຂະຫຍາຍ ແຜນງານ ການກໍ່ສ້າງນັກສຶກສາ ແລະ ພະນັກງານ 3 ແຂວງ ພາກໃຕ້ ຂອງລາວ ໄລຍະປີ 2015-2020; ທຸກປີ ພະແນກ ສຶກສາທິການ ແລະ ກິລາ ແຂວງ ເຊກອງ ສະເໜີ ເອົານັກຮຽນ ແລະ ພະນັກງານ ຈໍານວນ 25 ຄົນ, ໄປສຶກສາ ຕໍ່ຢູ່ສາຂາ ມະຫາວິທະຍາໄລ ດານັງ ແຂວງ ກອນຕູມ ສສ ຫວຽດນາມ, ຈໍານວນນັກຮຽນ, ລະບົບການຮຽນ ແລະ ຂະແໜງວິຊາ ຂອງນັກສຶກສາ ໄດ້ຈັດແບ່ງ ຕາມການສະໜີ ຂອງພະແນກສຶກສາທິການ ແລະ ກິລາ ແຂວງເຊກອງ; ມະຫາວິທະຍາໄລ ສາຂາດານັງ ແຂວງກອນຕູມ ໄດ້ຮັບເອົານັກຮຽນ ແລະ ພະນັກງານ ແຂວງເຊກອງ ໄປເຂົ້າຮຽນ ຢູ່ມະຫາວິທະຍາໄລ ສາຂາ ຂອງຕົນ ໃນທຸກໆປີ.

         ພ້ອມນີ້ ທັງສອງຝ່າຍ ໄດ້ມີວິທີ ການຮ່ວມມື ແລະ ຜັນຂະຫຍາຍ ຮ່ວມກັນ ເປັນຕົ້ນ ພະແນກ ສຶກສາທິການ ແລະ ກິລາ ແຂວງ ເຊກອງ ເປັນເສນາທິການ ຫລັກໃຫ້ແກ່ ຄະນະພັກ ອໍານາດການປົກຄອງ ແຂວງໃນການ ຄັດເລືອກເອົາ ນັກຮຽນ ໃນກອບສົນທິ ສັນຍາ ລະຫວ່າງ ສອງລັດຖະບານ ລາວ-ຫວຽດນາມ ແລະ ຕາມຂໍ້ກໍານົດ ຂອງກະຊວງ ສຶກສາທິການ ແລະ ກິລາ ແຫ່ງ ສປປ ລາວ, ຄະນະພັກ - ອໍານາດການປົກຄອງ ແຂວງ ນໍາສະເໜີ ຜົນການຄັດເລືອກ ນັກສຶກສາ ສົ່ງໄປຍັງ ກະຊວງສຶກສາທິການ ແລະ ກິລາ ສປປ ລາວ ພ້ອມທັງ ສະເໜີ ໃຫ້ກະຊວງ ດັ່ງກ່າວ ສົ່ງຜົນ ການຄັດເລືອກ ໄປຍັງ ກະຊວງສຶກສາທິການ ແລະ ກໍ່ສ້າງ ຫວຽດນາມ ເພື່ອ ໃຫ້ມີຂໍ້ມູນ ອ້າງອີງ ໃຫ້ ສາຂາມະຫາວິທະຍາໄລດານັງ ທີ່ ແຂວງກອນຕູມ.

      ຊຶ່ງຮ່ວມລົງນາມ ໃນບົດບັນທຶກ ດັ່ງກ່າວ ຕາງໜ້າ ແແຂວງເຊກອງ ແມ່ນ ທ່ານ ຂັນແກ້ວ ໂຮມອິນຕາ ຮອງຫົວໜ້າ ພະແນກສຶກສາທິການ ແລະ ກິລາແຂວງ ແລະ ຕາງໜ້າ ແຂວງກອນຕູມ ແມ່ນ ທ່ານ ດຣ ດັງວັນມີ ຫົວໜ້າ ອໍານວຍການ ສາຂາ ມະຫາວິທະຍາໄລ ດານັງ ໂດຍມີ ຄະນະ ທັງສອງຝ່າຍ ແລະ ພາກສ່ວນທີ່ ກ່ຽວຂ້ອງເຂົ້າຮ່ວມ ເປັນສັກຂີພິຍານ.

ຂ່າວ-ພາບ : ພຸດທະສອນ

ລະຫັດພາບ 05314.05315