ວັນສຸກ, 15 ພະຈິກ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ຫົວໜ້າຄະນະຈັດຕັ້ງສູນກາງພັກລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງ ທ່າແຕງ

   ສະຫາຍ ຈັນສີ ໂພສີຄໍາ ກໍາມະການກົມການເມືອງສູນກາງພັກ ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງ ທ່າແຕງ ແຂວງ ເຊກອງ ໃນຕອນເຊົ້າວັນທີ 1 ພະຈິກ 2017 ນີ້. ເຊິ່ງໄດ້ຮັບກຽດຕ້ອນຮັບຢ່າງອົບອຸ່ນ ຈາກສະຫາຍ ຄໍາສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງ-ເມືອງ ທ່າແຕງ,ໂດຍມີສະຫາຍ ປອ ຄໍາພຽມ ບົວລະພາ ຮອງເລຂາພັກແຂວງ ຮອງເຈົ້າແຂວງ ເຊກອງ, ມີກໍາມະການພັກແຂວງ, ຄະນະປະຈໍາພັກເມືອງ, ກໍາມະການພັກເມືອງ, ພະນັກງານອາວຸໂສ, ນາຍແລະ ພົນທະຫານ, ນາຍ ແລະ ພົນຕໍາຫຼວດ, ພະນັກງານລັດຖະກອນ ພ້ອມດ້ວຍອໍານາດການປົກຄອງບ້ານ ຫຼາຍຮ້ອຍຄົນ ໄດ້ໃຫ້ການຕ້ອນຮັບຢ່າງສົມກຽດ.
   ໃນກອງປະຊຸມສະຫາຍ ຄໍາສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງ-ເມືອງ ທ່າແຕງ ໄດ້ລາຍງານ ສະພາບການເຄື່ອນໄຫວຂອງເມືອງ ໃຫ້ສະຫາຍຫົວໜ້າຄະນະຈັດຕັ້ງສູນກາງພັກຊາບ ເຊິ່ງມີບາງຕອນ ທ່ານກ່າວວ່າ: ເມືອງ ທ່າແຕງພວກເຮົາ ໄດ້ພະຍາຍາມປັບປຸງ ຄຸນນະພາບຂອງສະມາຊິກພັກ ດ້ວຍການສຶກສາອົບຮົມ ການເມືອງແນວຄິດ, ຈັດຕັ້ງຮໍ່າຮຽນ ແນວທາງນະໂຍບາຍ, ມະຕິ, ຄໍາສັ່ງ ແລະ ນິຕິກໍາຕ່າງໆ ຂອງພັກຢ່າງກວ້າງຂວາງ ໂດຍຕິດພັນກັບ ການຄຸ້ມຄອງ ປ້ອງກັນພັກ-ພະນັກງານ, ການຂະຫຍາຍພັກ ກໍ່ໄດ້ຮັບການຈັດຕັ້ງປະຕິບັດຢ່າງຕໍ່ເນື່ອງ, ຖືຄຸນນະພາບເປັນກົກ, ປະຕິບັດຕາມຂັ້ນຕອນ ແລະ ກົດລະບຽບຂອງພັກ, ມາຮອດປະຈຸບັນ ມີຈໍານວນສະມາຊິກພັກທັງໝົດ 1.680 ສະຫາຍ, ຍິງ 335 ສະຫາຍ, ທຽບໃສ່ປີ 2016 ເພີ່ມຂື້ນ 7,97%, ໃນນີ້ ມີສະມາຊິກພັກແຂງຮອບດ້ານ 875 ສະຫາຍ, ຍິງ 143 ສະຫາຍ, ແຂງບາງດ້ານມີ 600 ສະຫາຍ, ຍິງ 157 ສະຫາຍ, ສະມາຊິກພັກກາງມີ 189 ສະຫາຍ, ຍິງ 35 ສະຫາຍ,ອ່ອນມີ 17 ສະຫາຍ, ບໍ່ໄດ້ຈັດປະເພດມີ 1 ສະຫາຍ, ສາມາດລົບລ້າງບ້ານຂາວ ທີ່ບໍ່ມີສະມາຊິກພັກ ໄດ້ຢ່າງສົມບູນ ແລະ ໄດ້ມີຄວາມພະຍາຍາມ ປັບປຸງແບບແຜນນໍາພາຂອງຕົນ ໃຫ້ເຂົ້າສູ່ລະບຽບຫຼັກການ, ປະຕິບັດລະບອບຄວບຕໍາແໜ່ງ ເປັນສ່ວນຫຼາຍ ນັບແຕ່ຂັ້ນເມືອງລົງຮອດຮາກຖານບ້ານ, ສົມທົບການນໍາພາຂອງພັກ, ເຊີດຊູການຄຸ້ມຄອງຂອງລັດ, ເສີມຂະຫຍາຍເປັນເຈົ້າ ຂອງບັນດາອົງການຈັດຕັ້ງມະຫາຊົນ, ປະຕິບັດລະບອບລວມສູນປະຊາທິປະໄຕ ນໍາພາເປັນໝູ່ຄະນະ, ບຸກຄົນຮັບຜິດຊອບ, ພາຍໃນພັກມີຄວາມສາມັກຄີເປັນເອກະພາບ, ອັນພົ້ນເດັ່ນ ໄດ້ຈັດຕັ້ງການດໍາເນີນຊີວິດການເມືອງ ພາຍໃນທົ່ວພັກຂື້ນກັບເມືອງ, ການຄຸ້ມຄອງພະນັກງານ ໄດ້ຫັນເຂົ້າສູ່ລະບົບຕາມການແບ່ງຂັ້ນຄຸ້ມຄອງ, ຫຼາຍຫ້ອງການເຮັດໃຫ້ການຄຸ້ມຄອງ ຂໍ້ມູນພະນັກງານລັດຖະກອນ ໄດ້ນໍາໃຊ້ລະບົບເຕັກນິກທີ່ທັນສະໄໝເທື່ອລະກ້າວ, ສາມາດຕິດຕາມ, ກວດກາດ້ານຈໍານວນ, ຊີວະປະຫວັດມີຄວາມສະດວກວ່ອງໄວ ແລະ ຊັດເຈນຂື້ນກວ່າເກົ່າ, ມາຮອດປະຈຸບັນ ມີພະນັກງານລັດຖະກອນທົ່ວເມືອງມີທັງໝົດ: 922 ສະຫາຍ,ຍິງ 379 ສະຫາຍ, ອັນພົ້ນເດັ່ນ ໄດ້ສໍາເລັດການແຈ້ງຊັບສິນ ຂອງພະນັກງານໃນຮອບທີ 1 ແລະ ກ້າວເຂົ້າມາຮອບທີ 2 ໃນປັດຈຸບັນ.

   ໃນໂອກາດນີ້ ສະຫາຍ ຈັນສີ ໂພສີຄໍາ ກໍາມະການກົມການເມືອງສູນກາງພັກ ຫົວໜ້າຄະນະຈັດຕັ້ງສູນກາງພັກ ໄດ້ໃຫ້ກຽດໂອ້ລົມ ຕໍ່ພະນັກງານຫຼັກແຫຼ່ງ ພາຍໃນເມືອງ ທ່າແຕງ ຊຶ່ງທ່ານໄດ້ສະແດງຄວາມຍ້ອງຍໍ ຊົມເຊີຍເປັນຢ່າງສູງ ທີ່ໄດ້ເອົາໃຈໃສ່ປະຕິບັດໜ້າທີ່ ແລະ ຄວາມຮັບຜິດຊອບຂອງຕົນ ໂດຍສະເພາະ ວຽກງານພັກ-ພະນັກງານ, ວຽກງານປ້ອງກັນຊາດປ້ອງກັນຄວາມສະຫງົບ, ເສດຖະກິດ, ການພັດທະນາພື້ນຖານໂຄງລ່າງ, ເຂດຊົນນະບົດ,ວັດທະນະທໍາ-ສັງຄົມ, ການດໍາເນີນຊີວິດການເມືອງ ໃຫ້ກວດເບິ່ງຄືນບັນດາຄາດໝາຍ ແລະ ແຜນພັດທະນາເສດຖະກິດ-ສັງຄົມຂອງເມືອງ, ມີອັນໃດທີ່ເຫັນວ່າຍັງປະຕິບັດບໍ່ທັນໄດ້ດີ ແມ່ນໃຫ້ພ້ອມກັນຮີບຮ້ອນແກ້ໄຂ ແລະ ຈັດຕັ້ງປະຕິບັດ ໃຫ້ປະກົດຜົນເປັນຈິງ-ທັນກັບເວລາ, ສືບຕໍ່ເອົາໃຈໃສ່ທຸກຂົງເຂດວຽກງານຢ່າງແຂງແຮງ ເພື່ອຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ ໃນສັງຄົມ, ຂີ້ລັດງັດແງະ, ການແບ່ງແຍກຄວາມສາມັກຄີ, ການຍຸໂຍງສົ່ງເສີມປະຊາຊົນໄປໃນທາງທີ່ບໍ່ຖືກຕ້ອງ, ສືບຕໍ່ຊີ້ນໍາໆພາປະຊາຊົນ ເຂົ້າໃນການປູກຝັ່ງ, ລ້ຽງສັດ, ການບໍລິການ, ຫັດຖະກຳ-ອຸດສາຫະກຳຂະໜາດນ້ອຍ ໂດຍເລີ່ມຈາກທ່າແຮງຂອງແຕ່ລະຄອບຄົວ ເປັນສຳຄັນເຊັ່ນ: ທ່າແຮງດ້ານທີ່ດິນ, ແຮງງານ ທີ່ເປັນມູນເຊື້ອຂອງປະຊາຊົນ ແລະ ທຶນຮອນເປັນຫຼັກ ໃຫ້ຄຽງຄູ່ກັບຄວາມດຸໝັ່ນຂະຫຍັນພຽນໃຫ້ໄດ້ທັງປະລິມານ ແລະ ຄຸນນະພາບ, ທັງນີ້ ກໍ່ເພື່ອປະກາດເມືອງ ທ່າແຕງ ໃຫ້ເປັນເມືອງຫຼຸດພົ້ນອອກຈາກຄວາມທຸກຍາກໃນປີ 2020.

                                                                                 ຂ່າວພາບໂດຍ : ພອນ ບຸນອຸທິດ 020 5632 8844