ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ທ່າແຕງ ປະກາດສ້າງຕັ້ງກອງຮ້ອຍກໍາລັງສໍາຮອງ

   ໃນຕອນບ່າຍຂອງວັນທີ 30 ມີນາ ຜ່ານມານີ້ ກອງບັນຊາການທະຫານເມືອງ ທ່າແຕງ ແຂວງເຊກອງ ໄດ້ຈັດກອງປະຊຸມ ປະກາດສ້າງຕັ້ງ ກອງຮ້ອຍກໍາລັງສໍາຮອງຂື້ນ ໂດຍເປັນປະທານ ຂອງສະຫາຍ ພັອ ສົມທອງ ດອນກັນນ້ອຍ ຄະນະປະຈໍາພັກແຂວງ ຫົວໜ້າການເມືອງ ກອງບັນຊາການທະຫານແຂວງ ເຊກອງ ຮອງປະທານປ້ອງກັນຊາດ-ປ້ອງກັນຄວາມສະຫງົບແຂວງ, ມີສະຫາຍ ຄໍາສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງ-ເມືອງ ທ່າແຕງ ປະທານສອງກໍາລັງປະກອບອາວຸດເມືອງ, ຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ-ຮອງຫ້ອງການ, ຂະແໜ່ງການກ່ຽວຂ້ອງຂັ້ນແຂວງ, ອົງການປົກຄອງ-ກອງຫຼອນ 47 ບ້ານທົ່ວເມືອງ ພ້ອມດ້ວຍພະນັກງານນັກຮົບພາຍໃນກົມກອງເຂົ້າຮ່ວມ ເປັນຈໍານວນຫຼວງຫຼາຍ.
   ໃນພິທີສະຫາຍ ພັທ ແສງມະນີ ດາລາສິນ ຄະນະປະຈໍາພັກເມືອງ ຫົວໜ້າກອງບັນຊາການທະຫານເມືອງ ທ່າແຕງ ໄດ້ຜ່ານຂໍ້ຕົກລົງເລກທີ 626/ກສນ, ນະຄອນຫຼວງວຽງຈັນ,ວັນທີ 25 ມີນາ 2016 ວ່າດ້ວຍການສ້າງຕັ້ງກອງຮ້ອຍກໍາລັງສໍາຮອງຂອງເມືອງ ທ່າແຕງ ແຂວງເຊກອງ, ຕາມລັດຖະທໍາມະນູນແຫ່ງ ສປປລາວ ໄດ້ລະບຸໄວ້ ໃນໝວດທີ 3, ມາດຕາ 31 ຫາ 33 ວ່າດ້ວຍວຽກງານປ້ອງກັນຊາດ-ປ້ອງກັນຄວາມສະຫງົບ, ອີງຕາມກົດໝາຍພັນທະປ້ອງກັນຊາດ ໃນໝວດທີ 4, ມາດຕາ 30 ຫາ 35(ສະບັບປັບປຸງ) ວ່າດ້ວຍການກໍ່ສ້າງກໍາລັງສໍາຮອງປ້ອງກັນຊາດ, ອີງໃສ່ຄໍາສັ່ງແຈ້ງການຂອງລັດຖະມົນຕີວ່າການກະຊວງປ້ອງກັນປະເທດ, ເລກທີ 805/ກປທ,ລົງວັນທີ 5 ເມສາ 2006 ກ່ຽວກັບການຈັດຕັ້ງກໍາລັງສໍາຮອງຄືນໃໝ່,ກົມໃຫ່ຍເສນາທິການຕົກລົງສ້າງຕັ້ງກອງຮ້ອຍສໍາຮອງຂອງເມືອງທ່າແຕງ ເປັນກອງຮ້ອຍ 02 ຂອງແຂວງເຊກອງ ຂື້ນຢ່າງເປັນທາງການ,ຈັດຕັ້ງເປັນ 01 ກອງຮ້ອຍສໍາຮອງທະຫານລາບ ເຊິ່ງມີພາລະບົດບາດ,ສິດໜ້າທີ່ເປັນກອງໝູນໃຫ້ແກ່ກໍາລັງທີ່ປະຈໍາການໃນກອງທັບ ພາຍໃຕ້ການຄຸ້ມຄອງ, ບັນຊາໂດຍກົງຂອງກອງບັນຊາການທະຫານເມືອງ, ແຂວງ, ຊີ້ນໍາດ້ານວິຊາສະເພາະ ຈາກກົມກໍາລັງພົນ ກົມໃຫ່ຍເສນາທິການ ກະຊວງປ້ອງກັນປະເທດ, ປະຕິບັດຂໍ້ກໍານົດ, ການຂື້ນທະບຽນກໍາລັງສໍາຮອງ, ຮຽນການເມືອງ, ຝຶກຊ້ອມທະຫານ, ເຂົ້າຮ່ວມການເຄື່ອນໄຫວ ວຽກງານປ້ອງກັນຊາດ-ປ້ອງກັນຄວາມສະຫງົບ ຢູ່ ທ້ອງຖິ່ນ, ປົກປັກຮັກສາຄວາມເປັນລະບຽບຮຽບຮ້ອຍ ຂອງສັງຄົມ, ກຽມພ້ອມຮັບໃຊ້ປະເທດຊາດ ທີ່ປະກອບດ້ວຍກໍາລັງພົນ, ພາຫະນະເຕັກນິກ, ຊັບຊ້ອນເຂົ້າໃນແຜນການ ຄາດກະຊ່ວຍໝູນໃຫ້ແກ່ກໍາລັງປະຈໍາການ ໃນກອງທັບ, ການກໍານົດໂຄງປະກອບ ການຈັດຕັ້ງກອງຮ້ອຍ ກໍາລັງສໍາຮອງແມ່ນ ປະຕິບັດການບັນຊາດ້ວຍລະບົບຫົວໜ້າດຽວ, ມີຮອງການທະຫານ, ຮອງການເມືອງ, ຈັດຕັ້ງເປັນ 3 ໝວດ, 9 ໝູ່ ຢ່າງຈະແຈ້ງມອບໃຫ້ກົມກອງທ້ອງຖິ່ນ, ອົງການຈັດຕັ້ງກ່ຽວຂ້ອງ ຈົ່ງພ້ອມກັນຈັດຕັ້ງປະຕິບັດໃຫ້ຖືກຕ້ອງ ຕາມທີ່ໄດ້ກໍານົດໄວ້.
  ໂອກາດນີ້ ສະຫາຍ ພັອ ສົມທອງ ດອນກັນນ້ອຍ ຄະນະປະຈໍາພັກແຂວງ ຫົວໜ້າການເມືອງກອງບັນຊາການທະຫານແຂວງ ເຊກອງ ຮອງປະທານປ້ອງກັນຊາດ-ປ້ອງກັນຄວາມສະຫງົບແຂວງ ໄດ້ສະແດງຄວາມຊົມເຊີຍ ຕໍ່ຜົນສໍາເລັດການຫ້າງຫາກະກຽມຂອງຄະນະກໍາມະການ ແຕ່ລະຂັ້ນ, ແຕ່ກະຊວງລົງຮອດທ້ອງຖິ່ນ ແລະ ບັນດາອົງການຈັດຕັ້ງທີ່ກ່ຽວຂ້ອງ ຕະຫຼອດຮອດອ້າຍນ້ອງ ກໍາລັງສໍາຮອງ ທີ່ມີຄວາມຕັດສິນໃຈຢ່າງສູງ, ທີ່ສາມາດຈັດຕັ້ງປະຕິບັດ ສອງໜ້າທີ່ຍຸດທະສາດ ເຊິ່ງເຮັດໃຫ້ສະພາບການເມືອງຂອງທ້ອງຖິ່ນ ມີຄວາມສະຫງົບໂດຍພື້ນຖານ. ຈາກບັນຫາດັ່ງກ່າວ ຈິ່ງໄດ້ຮຽກຮ້ອງມາຍັງ ຄະນະພັກ-ຄະນະບັນຊາການ ຕະຫຼອດຮອດພະນັກງານ, ນັກຮົບກໍາລັງສໍາຮອງທັງໝົດ ຈົ່ງພ້ອມກັນເຊີດຊູສະຕິປັນຍາ ແລະ ຈັດຕັ້ງຜັນຂະຫຍາຍ ບາງເນື້ອໃນເປັນຕົ້ນ: ຖືເອົາວຽກງານການເມືອງ-ແນວຄິດເປັນກົກ, ສຸ່ມທຸກມະຕິຄໍາສັ່ງຂອງພັກ-ລັດວາງອອກ ຕິດພັນກັບທຸກຂະບວນການ, ວິຊາສະເພາະ, ການສູ້ຮົບຕິດລຽນ, ເພີ່ມທະວີການຊີ້ນໍາ-ນໍາພາ, ການຝຶກຝົນຫຼໍ່ຫຼອມຕົນເອງ ໃຫ້ກາຍເປັນພະນັກງານ, ນັກຮົບຜູ້ທີ່ຫ້າວຫັນດີເດັ່ນຢ່າງຕັ້ງໜ້າ ໂດຍຕິດພັນກັບການຍົກສູງ ນໍ້າໃຈຮັກຊາດ, ຮັກລະບອບໃໝ່, ຮັບໃຊ້ປະຊາຊົນ ແລະ ເພື່ອຜົນປະໂຫຍດຂອງປະຊາຊົນຢ່າງແທ້ຈິງ.

                                                  ຂ່າວ-ພາບ: ພອນ ບຸນອຸທິດ ນັກຂ່າວເມືອງ ທ່າແຕງ ແຂວງ ເຊກອງ