ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ຮອງລັດຖະມົນຕີກະຊວງກະສິກຳ-ປ່າໄມ້ຊຸກຍູ້ການຜະລິດລະດູແລ້ງຢູ່ເມືອງທ່າແຕງ

  ວັນທີ 25 ເມສາ 2017 ນີ້ ທ່ານ ປອ ພວງປະຣີສັກ ປຣະວົງວຽງຄຳ, ຮອງລັດຖະມົນຕີ ກະຊວງກະສິກຳ-ປ່າໄມ້ພ້ອມຄະນະ ລົງຊຸກຍູ້ການຜະລິກລະດູແລ້ງ ຢູ່ ເຂດເມືອງທ່າແຕງ ແຂວງເຊກອງ, ໂດຍການຕອນຮັບຂອງທ່ານ ສີດາ ສຸວັນນະສາຍ ຮອງເລຂາພັກແຂວງເຊກອງ, ມີຕ່າງໜ້າຈາກແຂວງຈຳປາສັກ ພ້ອມພະນັກງານວິຊາການຈາກພະແນກ ແລະ ຫ້ອງການກະສິກຳ-ປ່າໄມ້ເມືອງທ່າແຕງ ແຂວງເຊກອງ ແລະ ເມືອງປາກຊ່ອງ ແຂວງຈຳປາສັກເຂົ້າຮ່ວມ.
  ທ່ານ ປະສອນໄຊ ອິນສີຊຽງໃໝ່ ຫົວໜ້າພະແນກແຜນການ ແລະ ການຮ່ວມມືຈາກກົມຊົນລະປະທານ ກະຊວງກະສິກຳ-ປ່າໄມ້ ກ່າວລາຍງານຜົນການລົງສຶກສາສຳຫຼວດ, ເກັບກຳຂໍ້ມູນເບື້ອງຕົ້ນ ຂອງໂຄງການຝົນຝອຍໄລຍະ III ເຂດພູພຽງບໍລິເວນເມືອງປາກຊອງ ແຂວງຈຳປາສັກ ແລະ ເມືອງທ່າແຕງ ແຂວງເຊກອງວ່າ: ໂຄງການຊົນລະປະທານຝົນຝອຍ ໄລຍະທີ III ຕັ້ງຢູ່ 2 ເມືອງ ຄື: ເມືອງປາກຊອງ ແຂວງຈຳປາສັກ ແລະ ເມືອງທ່າແຕງ ແຂວງເຊກອງ ມີເນື້ອທີ່ກວມເອົາ 3 ບ້ານ, ບ້ານຫຼັກຂາວ ເມືອງທ່າແຕງ ແຂວງເຊກອງ,ບ້ານໜອງສູງ ແລະ ບ້ານລີເຈືອງ ເມືອງປາກຊອງ ແຂວງຈຳປາສັກ, ໂຄງການດັ່ງກ່າວ ສາມາດສະໜອງນ້ຳ ຫົດເນື້ອທີ່ໄດ້ທັງໝົດ 2,500 ເຮັກຕາ, ໃນນີ້ ບ້ານຫຼັກຂາວມີເນື້ອທີ່ທຳການຜະລິດ ກວມ 1,500 ເຮັກຕາ, ປູກຜັກ 400 ເຮັກຕາ ມີຄອບຄົວທຳການຜະລິດ 150 ຄອບຄົວ, ບ້ານລີເຈືອງມີເນື້ອທີ່ 1,200 ເຮັກຕາ, ປູກຜັກ 400 ເຮັກຕາ ມີຄອບຄົວທຳການຜະລິດ 200 ຄອບຄົວ ແລະ ບ້ານໜອງສູງມີເນື້ອທີ່ທຳການຜະລິດ 800 ເຮັກຕາ, ປູກຜັກ 200 ເຮັກຕາ ມີຄອບຄົວທຳການຜະລິດ 140 ຄອບຄົວ, ເຊີ່ງປະຈຸບັນເຂດດັ່ງກ່າວ ໄດ້ສຸມໃສ່ການປູກກາເຟ ແລະ ພືດຜັກ ເປັນຕົ້ນ ຜັກກະຫຼໍ່າປີ, ຜັກກາດຫໍ່ ແລະ ໝາກສະເວີ່, ການຜະລິດແມ່ນກະແຈກກະຈາຍ ໄປຕາມລຽບແຄມສາຍຫ້ວຍ ນ້ຳທຳມະຊາດ ແລະ ເຈາະນຳບາດານ ເພື່ອສະໜອງນ້ຳໃນການທຳການຜະລິດຂອງເຂົາເຈົ້າ.
  ໂອກກາດດ່ຽວກັນນີ້ ທ່ານ ປອ ພວງປະຣີສັກ ປຣະວົງວຽງຄຳ, ຮອງລັດຖະມົນຕີ ກະຊວງກະສິກຳ-ປ່າໄມ້ ກໍ່ໄດ້ຮຽກຮອງມາຍັງການນຳຂອງແຂວງ, ເມືອງ ແລະ ບໍລິສັດທີ່ຈະມາລົງທຶນໃນວຽກງານ ໂຄງການຊົນລະປະທານຝົນຝອຍ ໃນຄັ້ງນີ້ຈົ່ງສຶກສາຂໍ້ມູນຢ່າງລະອຽດ ຊັດເຈນ ເພື່ອເປັນການສ້າງຄວາມສະດວກ ໃນການປະຕິບັດໂຄງການດັ່ງກ່າວ ໃຫ້ມີປະສິດທິຜົນສູງ ແລະ ເປັນການສ້າງເງື່ອນໄຂ ທີ່ຈະເຮັດໃຫ້ການສະໜັບສະໜູນ ທຶນຊ່ວຍເຫຼື່ອຈາກລັດຖະບານ ປະເທດ ໂອ ຕຣິດ ໃຫ້ໄດ້ຕາມເປົ້າໝາຍທີ່ວາງໄວ້, ເຊີ່ງທັງນີ້ ຍາມໃດພັກ-ລັດຂັ້ນເທິງ ກໍ່ໄດ້ໃຫ້ຄວາມສໍາຄັນ ຕໍ່ຊີວິດການເປັນຢູ່ຂອງພໍ່ແມ່ປະຊາຊົນບັນດາເຜົ່າ ໃນການສ້າງອາຊີບສ້າງວຽກເຮັດງານທໍາ ເພື່ອວ່າໃຫ້ເຂົາເຈົ້າຫຼຸດພົ້ນອອກຈາກ ຄວາມທຸກຍາກເທື່ອລະກ້າວ.
                                                                          ຂ່າວພາບ : ພອນເພັດ ຄຳວິທອນ