ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ທ່າແຕງ ວາງແຜນສ້າງຄວາມຍືນຍົງບ້ານ ສຈຊ ທີ່ໄດ້ກະກາດແລ້ວ.

   ກອງປະຊຸມວາງແຜນ ເພື່ອສ້າງຄວາມຍືນຍົງກ່ຽວກັບ ການສ້າງບ້ານສາທາລະນະສຸກແບບຢ່າງ ແລະ ຊຸມຊົນເປັນເຈົ້າການ ດ້ານສຸຂະອະນາໄມ ຫຼື ບ້ານ ສຈຊ ເມືອງທ່າແຕງ ແຂວງເຊກອງ ຈັດຂື້ນ ແລະ ອັດລົງໃນວັນທີ 2 ກຸມພາ 2017 ນີ້ ຢູ່ທີ່ສະໂມສອນເມືອງ ໂດຍການເປັນປະທານຂອງທ່ານ ຄໍາໄພ ສິມມາວັດ ຄະນະປະຈໍາພັກເມືອງ ຮອງເຈົ້າເມືອງ ທ່າແຕງ ຜູ້ຊີ້ນໍາຂົງເຂດວຽກງານ ຂົງເຂດວັດທະນະທໍາສັງຄົມ, ເປັນກຽດເຂົ້າຮ່ວມຂອງທ່ານ ວິສັນ ອິນທະວົງ ກໍາມະການພັກແຂວງ ຫົວໜ້າພະແນກສາທາລະນະສຸກແຂວງ ເຊກອງ, ມີຫົວໜ້າ ແລະ ຮອງຫ້ອງການກ່ຽວຂ້ອງ, ຄະນະກໍາມະການ, ຫົວໜ້າເຂດຈຸດສຸ່ມພັດທະນາ 6 ເຂດ, ອົງການປົກຄອງບ້ານເຂົ້າຮ່ວມ.
   ທ່ານ ກໍລະກັນ ບຸດສະບາ ຮອງຫົວໜ້າ ຫ້ອງການສາທາລະນະສຸກເມືອງ ທ່າແຕງກ່າວວ່າ: ພາຍຫຼັງທີ່ປະກາດເມືອງທ່າແຕງ ເປັນເມືອງສາທາລະນະສຸກແບບຢ່າງ ແລະ ຊຸມຊົນເປັນເຈົ້າການດ້ານວຽກສຸຂະອະນາໄມ ຄັ້ງວັນທີ 19 ທັນວາ 2016 ຜ່ານມາ ອໍານາດການປົກຄອງບ້ານ ພ້ອມດ້ວຍປະຊາຊົນພາຍໃນບ້ານ ໄດ້ມີຄວາມເຊື່ອມຊຶມ ຕໍ່ວຽກງານໂຄສະນາສຸຂະສຶກສາ ເປັນຢ່າງດີ, ໂດຍເພື່ອເຮັດໃຫ້ ບ້ານ ສຈຊ ສາມາດຮັກສາມູນເຊື້ອ ແລະ ເພື່ອໃຫ້ວຽກງານນີ້ ມີຄວາມຍືນຍົງ ຄະນະກໍາມະການ ແລະ ຂະແໜງການທີ່ກ່ຽວຂ້ອງ ໄດ້ສືບຕໍ່ເອົາໃຈໃສ່ຕິດຕາມຊຸກຍູ້ຢ່າງໃກ້ຊິດ ໂດຍໄດ້ມີການວາງແຜນການເຄື່ອນໄຫວ ໃນແຕ່ລະໄລຍະເປັນຕົ້ນ: ໄດ້ຊຸກຍູ້ຈັດຕັ້ງປະຕິບັດ ການອະນາໄມສິ່ງແວດລ້ອມ, ແຕ່ລະຄອບຄົວ ມີວິດຖ່າຍຖືກຫຼັກອະນາໄມ, ໄດ້ປະຕິບັດອະນາໄມ 3 ສະອາດໄດ້ດີ, ທຸກຄົນໃນຄົວເຮືອນໄດ້ນອນໃນມຸ້ງ ຍ້ອມຢາ, ມີການວາງແຜນຄອບຄົວ, ການຝາກທ້ອງ, ເກີດລູກ, ການລ້ຽງລູກດ້ວຍນໍ້ານົມແມ່ແຕ່ມື້ເກີດຮອດ 6 ເດືອນ, ມີຄອກສັດເປັນຂອງຕົນເອງ, ຕື່ນຕົວເອົາແມ່ໃນເກນອາຍຸຈະເລີນພັນ ແລະ ລູກອາຍຸຕໍ່າກວ່າ 1 ປີໄປສັກຢາ-ຢອດຢາ ກັນພະຍາດໃຫ້ຄົບຖ້ວນ, ເວລາເຈັບເປັນຕ້ອງໄປໃຊ້ບໍລິການຢູ່ສຸກສາລາ ຫຼື ໂຮງໝໍບ່ອນທີ່ມີເງື່ອນໄຂ, ລວມໄປເຖິງການລາຍງານຂໍ້ມູນ-ຂ່າວສານທີ່ຖືກຕ້ອງຄບຖ້ວນ ຕາມຂັ້ນຕອນຂອງຮູບແບບການສ້າງບ້ານສາທາລະນະສຸກແບບຢ່າງ.
   ໂອກາດນີ້ ທ່ານ ຄໍາໄພ ສິມມາວັດ ຄະນະປະຈໍາພັກເມືອງ ຮອງເຈົ້າເມືອງ ທ່າແຕງ ຜູ້ຊີ້ນໍາຂົງເຂດວັດທະນະທໍາສັງຄົມ ໄດ້ເນັ້ນໃຫ້ ຄະນະກໍາມະການຂັ້ນເມືອງ, ຂັ້ນແຂວງ, ຂັ້ນບ້ານ ສືບຕໍ່ເປັນເຈົ້າການຊີ້ນໍາ-ນໍາພາ ຈັດຕັ້ງປະຕິບັດວຽກການສ້າງບ້ານສາທາລະນະສຸກແບບຢ່າງ ແລະ ຊຸມຊົນເປັນເຈົ້າການມີຄວາມຍືນຍົງ ດ້ວຍການປະຕິບັດລະບຽບການ, ມາດຕະການ, ແບບແຜນວິທີເຮັດວຽກ, ມີການກວດກາ-ຕິດຕາມເປັນປົກກະຕິ, ທັງນີ້ ກໍເພື່ອເຮັດໃຫ້ ບ້ານ ສຈຊ ຂອງເມືອງທີ່ໄດ້ປະກາດແລ້ວນັ້ນ ໄດ້ສືບຕໍ່ປະຕິບັດຄົບຖ້ວນມາດຖານ-ເງື່ອນໄຂບ້ານ ສຈຊ ແລະ ມີຄວາມຍືນຍົງຕໍ່ໄປ,
                                                                              ຂ່າວ-ພາບ: ພອນ ບຸນອຸທິດ