ວັນສຸກ, 15 ພະຈິກ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ຊາວແຂວງເຊກອງ ຮ່ວມແຫ່ກອງບຸນ, ຂັນໝາກເບັງ ແລະ ຕົ້ນກະລາພຶກ ໃນເທສະການເສົາຫຼັກເມືອງ

 

   ໃນມື້ຂຶ້ນ 14 ຄໍ່າ ເດືອນຍີ່ ພ.ສ 2560 ກົງກັບວັນທີ 11 ມັງກອນ ຄ.ສ 2017 ປວງຊົນຊາວແຂວງເຊກອງ ນ້ອຍ-ໃຫຍ່ ທຸກຖ້ວນໜ້າໄດ້ຮ່ວມກັນແຫ່ກອງບຸນ, ແຫ່ຂັນໝາກເບັງ ແລະຕົ້ນກາລະພຶກ ຂອງບັນດາເຜົ່າຢ່າງຄຶກຄື້ນ ເນື່ອງໃນງານບຸນເທສະການເສົາຫຼັກເມືອງ ຂອງແຂວງເຊກອງ ປະຈໍາປີ 2017 ທີ່ຈັດຂຶ້ນໃນລະຫວ່າງ ວັນທີ 10-13 ມັງກອນ 2017 ນີ້.
   ງານບຸນເທດສະການເສົາຫຼັກເມືອງ ແຂວງເຊກອງ ແມ່ນງານບຸນເທດສະການປະຈໍາປີ ທີ່ຍິ່ງໃຫຍ່ ຂອງຊາວແຂວງເຊກອງ ອັນເປັນການອະນຸລັກຮັກສາມູນເຊື້ອ ວັດທະນະທໍາ ແລະຮີດຄອງປະເພນີອັນດີງາມ ຂອງປະຊາຊົນບັນດາເຜົ່າຊາວແຂວງເຊກອງ ໄປຄຽງຄູ່ກັບ ການສ້າງຄຸນຄ່າຂອງເສົາຫຼັກເມືອງ ໃຫ້ເປັນສິ່ງສັກສິດ, ສິ່ງສັກກາລະບູຊາ ແລະ ເປັນສູນລວມທາງດ້ານຈິດໃຈ ຂອງປະຊາຊົນບັນດາເຜົ່າ ຊາວແຂວງເຊກອງ. ງານດັ່ງກ່າວ ຖືເປັນງານປະຈໍາປີ ແລະ ຈະໄດ້ຈັດຂຶ້ນເປັນປະຈໍາໃນທຸກໆປີ, ສໍາລັບປີນີ້ກໍ່ມີຫຼາຍກິດຈະກໍາ ທີ່ສ້າງຄວາມສົນໃຈເປັນຢ່າງຍິ່ງ ຕໍ່ແຂກຕ່າງດ້າວຊາວຕ່າງແດນ ທີ່ມາພົບເຫັນ ໂດຍສະເພາະ ຂະບວນການແຫ່ຂັນໝາກເບັງ 9 ກາບ 100 ຂັນ, ແລະ ຕົ້ນກາລະພຶກຂອງຊາວແຂວງເຊກອງ ສ້າງຄວາມຕື່ນຕາຕື່ນໃຈ ໃຫ້ແກ່ແຂກຕ່າງດ້າວຊາວຕ່າງແດນ. ໂດຍແຫ່ອ້ອມສວນເສົາຫຼັກເມືອງ 3 ຮອບ ຈາກນັ້ນມີພິທີການສູດປະຣິຕະມຸງຄຸນ ໂດຍມີພຣະສົງຈາກ 18 ວັດ 32 ອົງເຂົ້າຮ່ວມ, ສໍາລັບໃນຕອນຄໍ່າຄືນ ກໍ່ຈະເປັນການຄົບງັນຕາມປະເພນີ ແລະ ຊົມການສະແດງສິລະປະ ວັນນະຄະດີຫຼາກຫຼາຍລາຍການນໍາອີກ.
   ບັນຍາກາດຂະບວນການດັ່ງກ່າວ ເຕັມໄປດ້ວຍຄວາມເບີກບານມ່ວນຊື່ນ ຂອງພໍ່ແມ່ປະຊາຊົນບັນດາເຜົ່າ ຊາວແຂວງເຊກອງ ເຊິ່ງສະແດງອອກໃນການສົ່ງສຽງ ໂຮຮ້ອງຢ່າງຟົດສະໜັ່ນ ມີຂະບວນແຫ່ກອງບຸນ, ຂັນໝາກເບັງ ແລະຕົ້ນກາລະພຶກ ທີ່ີມາຈາກຫຼາຍພາກສ່ວນ ຊຶ່ງໃຫ້ກຽດນໍາພາຂະບວນການແຫ່ໂດຍ ທ່ານ ປອ ແພງສີ ສີລາວີ ເຈົ້າເມືອງ-ເມືອງລະມາມ, ມີຄະນະສະມາຊິກສະພາແຫ່ງຊາດເຂດທີ 16, ຄະນະນໍາພັກ-ລັດ ແຂວງ-ເມືອງ ພ້ອມດ້ວຍພໍ່ແມ່ປະຊາຊົນບັນດາເຜົ່າ ຊາວແຂວງເຊກອງ ທຸກຖ້ວນໜ້າເຂົ້າຮ່ວມ ຢ່າງເປັນຂະບວນຄັບຄາໜາແໜ້ນ.
                                                                         ຂ່າວ-ພາບ: ນາລີວັນ