ວັນພຸດ, 23 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ທ່ານ ຄຳໄຕ ສີພັນດອນ ໂອ້ລົມການນຳແຂວງເຊກອງ

 

 

    ໃນໂອກາດເຄື່ອນໄຫວຢ້ຽມຢາມແຂວງເຊກອງ ທ່ານ ຄຳໄຕ ສີພັນດອນ ອະດີດປະທານພັກ, ອະດີດປະທານປະເທດ ໄດ້ໃຫ້ກຽດພົບປະ ແລະ ໂອ້ລົມການນຳຂັ້ນຕ່າງໆ ຂອງແຂວງເຊກອງ ໂດຍໃຫ້ການຕ້ອນຮັບຢ່າງອົບອຸ່ນຂອງທ່ານ ຄຳເຜີຍ ບຸດດາວຽງ ເຈົ້າແຂວງໆເຊກອງ ທີ່ສະໂມສອນຫ້ອງວ່າການປົກຄອງແຂວງ ໃນຕອນເຊົ້າຂອງວັນທີ 6 ມັງກອນ 2017 ຜ່ານມານີ້.
    ໃນພິທີ ທ່ານ ຄຳເຜີຍ ບຸດດາວຽງ ໄດ້ລາຍງານໃຫ້ຮູ້ ສະພາບການພັດທະນາ ເສດຖະກິດ-ສັງຄົມຂອງແຂວງ ໃນໄລຍະຜ່ານມາວ່າ: ທົ່ວແຂວງ ສືບຕໍ່ມີສະຖຽນລະພາບ ທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ-ປອດໄພ ໂດຍພື້ນຖານ, ການນຳພັກ-ລັດແຕ່ລະຂັ້ນ ນັບແຕ່ຂັ້ນແຂວງ ລົງຮອດທ້ອງຖິ່ນ ໄດ້ເພີ່ມທະວີ ເອົາໃຈໃສ່ຊີ້ນຳ-ນຳພາສະມາຊິກພັກ, ພະນັກງານ ແລະ ປະຊາຊົນບັນດາເຜົ່າ ປະຕິບັດມະຕິ, ຄຳສັ່ງແນະນຳຕ່າງໆ ຂອງພັກ-ລັດຂັ້ນເທິງວາງອອກ, ຊີ້ນຳ-ນຳພາປັບປຸງ-ກໍ່ສ້າງກຳລັງປ້ອງກັນຊາດ-ປ້ອງກັນຄວາມສະຫງົບ ຢ່າງຕໍ່ເນື່ອງ ຊຶ່ງເຮັດໃຫ້ເສດຖະກິດຂອງແຂວງ ນັບມື້ຂະຫຍາຍຕົວເພີ່ມຂຶ້ນ ໂດຍໃນສົກປີ 2015-2016 ລວມຍອດລາຍຮັບ GDP ສະເລ່ຍຕໍ່ຫົວຄົນໄດ້ 12,1 ລ້ານກີບ ຫຼື ເທົ່າກັບ 1.524 ໂດລາຕໍ່ຄົນຕໍ່ປີ ແລະ ອັດຕາຄວາມທຸກຍາກ ເຫຼືອພຽງ 10% ຂອງຈຳນວນຄອບຄົວທົ່ວແຂວງ.
    ຄຽງຄູ່ກັນນີ້, ແຂວງຍັງໄດ້ສຸມໃສ່ ພັດທະນາດ້ານວັດທະນະທຳ-ສັງຄົມ ຊຶ່ງໃນນີ້, ໄດ້ເລັ່ງໃສ່ວຽກງານສຶກສາ ແລະ ສາທາລະນະສຸກເປັນຕົ້ນຕໍ ທັງນີ້ ກໍ່ເພື່ອແນໃສ່ ເຮັດໃຫ້ຕົວເລກຄາດໝາຍທີ່ກຳນົດໄວ້ ໃນເປົ້າໝາຍສະຫະສະວັດ ດ້ານການພັດທະນາຂອງປະເທດ ເວົ້າລວມ, ເວົ້າສະເພາະ ແມ່ນຂອງແຂວງ ໃຫ້ສຳເລັດຜົນໂດຍໄວ ແລະ ອັນທີ່ພົ້ນເດັ່ນໃນປັດຈຸບັນ ແມ່ນການປະຕິບັດວຽກງານ 3 ສ້າງ ກຳລັງເນີນໄປ ຢ່າງເປັນຂະບວນຟົດຟື້ນ ແລະ ມີຜົນສຳເລັດຫຼາຍໆ ດ້ານທີ່ໜ້າພໍໃຈ.
    ໃນໂອກາດນີ້ ທ່ານ ຄຳໄຕ ສີພັນດອນ ກໍ່ໄດ້ມີການເຈາະຈີ້ມໃນຫຼາຍໆ ບັນຫາ ເພື່ອໃຫ້ການນຳຂອງແຂວງ ນຳໄປປຶກສາຫາລືກັນ ແລະ ແກ້ໄຂຕໍ່ໄປ, ພ້ອມນີ້ທ່ານຍັງເນັ້ນໃຫ້ ການນຳຂອງແຂວງ ເອົາໃຈໃສ່ຊຸກຍູ້ສົ່ງເສີມ ປະຊາຊົນຜະລິດກະສິກຳເປັນສິນຄ້າ ໃຫ້ຫຼາຍຂຶ້ນ, ແກ້ໄຂຈຸດອ່ອນ, ຂໍ້ຄົງຄ້າງ ແລະ ສິ່ງທີ່ເປັນບັນຫາທ້າທາຍ ຕໍ່ການພັດທະນາເສດຖະກິດ-ສັງຄົມຂອງແຂວງ ໃຫ້ຕົກໄປ, ແກ້ໄຂຄວາມທຸກຍາກຂອງປະຊາຊົນ ໃຫ້ນັບມື້ຫຼຸດລົງເປັນກ້າວໆ ແລະ ສຳເລັດໂດຍພື້ນຖານ ໃນປີ 2020; ສິ່ງສຳຄັນຕ້ອງສຸມໃສ່ ປະຕິບັດວຽກງານ 3 ສ້າງ ສະໜອງເງື່ອນໄຂທີ່ຈຳເປັນ ເຂົ້າໃນການຈັດຕັ້ງປະຕິບັດແຜນການ ການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາຢູ່ແຂວງເຊກອງ ປະກົດຜົນເປັນຈິງໂດຍໄວ ຕາມຈຸດປະສົງ ແລະ ລະດັບຄາດໝາຍທີ່ພັກ-ລັດຖະບານວາງອອກ.
                                                                                 ( ຂ່າວພາບ: ປີຊາ ສິງສັກສິດ )