ວັນຈັນ, 11 ພະຈິກ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເຊກອງຕີລາຄືນການຈັດຕັ້ງປະຕິບັດວຽກງານສາທາລະນະສຸກ ປະຈຳປີ 2016


   ກອງປະຊຸມຕີລາຄາຄືນ ການຈັດຕັ້ງປະຕິບັດ ວຽກງານສາທາລະນະສຸກ ປະຈຳປີ 2016 ໄດ້ໄຂຂຶ້ນໃນວັນທີ 8 ກຸມພາ 2017 ນີ້ ຢູ່ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຮ່ວມ ຂອງທ່ານ ຄໍາພອນ ພຸດທະວົງ ຮອງລັດຖະມົນຕີ ກະຊວງສາທາລະນະສຸກ, ທ່ານ ຖາວອນ ພົມມະໄລລຸນ ຮອງເຈົ້າແຂວງ-ແຂວງເຊກອງ, ຜູ້ຊີ້ນຳວຽກງານວັດທະນະທຳ-ສັງຄົມ, ທ່ານ ວິສັນ ອິນທະວົງ ຫົວໜ້າພະແນກ ສາທາລະນະສຸກແຂວງ, ມີຫົວໜ້າກົມປິ່ນປົວ, ຫົົວໜ້າ ຫຼື ຮອງພະແນກການ ອ້ອມຂ້າງແຂວງ, ຕາງໜ້າພະແນກສາທາລະນະສຸກ ແຂວງຈຳປາສັກ ແລະອັດຕະປື, ຄູ່ຮ່ວມພັດທະນາ, ຮອງເຈົ້າເມືອງ ແລະ ຕ່າງໜ້າຫ້ອງສາທາລະນະສຸກ ທັງ 4 ເມືອງ, ຕະຫຼອດຮອດພະນັກງານວິຊາການ ພະແນກດັ່ງກ່າວເຂົ້າຮ່ວມ.
   ທ່ານ ດຣ ຄໍາໄຫຼ ສັນຕິພູມ ຮອງຫົວໜ້າພະແນກ ສາທາລະນະສຸກແຂວງ ໄດ້ລາຍງານການຈັດຕັ້ງປະຕິບັດ ວຽກງານສາທາລະນະສຸກ ໃນປີ 2016 ຜ່ານມາວ່: ໃນ 1 ປີຜ່ານມາ ວຽກງານສາທາລະນະສຸກແຂວງເຊກອງ ໄດ້ເຄື່ອນໄຫວ ຈັດຕັ້ງປະຕິບັດ ແລະ ມີຜົນສໍາເລັດຫຼາຍດ້ານ ໂດຍການສະຫຼຸບ-ສັງລວມ ຜົນການຈັດຕັ້ງປະຕິບັດ MDGs ຕິດພັນກັບ ການພັດທະນາແບບຍືນຍົງ SDG, ໄດ້ຊີ້ໃຫ້ເຫັນວ່າ: ການລົບລ້າງຄວາມທຸກຍາກ ແລະ ຕ້ານໄພອຶດຫິວ ມີເດັກຂາດສານອາຫານ ແບບເຕ້ຍ ຍັງເຫຼືອ 46,4%, ເດັກນ້ຳໜັກຫຼຸດມາດຕະຖານ ຍັງເຫຼືອ 28,9%, ອັດຕາການຕາຍ ຂອງເດັກລຸ່ມ 1 ປີ ເດັກເກີດມີຊີວິດ (ໄດ້ຮັບລາຍງານ) ມີ 38,54%, ເດັກເກີດມີຊີວິດ (ຄາດຄະເນ) 38,5%, ອັດຕາການຕາຍຂອງເດັກນອ້ຍ ລຸ່ມ 5 ປີ ເດັກເກີດມີຊີວິດ (ໄດ້ຮັບລາຍ) 45,22 %, ເດັກເກີດມີຊີວິດ (ຄາດຄະເນ) 45,17%, ວຽກງານອະນາໄມສີ່ງແວດລອ້ມ ແລະ ຈັດຫານ້ຳສະອາດ ກໍ່ໄດ້ເອົາໃຈໃສ່ ເຮັດໃຫ້ອັດຕາການຊົມໃຊ້ນ້ຳສະອາດ 69,22%, ອັດຕາຊົມໃຊ້ວິດຖ່າຍ ແບບຄອບຄົວ 56,22%, ອັດຕາຊົມໃຊ້ວິດຖ່າຍໂຮງຮຽນ 69,41%, ວຽກງານກັນພະຍາດ ແລະ ຄວບຄຸມພະຍາດຕິດຕໍ່ ມີຄົນມາຮັບບໍລິການກວດເລືອດຫາເຊື້ອ ເອສໄອວີ 409 ຄົນ, ຍິງ 47 ຄົນ, ມີຜູ້ຕິດເຊື້ອ 4 ຄົນ ຍິງ 2 ຄົນ, ວຽກງານຄວບຄຸມແມ່ກາຟາກ, ໄຂ້ຍຸງ ແລະ ແມງໄມ້ ມີຈຳນວນຄົນກວດອາຈົມທັງໝົດ 441 ຄົນ, ພົບເຊື້ອກາຝາກ 93 ຄົນ, ວຽກງານຄວບຄຸມພາຫານະນຳເຊື້ອ ໄດ້ເອົາໃຈໃສ່ປຸກລະດົມປະຊາຊົນ ໃຫ້ນອນໃນມຸ້ງຍອ້ມຢາ ແລະ ໄດ້ຈັດສົ່ງມຸ້ງໃຫ້ບັນດາບ້ານ ໃນ 4 ຕົວເມືອງ, ຈຳນວນ 47.950 ດາງ, ນອກນີ້ ກໍ່ໄດ້ມີການສຳຫຼວດ ໜອນນ້ຳຍຸງລາຍ, ທຳລາຍແຫຼ່ງເພາະພັນຍຸງ ແລະ ແລະ ແຈກຢາຍຢາຂ້າໜອນນ້ຳ ໃຫ້ປະຊາຊົນຕາມເປົ້າໝາຍ ຢ່າງທົ່ວເຖິງ, ວຽກງານຄວບຄຸມພະຍາດ ວັນນະໂລກ ກວດພົບມີກໍລະນີສົງໃສທັງໝົດ 515 ກໍລະນີ, ສາມາດປີ່ນປົວຫາຍດີ 39 ກໍລະນີ, ເສຍຊີວິດ 4 ກໍລະນີ ແລະ ຜູ້ທີ່ມີການປີ່ນປົວຄົບກຳນົດ 7 ກໍລະນີ, ວຽກງານປົກປ້ອງຜູ້ບໍລິໂພກ ອາຫານ ແລະ ຢາ ໄດ້ເອົາໃຈໃສ່ຄຸ້ມຄອງ, ສົ່ງເສີມ, ຄົ້ນຄວ້າ ແລະ ນຳໃຊ້ຊັບພະຍາກອນທຳມະຊາດ ທີ່ເປັນຢາ, ຢາພື້ນເມືອງ ແລະ ຜະລິດຕະພັນເສີມສຸຂະພາບ ເຂົ້າໃນລະບົບສາທາລະນະສຸກ; ນອກນີ້ ກໍ່ໄດ້ຮວ່ມກັບເຈົ້າໜ້າທີ່ ແລະ ພາກສ່ວນທີ່ກ່ຽວຂ້ອງ ລົງກວດ ຮ້ານຂາຍເຄື່ອງຍ່ອຍທົ່ວໄປ 107 ຮ້ານ, ພົບສິນຄ້າປະເພດຕ່າງໆ ທີ່ໝົດອາຍຸການນໍາໃຊ້ ທັງໝົດ 288 ລາຍການ ມີມູນຄ່າ 87.162.000 ກີບ ເຊິ່ງໄດ້ອາຍັດໄວ້ ແລ້ວທຳລາຍຖິ້ມ, ກວດກາອາຫານສົດ, ອາຫານແຊ່ແຂງ ຈຳນວນ 46 ຕົວຢ່າງ ພົບສານຟອກມາລີນປົນເປື້ອນ 28 ຕົວຢ່າງ, ສ່ວນວຽກງານກອງທືນປະກັນສຸຂະພາບ ກໍ່ໄດ້ເອົາໃຈໃສ່ເອື້ອອຳນວຍຄວາມສະດວກ ໃຫ້ປະຊາຊົນບັນດາເຜົ່າ ໄດ້ເຂົ້າເຖິງ ສະຖານບໍລິການ ໂດຍສະເພາະ ໄດ້ມີກອງທືນສຸຂະພາບ ສຳຫຼັບຜູ້ທຸກຍາກ, ນະໂຍບາຍເກີດລູກຂອງແມ່ຍິງຖືພາ ແລະ ປີ່ນປົວເດັກນອ້ຍລຸ່ມ 5 ປີ ໂດຍບໍ່ເສຍຄ່າ.

   ປະຈຸບັນແຂວງເຊກອງ ມີໂຮງໝໍແຂວງ 1 ແຫ່ງ, ໂຮງໝໍກອງບັນຊາການ ທະຫານແຂວງ 1 ແຫ່ງ, ໂຮງໝໍເມືອງ 3 ແຫ່ງ, ສຸກສາລາ 28 ແຫ່ງ, ຮ້ານຂາຍຢາເອກກະຊົນ 36 ແຫ່ງ, ຄຣີນິກ 7 ແຫ່ງ,ບ້ານສາທາລະນະສຸກແບບຢ່າງ 89 ບ້ານ ແລະ ບ້ານຊຸມຊົນເປັນເຈົ້າການ ໃນວຽກງານສຸຂະອານາໄມ 51 ບ້ານ.

   ພ້ອມນີ້ຜູ້ເຂົ້າຮ່ວມກອງປະຊຸມ ກໍ່ໄດ້ພ້ອມກັນ ປະກອບຄຳຄິດເຫັນ ແລກປ່ຽນ ຖອດຖອນບົດຮຽນເຊີ່ງກັນແລະ ກັນ ເພື່ອຍົກໃຫ້ເຫັນດ້ານດີທີ່ຕັ້ງໜ້າ ແລະ ພ້ອມກັນແກ້ໄຂ ບັນດາຂໍ້ຄົງຄ້າງ ທີ່ປະຕິບັດບໍ່ທັນໄດ້ດີ, ພອ້ມນັ້ນ ກໍ່ໄດ້ມີການມອບໃບຍອ້ງຍໍ ໃຫ້ບັນດາພະນັກງານຜູ້ທີ່ມີຜົນງານດີເດັ່ນ-ຫ້າວຫັນ ໃນການຈັດຕັ້ງປະຕິບັດ ໜ້າທີ່ວຽກງານໃນສົກປີຜ່ານມາ ຕື່ມອີກ.
                                                                                        ພາບ-ຂ່າວ: ພຸດທະສອນ