ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ປະຕິບັດຫຼາຍສິບໂຄງການ ແກ້ໄຂຄວາມທຸກຍາກຢູ່ ແຂວງເຊກອງ

    ພັກ ແລະ ລັດຖະບານ ໄດ້ມີຄວາມເອົາໃຈໃສ່ ຕໍ່ການຈັດຕັ້ງປະຕິບັດ ວຽກງານ ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ໃນຂອບເຂດທົ່ວປະເທດ ຢ່າງຈິງຈັງ ຊຶ່ງ ແຂວງເຊກອງ ກໍເປັນແຂວງໜຶ່ງ ໃນບັນດາແຂວງ ທີ່ຖືກປະຕິບັດ ໂດຍໃນສົກປີ 2015-2016 ສະພາໄດ້ອະນຸມັດໂຄງການລົງທຶນ ກໍ່ສ້າງພື້ນຖານໂຄງລ່າງ ຈຳນວນ 53 ໂຄງການ, ມູນຄ່າ 5,5 ຕື້ກີບ ເພື່ອຍົກຖານະ ແລະ ຊີວິດການເປັນຢູ່ ຂອງປະຊາຊົນແຂວງດັ່ງກ່າວ ໃຫ້ດີຂຶ້ນເທື່ອລະກ້າວ.
    ຕາມການລາຍງານ ຂອງ ທ່ານ ເຫຼັກໄຫຼ ສີວິໄລ ຮອງເຈົ້າແຂວງໆເຊກອງ ໃນວັນທີ 20 ທັນວານີ້ວ່າ: ວຽກງານກໍ່ສ້າງຮາກຖານການເມືອງ, ການພັດທະນາຊົນນະບົດ ແລະ ລຶບລ້າງຄວາມທຸກຍາກ ຕິດພັນກັບວຽກງານ 3 ສ້າງ ແຂວງເຊກອງໄດ້ຖືກຈັດຕັ້ງ ຢ່າງຈິງຈັງ, ຕໍ່ເນື່ອງ ແລະ ສາມາດຍາດໄດ້ ຜົນສຳເລັດຫຼາຍດ້ານ ທີ່ພົ້ນເດັ່ນ ໂດຍສະເພາະແມ່ນ ສືບຕໍ່ປະຕິບັດ ໂຄງການລົງທຶນ ທີ່ສະພາແຫ່ງຊາດ ໄດ້ອະນຸ ມັດຈຳນວນ 53 ໂຄງການ, ມູນຄ່າ 5,5 ຕື້ກີບ ໃນນີ້ປະກອບມີ ທຶນພັດທະນາຊົນນະບົດ ແລະ ລຶບລ້າງຄວາມທຸກຍາກ 42 ໂຄງການ, ມູນຄ່າ 4 ຕື້ກີບ; ທຶນຈັດສັນພູມລຳເນົາ ແລະ ບ່ອນທຳມາຫາກິນ ແບບຖາວອນ 11 ໂຄງການ, ມູນຄ່າ 1,5 ຕື້ກີບ ຊຶ່ງມາຮອດປັດຈຸບັນ ໄດ້ຈັດຕັ້ງປະຕິບັດ ສຳເລັດແລ້ວ 100%.
ນອກນັ້ນ ຍັງມີກອງທຶນ ຫຼຸດຜ່ອນຄວາມທຸກຍາກ (ທລຍ), ທຶນສິນເຊື່ອ ຂອງທະນາຄານ ແລະ ສະຖາບັນການເງິນຕ່າງໆ ທີ່ປ່ອຍກູ້ໃຫ້ຄອບຄົວປະຊາຊົນ ຜູ້ທີ່ຕ້ອງການທຶນ ໃນການພັດທະນາ ຊີວິດການເປັນຢູ່ ແລະ ພັດທະນາເສດຖະກິດ ຄອບຄົວຂອງເຂົາເຈົ້າ ໃຫ້ກາຍເປັນທຸລະກິດ ຂະໜາດນ້ອຍ ແລະ ຂະໜາດກາງ ເພື່ອສາມາດແຂ່ງຂັນ ກັບຕະຫຼາດພາກພື້ນ ແລະ ສາກົນໄດ້ໃນອະນາຄົດ.
    ໂດຍສາມາດ ລຶບລ້າງຄວາມທຸກຍາກ ໃນປີ 2016 (ຕາມດຳລັດ 309/ນຍ) ປະຕິບັດໄດ້ 327 ຄອບຄົວຍັງເຫຼືອ 2.085 ຄອບຄົວເທົ່າ 10% ແລະ ລຶບລ້າງ ບ້ານທຸກຍາກໄດ້ 6 ບ້ານ ຍັງເຫຼືອ 55 ບ້ານເທົ່າກັບ 27,5% ແລະ ອີກກວ່າ 20% ແມ່ນຈໍານວນ ຄົນທຸກຍາກ ໃນປັດຈຸບັນ ທົ່ວແຂວງ ໄດ້ຢັ້ງຢືນຮັບຮອງ ເປັນບ້ານພັດທະນາແລ້ວ 74 ບ້ານກວມ 37% ແລະ ຄອບຄົວພັດທະນາ 16.896 ຄອບຄົວ ກວມເອົາ 85,23% ຂອງ ຄອບຄົວທັງໝົດ.
    ທ່ານ ເຫຼັກໄຫຼ ສີວິໄລ ໃຫ້ຮູ້ອີກວ່າ: ສຳລັບປີ 2017 ແຂວງຈະສືບຕໍ່ ປະຕິບັດວຽກງານຈຸດສຸມ ທີ່ເປັນບູລິມະສິດ ໂດຍສະເພາະແມ່ນ ວຽກເຕົ້າໂຮມ ບ້ານນ້ອຍເຂົ້າເປັນ ບ້ານໃຫຍ່ ແລະ ສ້າງບ້ານໃຫຍ່ ໃຫ້ເປັນຕົວເມືອງນ້ອຍ ຢູ່ຊົນນະບົດ; ວຽກຈັດສັນພູມລຳເນົາ ແລະ ບ່ອນທຳມາຫາກິນ ແບບຖາວອນ; ວຽກສົ່ງເສີມ ການຜະລິດກະສິກຳ ເປັນສິນຄ້າ ຄຽງຄູ່ກັບການພັດທະນາ ພື້ນຖານໂຄງລ່າງ ເປັນຕົ້ນແມ່ນເສັ້ນທາງໄປ 2 ເມືອງພູດອຍ (ກະລຶມ-ດາກຈຶງ) ໃຫ້ສາມາດ ທຽວໄດ້ ສອງລະດູ ເພື່ອສ້າງສິ່ງອຳນວຍ ຄວາມສະດວກ ແກ່ປະຊາຊົນໄປມາາຫາສູ່ ແລະ ແລກປ່ຽນຊື້-ຂາຍສິນຄ້າ ເຊິ່ງກັນ ແລະ ກັນ ແນໃສ່ ແກ້ໄຂຄວາມທຸກຍາກປະຊາຊົນ ໃຫ້ນັບມື້ ຫຼຸດໜ້ອຍຖອຍລົງ.
                                                                         ( ຂ່າວ : ສັນຍາ ແກ້ວໄຊຍະວົງ )