ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ປະກາດເມືອງທ່າແຕງ ເປັນເມືອງ ສາທາລະນະສຸກແບບຢ່າງ

   

    ພິທີປະກາດເມືອງທ່າແຕງ ແຂວງເຊກອງ ເປັນເມືອງ ສາທາລະນະສຸກແບບຢ່າງ ໄດ້ຈັດຂຶ້ນໃນວັນທີ 19 ທັນວາ 2016 ນີ້ ຢູ່ທີ່ເດີ່ນກິລາ ເມືອງທ່າແຕງ ໂດຍ ເປັນກຽດເຂົ້າຮ່ວມຂອງທ່ານ ນີສອນ ວືອິນຢາວ ຮອງປະທານ ສະພາປະຊາຊົນແຂວງເຊກອງ, ມີ ດຣ ພັດ ກິ່ງສະເນດ ຫົວຫນ້າກົມອະນາໄມກັນພະຍາດ ແລະ ສົ່ງເສີມສຸຂະພາບ ກະຊວງສາທາລະນະສຸກ, ມີບັນດາພະແນກການ ອ້ອມຂ້າງແຂວງ, ການນຳເມືອງ, ພ້ອມດ້ວຍກ້ອນກຳລັງ ເຍົາວະຊົນ, ນັກຮຽນ,ຊາວໜຸ່ມ, ປະຊາຊົນບ້ານອ້ອມຂ້າງ ເທດສະບານເມືອງ ເຂົ້າຮ່ວມຢ່າງຫລວງຫລາຍ.
    ທ່ານ ສີສັກດາ ແສງນາລີວົງ ຫົວໜ້າຫ້ອງການ ສາທາລະນະສຸກເມືອງທ່າແຕງ ລາຍງານວ່າ: ເມືອງທ່າແຕງ ມີເນື້ອທີ່ທັງໝົດ 70.383 ກວ່າເຮັກຕາ, ມີ 6 ເຂດຈຸດສຸມພັດທະນາ, ປະກອບດ້ວຍ 48 ບ້ານ, ມີປະຊາກອນ 40.246 ຄົນ,ຍິງ 19.841 ຄົນ, ມີ 7.097 ຄົວເຮືອນ, ມີ 6.726 ຫລັງຄາເຮືອນ, ຍັງມີຄອບຄົວທຸກຍາກ 371 ຄອບຄົວ ເທົ່າກັບ 3,22%, ຕາໜ່າງສຸກສາລາ ກວມເອົາທຸກບ້ານ 100% ທົ່ວເມືອງ ມີໂຮງໝໍ 1 ແຫ່ງ, ສຸກສາລາ 7 ແຫ່ງ, ຮ້ານຂາຍຢາສ່ວນຕົວ 9 ຮ້ານ, ຄຣີນິກ 1 ແຫ່ງ, ເຊິ່ງວຽກງານສາທາລະນະສຸກ ສາມາດບັນລຸເປົ້າໝາຍ MDG, ໃນນີ້ ອັດຕາການຕາຍຂອງເດັກ ລຸ່ມ 1 ປີ ມີ 27,66/1.000, ອັດຕາການຕາຍຂອງເດັກລຸ່ມ 5 ປີ ມີ 29,04/1.000, ອັດຕາການຕາຍຂອງແມ່ 0, ອັດຕາການຕາ ການຊົມໃຊ້ນ້ຳສະອາດ 93%, ອັດຕາການຊົມໃຊ້ວິດຖ່າຍຄອບຄົວ 100%, ອັດຕາການໃຊ້ວິດຖ່າຍໂຮງຮຽນ 100%, ເຊິ່ງພາຍຫລັງທີ່ເມືອງໄດ້ມີຄວາມພະຍາມສ້າງ ແລະ ປະກາດບ້ານສາທາລະນະສຸກແບບຢ່າງ ແລະ ບ້ານຊຸມຊົນເປັນເຈົ້າໃນວຽກງານສຸຂະອະນາໄມຜ່ານມາແຕ່ປີ 2008 -2016 ໄດ້ 47 ບ້ານ, ໃນນີ້ ບ້ານມີຂະບວນໂຄສະນາ ສຸຂະສຶກສາຢ່າງຮອບດ້ານ ໄດ້ 100%, ການຈັດຫານ້ຳສະອາດ 93%, ຂະບວນການອະນາໄມ 3 ສະອາດພາຍໃນບ້ານ 95%, ການຝຶກອົບຮົມໃຫ້ ສອບ 100%, ການປະກອບສ່ວນຊຸກຍູ້ວຽກງານ ສັກຢາ-ຢອດຢາກັນພະຍາດ ໃຫ້ເດັກ ແລະ ແມ່ຍິງໃນເກນ 15-49 ປີ 97%, ຂະບວນການ ເພື່ອຄວາມປອດໄພ ຂອງການຖືພາ ກວດກ່ອນເກີດ ແລະ ເກີດລູກ 65%, ພາຍໃນບ້ານ ມີການປະຕິບັດໂຄງການ ເຊື່ອມສານພະຍາດໃນເດັກ-ໂພສະນາການ 90%, ມີການກວດ, ປິ່ນປົວພະຍາດ, ໃນກໍລະນີ ມີຄົນເຈັບກະທັນຫັນໄດ້ນຳສົ່ງຄົນເຈັບ ໄປສຸກສາລາ ຫລື ໂຮງໝໍບ່ອນທີ່ມີເງື່ອນໄຂໄດ້ 100%, ມີຄະນະກຳມະການ ສົ່ງເສີມສຸຂະພາບ ຕ້ານພະຍາດຂັ້ນບ້ານ, ມີການບັນທຶກລາຍງານ ດ້ານສຸຂະພາບ ການເກີດ-ການຕາຍ ໄດ້ 100%, ເຊິ່ງສົມທຽບໃສ່ມາດຖານແລ້ວ ແມ່ນສາມາດປະຕິບັດໄດ້ 95%, ສະນັ້ນ, ເມືອງທ່າແຕງ ຈຶ່ງມີເງື່ອນຮັບຮອງ ແລະ ສາມາດປະກາດ ເປັນເມືອງສາທາລະນະສຸກແບບຢ່າງ ເຊິ່ງເປັນເມືອງທຳອິດ ຂອງແຂວງເຊກອງ ແລະ ເປັນເມືອງທີ 3 ຂອງທົ່ວປະເທດ.
   ຂະນະດຽວກັນ, ກໍໄດ້ມີການມອບໃບຢັ້ງຢືນ ໂດຍກ່າວມອບຂອງທ່ານ ນີສອນ ວືອິນຢາວ ແລະ ຮັບໂດຍທ່ານ ຄຳສອນ ກອນເຍີ ເລຂາພັກເມືອງ,ເຈົ້າເມືອງ-ເມືອງທ່າແຕງ, ນອກຈາກນີ້ຍັງໄດ້ລັ່ນຄ້ອງ 9 ບາດ ແລະ ເປີດປ້າຍເພື່ຶອຢັ້ງວ່າ ເມືອງທ່າແຕງໄດ້ຮັບການປະກາດ ເປັນເມືອງສາທາລະສຸກແບບຢ່າງ ຢ່າງເປັນທາງການ.
                                                        ຂ່າວ-ພາບ:ພຸດທະສອນ