ວັນພຸດ, 23 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ພິທີມອບ-ຮັບ ແລະ ເປີດນຳໃຊ້ໂຮງຮຽນ ປະຖົມສົມບູນບ້ານໜອງບົງ ຫຼັງໃໝ່

    ພິທີ ມອບ-ຮັບ ແລະ ເປີດນຳໃຊ້ໂຮງຮຽນ ປະຖົມສົມບູນ ບ້ານໜອງບົງ ຫຼັງໃໝ່ ໄດ້ມີຂຶ້ນໃນວັນທີ 7 ທັນວາ 2016 ຜ່ານມາ ທີ່ໂຮງຮຽນປະຖົມສົມບູນ ບ້ານໜອງບົງ ເມືອງລະມາມ ແຂວງເຊກອງ ໂດຍການເຂົ້າຮ່ວມ ຂອງທ່ານ ສຈ, ປອ ບໍ່ແສງຄໍາ ວົງດາລາ ລັດຖະມົນຕີ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ທັງເປັນປະທານ ສະມາຄົມລາວ-ໄທ/ໄທ-ລາວ, ທ່ານ ສະວິດ ສິມະສະກຸນ ນາຍົກສະມາຄົມໄທ-ລາວ, ທ່ານ ພອນເພັດ ຄິວລະວົງ ຮອງເລຂາພັກແຂວງ, ສະມາຊິິກສະພາແຫ່ງຊາດ, ປະທານສະພາປະຊາຊົນແຂວງເຊກອງ ພ້ອມດ້ວຍ ອໍານາດການປົກຄອງແຂວງ-ເມືອງ, ຄະນະເລຂານຸການ ຈາກນະຄອນຫຼວງວຽງຈັນ ຕະຫຼອດຮອດ ພະນັກງານຄູ-ອາຈານ, ອໍານາດການປົກຄອງບ້ານ ແລະ ນ້ອງນ້ອຍນັກຮຽນເຂົ້າຮ່ວມ.
    ໃນພິທີ ທ່ານ ຄໍາຜາຍ ສຸນີວັນ ຮອງຫົວໜ້າ ພະແນກສຶກສາທິການ ແລະ ກິລາ ແຂວງເຊກອງ ໄດ້ກ່າວວ່າ: ອາຄານຫຼັງໃໝ່ແຫ່ງນີ້ ແມ່ນໄດ້ເລີ່ມກໍ່ສ້າງ ມາແຕ່ເດືອນ ສິງຫາ ປີ 2016 ເປັນຕົ້ນມາ ຮອດຕົ້ນເດືອນ ທັນວາ 2016 ນີແມ່ນສໍາເລັດ 100% ໂດຍແມ່ນ ບໍລິສັດອານັນໄຊກໍ່ສ້າງ ແລະ ສ້ອມແປງເຄຫາສະຖານ ແຂວງເຊກອງ ເປັນຜູ້ຮັບເໝົາກໍ່ສ້າງ, ເຊິ່ງເປັນທຶນ ທີ່ໄດ້ຮັບການຊ່ວຍເຫຼືອ ຈາກກົມ ອາຊີຕະເວັນອອກ ກະຊວງການຕ່າງປະເທດ ແຫ່ງຣາຊະອານາຈັກໄທ ສະມາຄົມມິດຕະພາບ ລາວ-ໄທ/ໄທ-ລາວ ໃນມູນຄ່າ 2.000.000 ບາດ ຫຼື 460.000.000 ກີບ ເຊິ່ງເປັນອາຄານຊັ້ນດຽວ ໂຄງສ້າງເບຕົງເສີມເຫຼັກ ມຸງດ້ວຍສັງກະສີ, ຝາກໍ່ດ້ວຍດິນຈີ່, ຂະໜາດ 8x35 ແມັດ, ລວມ 5 ຫ້ອງ ເຊິ່ງແຕ່ລະຫ້ອງ ປະກອບດ້ວຍເຄື່ອງເຟີນີເຈີ ຂອງຄູ ແລະ ນັກຮຽນຄົບຊຸດ. ພ້ອມດຽວກັນ ທ່ານ ກໍໄດ້ສະແດງຄວາມຮູ້ສຶກພາກພູມໃຈ ຢ່າງລົ້ນເຫຼືອ ມາຍັງການນໍາພັກ-ລັດ ທີ່ເຫັນໄດ້ຄວາມໝາຍສຳຄັນ ແລະ ນຳໃຊ້ທຶນຮອນຈຳນວນດັ່ງກ່າວ ກໍ່ສ້າງໂຮງຮຽນ ເພື່ອຮັບໃຊ້ເຂົ້າໃນວຽກງານການສຶກສາ ໃຫ້ໄດ້ຕາມແຜນພັດທະນາ ວຽກງານການສຶກສາ ແຕ່ນີ້ຮອດປີ 2020. ອາຄານຫຼັງນີ້ ເປັນອາຄານຮຽນ ທີ່ມີຄວາມໝາຍສໍາຄັນ ໃຫ້ແກ່ຊາວບ້ານ ໜອງບົງ ເພາະມັນເປັນສັນຍາລັກອັນໜຶ່ງ ທີ່ສະແດງເຖິງນໍ້າໃຈ ຂອງສະມາຄົມ ລາວ-ໄທ/ໄທ-ລາວ ທີ່ໄດ້ໃຊ້ທຸກວິທີທາງ ຊອກແຫຼ່ງທຶນມາພັດທະນາ ໂຮງຮຽນ ໂດຍສະເພາະ ແມ່ນການປຸກສ້າງອາຄານຮຽນ ໃນບ້ານດັ່ງກ່າວ ຈົນສໍາເລັດຜົນ.
   ໂອກາດນີ້, ທ່ານຮອງ ພະແນກສຶກສາທິການ ແລະກິລາ ແຂວງເຊກອງ ຍັງໄດ້ຮຽກຮ້ອງ ໃຫ້ອໍານາດການປົກຄອງບ້ານ ພ້ອມພາກສ່ວນກ່ຽວຂ້ອງ ຈົ່ງມີຄວາມອຸ່ນອ່ຽງທຸ່ນທ່ຽງ ຄຽງຄູ່ກັບ ການຮຽນການສອນ, ຈັດຕັ້ງຜັນຂະຫຍາຍ ວຽກງານການສຶກສາ ຢ່າງຕໍ່ເນື່ອງ ລວມທັງກວດກາ, ຕິດຕາມ, ລະດົມຊຸກຍູ້ໃຫ້ປະຊາຊົນພາຍໃນບ້ານ ເອົາໃຈໃສ່ ປົກປັກຮັກສາ ແລະ ນໍາໃຊ້ໂຮງຮຽນປະຖົມສົມບູນແຫ່ງນີ້ ໃຫ້ເກີດປະໂຫຍດຢ່າງສູງ.
    ຫຼັງຈາກນັ້ນ ກໍໄດ້ມີພິທີຕັດແຖບຜ້າ ມອບ-ຮັບ ແລະ ເປີດນໍາໃຊ້ໂຮງຮຽນແຫ່ງດັ່ງກ່າວ ຢ່າງເປັນທາງການ ລະ ຫ່ວາງ ທ່ານ ສຈ, ປອ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ ທັງເປັນ ປະທານສະມາຄົມ ລາວ-ໄທ/ໄທ-ລາວ ແລະ ທ່ານ ສະວິດ ສິມະສະກຸນ ນາຍົກສະມາຄຄົມໄທ-ລາວ ໂດຍມີ ການນໍາພັກ-ລັດ ທັງສອງຝ່າຍ ແລະ ພໍ່່ແມ່ປະຊາຊົນພາຍໃນບ້ານ ຮ່ວມເປັນສັກຂີພິຍານ.

                                                                                     ຂ່າວ-ພາບ: ນາລີວັນ