ວັນພຸດ, 23 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເຊກອງສະຫຼຸບຕີລາຄາ ແລະ ຍ້ອງຍໍຂະບວນການແຂ່ງຂັນຮັກຊາດສ້າງບ້ານພັດທະນາ

    ພິທີດັ່ງກ່າວຈັດຂຶ້ນ ໃນຕອນເຊົ້າຂອງວັນທີ 23 ພະຈິກ 2016 ຜ່ານມາ ທີ່ສະໂມສອນໃຫຍ່ ຫ້ອງວ່າການປົກຄອງ ແຂວງເຊກອງ ໂດຍການເປັນປະທານ ຂອງທ່ານ ຄໍາເຜີຍ ບຸດດາວຽງ ເຈົ້າແຂວງເຊກອງ, ມີບັນດາການນໍາພັກ-ລັດຂັ້ນແຂວງ, ຂັ້ນເມືອງ 4 ຕົວເມືອງ ພ້ອມດ້ວຍບັນດາໜ່ວຍພັກ, ນາຍບ້ານ, ຄອບຄົວ, ບຸກຄົນ ແລະ ຜູ້ປະກອບການ ດີເດັ່ນເຂົ້າຮ່ວມ.
    ທ່ານ ວິແຊັມ ໄຊສຶກສາ ຮອງຫົວໜ້າກອງເລຂາ 3 ສ້າງ, ຫົວໜ້າກອງເລຂາ ຊ່ວຍວຽກຄະນະຮັບຜິດຊອບ ຊີ້ນໍາເຮັດທົດລອງ 3 ສ້າງຂັ້ນແຂວງ (ທັງເປັນຜູ້ປະຈໍາການ) ໄດ້ກ່າວວ່າ: ຈຸດປະສົງ ຂອງການຈັດກອງປະຊຸມໃນຄັ້ງນີ້ ກໍເພື່ອເປັນການເອກອ້າງທະນົງໃຈ ຕໍ່ຜົນງານອັນໃຫຍ່ຫຼວງ ທີ່ຍາດມາໄດ້ ໃນຊຸມປີຜ່ານມາ ແລະ ຈັດຂຶ້ນໃນທ່າມກາງ ບັນຍາກາດທີ່ທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ປວງຊົນບັນດາເຜົ່າ ຊາວແຂວງເຊກອງ ພວມອອກແຮງ ແຂ່ງຂັນກັນ ຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງ ກໍຄືແຜນພັດທະນາ ເສດຖະກິດ-ສັງຄົມ ແຫ່ງລັດຄັ້ງທີ VIII ຢ່າງເປັນຂະບວນຟົດຟື້ນ, ພ້ອມນັ້ນ ກໍພວມກະກຽມສະເຫຼີມສະຫຼອງ ວັນຊາດທີ 2 ທັນວາຄົບຮອບ 41 ປີ ແລະ ວັນຄ້າຍວັນເກີດ ປະທານໄກສອນ ພົມວິຫານ ຄົບຮອບ 96 ປີ, ພິເສດຍັງບໍ່ພໍເທົ່າໃດມື້ ແຂວງເຊກອງ ກໍຈະໄດ້ຈັດງານ ບຸນຊ່ວງເຮືອປະເພນີ ປະຈໍາປີອີກດ້ວຍ.
    ກອງປະຊຸມຄັ້ງນີ້, ໄດ້ດໍາເນີນໄປ ເປັນເວລາເຄິ່ງມື້: ເຊິ່ງໄດ້ແບ່ງອອກເປັນ ສອງ ວາລະຄື: ວາລະທີໜຶ່ງ ແມ່ນໄດ້ຜ່ານບົດສະຫຼຸບ ຕີລາຄາ ການຈັດຕັ້ງປະຕິບັດ ຂະບວນການ ແຂ່ງຂັນຮັກຊາດ, ສ້າງບ້ານພັດທະນາ, ຜັນຂະຫຍາຍວຽກງານ 3 ສ້າງສູ່ລວງເລິກແຕ່ປີ 2011-2015 ແລະ ໄດ້ເປີດຂະບວນການ ແຂ່ງຂັນຮັກຊາດ, ສ້າງບ້ານພັດທະນາ ແລະ ຜັນຂະຫຍາຍວຽກງານ 3 ສ້າງສູ່ລວງເລິກ ແຕ່ປີ 2016-2020 ພ້ອມກັນນັ້ນ ກໍຍັງໄດ້ມີການເຊັນບົດບັນທຶກ ມອບ-ຮັບ ໜ້າທີ່ ລະຫວ່າງ ຄະນະຮັບຜິດຊອບ ວຽກງານ 3 ສ້າງຊຸດເກົ່າ ແລະ ຊຸດໃໝ່ ໂດຍແມ່ນ ທ່ານ ພອນເພັດຄິວລະວົງ ຮອງເລຂາພັກແຂວງ ຮອງຫົວໜ້າ ຄະນະຮັບຜິດຊອບຊີ້ນໍາ ເຮັດທົດລອງ 3 ສ້າງຂັ້ນແຂວງ (ທັງເປັນຜູ້ປະຈໍາການ) ຊຸດເກົ່າ ເຊັນມອບໃຫ້ແກ່ ທ່ານ ປອ ຄໍາພຽມ ບົວລະພາ ຮອງເລຂາພັກແຂວງ ເປັນຮອງຫົວໜ້າ ຄະນະຮັບຜິດຊອບຊີ້ນໍາເຮັດທົດລອງ 3 ສ້າງຂັ້ນແຂວງ (ທັງເປັນຜູ້ປະຈໍາການ) ຊຸດໃໝ່ ອີກດ້ວຍ. ສ່ວນວາລະທີສອງ: ແມ່ນໄດ້ມີການປະດັບ ຫຼຽນໄຊ ແລະ ມອບໃບຍ້ອງຍໍບ້ານ, ຄອບຄົວ, ບຸກຄົນ, ນິຕິບຸກຄົນດີເດັ່ນ ໃນການຈັດຕັ້ງປະຕິບັດ ຂະບວນການແຂ່ງຂັນ ຮັກຊາດ, ສ້າງບ້ານພັດທະນາ ແລະຜັນຂະຫຍາຍ ວຽກງານ 3 ສ້າງສູ່ລວງເລິກ ໃນຊຸມປີຜ່ານມາ.
    ໂອກາດ ດຽວກັນນີ້, ກໍຈະໄດ້ຮັບຟັງ ການໂອ້ລົມຂອງທ່ານ ເຈົ້າແຂວງແຂວງເຊກອງ ເຊິ່ງທ່ານໄດ້ກ່າວວ່າ: ຜ່ານການສະຫຼຸບຕີລາຄາເຫັນວ່າ ບັນດາຄອບຄົວທຸກຍາກ ຖືວ່າຫຼຸດລົງເທື່ອລະກ້າວ, ບ້ານພັດທະນາ, ຄອບຄົວພັດທະນາ ມີການເພີ່ມຂຶ້ນ ສັງລວມແລ້ວ ນັບແຕ່ການເປີດຂະບວນການ ແຂ່ງຂັນຮັກຊາດ, ສ້າງບ້ານພັດທະນາໃນໄລຍະ 5 ປີ ແຕ່ປີ 2011-2015 ຜ່ານມາ ຖືວ່າມີຫຼາຍອັນ ທີ່ພົ້ນເດັ່ນ. ສະນັ້ນ, ເພື່ອສືບຕໍ່ຜົນງານດັ່ງກ່າວນັ້ນໃ ຫ້ດີກວ່າເກົ່ານັ້ນ ຢາກຮຽກຮ້ອງ ມາຍັງທຸກພາກສ່ວນ ຈົ່ງພ້ອມກັນເອົາໃຈໃສ່ ສຸມທຸກກໍາລັງແຮງ ເຂົ້າໃສ່ໜ້າວຽກຕົວຈິງ ໂດຍສະເພາະແມ່ນ ການສ້າງຄອບຄົວພັດທະນາ, ສ້າງບ້ານພັດທະນາ ຕະຫຼອດຮອດການນໍາພາຂັ້ນຕ່າງໆ ໃຫ້ມີລະບຽບ ແບບແຜນ ໃຫ້ຖືກກັບມະຕິ 03 ວ່າດ້ວຍການສ້າງແຂວງ ເປັນຫົວໜ່ວຍຍຸດທະສາດ, ສ້າງເມືອງ ເປັນຫົວໜ່ວຍ ເຂັ້ມແຂງຮອບດ້ານ ແລະ ສ້າງບ້ານ ເປັນຫົວໜ່ວຍພັດທະນາ ເປັນຕົ້ນ ການສ້າງພະນັກງານ ວິຊາການ ທີ່ຖືກກັບວິຊາສະເພາະ ແລະ ຕ້ອງຕິດພັນກັບ ຄວາມຮຽກຮ້ອງຕ້ອງການ ຂອງໜ້າວຽກຕົວຈິງ.
                                                                             ຂ່າວ, ພາບ:  ນາລີວັນ