ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ທ່າແຕງ ເປີດນໍາໃຊ້ໂຮງຮຽນ ມສ ຈຸນລາ ຫຼັງໃໝ່.

    ພິທີມອບ-ຮັບ ແລະ ເປີດນຳໃຊ້ໂຮງຮຽນ ມສ ຈຸນລາ ຫຼັງໃໝ່ໄດ້ມີຂຶ້ນໃນວັນທີ 4 ພະຈິກຜ່ານມາ ທີ່ໂຮງຮຽນບ້ານຈຸນລາ ເມືອງທ່າແຕງ ແຂວງເຊກອງ ໂດຍການເຂົ້າຮ່ວມ ຂອງທ່ານ ຂັນແກ້ວ ໂຮມອິນຕາ ຫົວໜ້າພະແນກສຶກສາທິການ ແລະ ກິລາແຂວງ, ທ່ານ ພູວົງ ກອງຊັບ ຫົວໜ້າເຂດຈຸດສຸມ ພັດທະນາທີ 4, ມີຕາງໜ້າ ບໍລິສັດສອນກໍ່ສ້າງສ້ອມແປງ ແລະ ເຄຫາສະຖານ, ມີຂະແໜງການກ່ຽວຂ້ອງ ຂັ້ນແຂວງ-ເມືອງ, ອຳນາດການປົກຄອງບ້ານ ແລະ ຄູ-ອາຈານເຂົ້າຮ່ວມ.
    ໃນພິທີ ທ່ານ ສົມປະສິດ ຊາຍດອກສິນ ຕາງໜ້າ ບໍລິສັດສອນກໍ່ສ້າງສ້ອມແປງ ແລະ ເຄຫາສະຖານ ແຂວງເຊກອງ ໃນນາມຜູ້ຮັບເໝົາ ກໍ່ສ້າງ ກ່າວວ່າ: ໂຮງຮຽນມັດທະສົມບູນ (ມສ) ບ້ານຈຸນລາ ໄດ້ເລີ່ມລົງມືກໍ່ສ້າງ ແຕ່ວັນທີ 4 ກຸມພາ 2014 ຫາວັນທີ 12 ກຸມພາ 2016 ແມ່ນສຳເລັດ 100% ໃນມູນຄ່າ 4,9 ຕື້ກວ່າກີບ ໂດຍແມ່ນ ທຶນຂອງລັດຖະບານລາວ ຊຶ່ງເປັນອາຄານ 2 ຊັ້ນ, ໂຄງສ້າງເສີມເຫຼັກ, ມຸງດ້ວຍກະເບື້ອງ, ພື້ນຕິດດ້ວຍກະໂລ ປະກອບມີ 10 ຫ້ອງຮຽນ 10 ຫ້ອງ, ຫ້ອງການຄູ 2 ຫ້ອງຄູ ແລະ ຫ້ອງນ້ຳ 12 ຫ້ອງນໍ້າ, ມີຂະໜາດ 48 x 12 ແມັດ. ນອກຈາກ ນີ້ຍັງປະກອບມີ ລະບົບໄຟຟ້າ ແລະ ເຟີນີເຈີຄົບຊຸດ ໂດຍສາມາດຮອງຮັບ ນັກຮຽນໄດ້ທັງໝົດ 40 ຄົນຕໍ່ຫ້ອງຮຽນ.
ຫຼັງຈາກນັ້ນ ກໍໄດ້ມີພິທີ ເຊັນມອບ-ຮັບ ລະຫ່ວາງ ທ່ານ ສົມປະສິດ ຊາຍດອກສິນ ຕາງໜ້າ ບໍລິສັດສອນກໍ່ສ້າງສ້ອມແປງ ແລະ ເຄຫາສະຖານ ແຂວງເຊກອງ ເປັນຜູ້ກ່າວມອບ ແລະ ທ່ານ ນາງ ດວງຈັນ ເທບບົວລະບັດ ຫົວໜ້າ ຫ້ອງການສຶກສາທິການ ແລະ ກິລາ ເມືອງທ່າແຕງເປັນຜູ້ກ່າວຮັບ.
    ໂອກາດນີ້ ທ່ານ ຂັນແກ້ວ ໂຮມອິນຕາ ໄດ້ສະແດງຄວາມຮູ້ສຶກ ພາກພູມໃຈ ຢ່າງລົ້ນເຫຼືອ ມາຍັງ ການນໍາພັກ-ລັດ ທີ່ເຫັນໄດ້ ຄວາມໝາຍສຳຄັນ ແລະ ນຳໃຊ້ທຶນຮອນ ຈຳນວນດັ່ງກ່າວ ກໍ່ສ້າງໂຮງຮຽນ ເພື່ອຮັບໃຊ້ ເຂົ້າໃນວຽກງານການສຶກສາ ໃຫ້ໄດ້ຕາມແຜນພັດທະນາ ວຽກງານການສຶກສາ ແຕ່ນີ້ຮອດປີ 2020. ພ້ອມຮຽກຮ້ອງ ໃຫ້ອໍານາດການປົກຄອງບ້ານ ພ້ອມພາກສ່ວນກ່ຽວຂ້ອງ ຈົ່ງມີຄວາມອຸ່ນອ່ຽງ ທຸ່ນທ່ຽງ ຄຽງຄູ່ກັບ ການຮຽນການສອນ, ຈັດຕັ້ງຜັນຂະຫາຍ ວຽກງານ ການສຶກສາ ຢ່າງຕໍ່ເນື່ອງ ລວມທັງກວດກາ, ຕິດຕາມ, ລະດົມຊຸກຍູ້ ໃຫ້ປະຊາຊົນພາຍໃນບ້ານ ເອົາໃຈໃສ່ ປົກປັກຮັກສາ ແລະ ນໍາໃຊ້ໂຮງຮຽນ ມັດທະຍົມສົມບູນ ແຫ່ງນີ້ໃຫ້ເກີດປະໂຫຍດສູງສຸດ
                                                                                                ຂ່າວ : ພອນ ບຸນອຸທິດ.