ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ອະດີດ ເລຂາທິການໃຫຍ່ຄະນະບໍລິຫານງານສູນກາງພັກ, ອະດີດປະທານປະເທດ ແຫ່ງ ສປປ ລາວ ຢ້ຽມຢາມ ແລະ ເຮັດວຽກຢູ່ແຂວງເຊກອງ

     ທ່ານ ຈູມມາລີ ໄຊຍະສອນ ອະດີດເລຂາທິການໃຫຍ່ ຄະນະບໍລິຫານງານສູນກາງພັກ, ອະດີດປະທານປະເທດ ແຫ່ງ ສປປ ລາວ ໄດ້ເຄື່ອນໄຫວ ຢ້ຽມຢາມ ແລະ ເຮັດວຽກຢູ່ແຂວງເຊກອງ ໃນວັນທີ 16 ຕຸລານີ້ , ໂດຍໃຫ້ກຽດຕ້ອນຮັບ ຂອງທ່ານ ຄຳເຜີຍ ບຸດດາວຽງ ເຈົ້າແຂວງເຊກອງ ພ້ອມດ້ວຍ ຄະນະປະຈຳພັກ, ກຳມະການພັກແຂວງ, ຄະນະພັກ, ຄະນະພະແນກການນອ້ອມຂ້າງແຂວງ ຕະຫຼອດຮອດ ພະນັກງານປະຕິວັດ ອາວຸໂສ ໃຫ້ການຕ້ອນຮັບຢ່າງອົບອຸ່ນ.
    ທ່ານ ຄຳເຜີຍ ບຸດດາວຽງ ໄດ້ລາຍງານການຈັດຕັ້ງ ປະຕິບັດ ແຜນພັດທະ ເສດຖະກິດ-ສັງຄົມ ຂອງແຂວງໃນໄລຍະ 1 ປີຜ່ານມາວ່າ: ທົ່ວແຂວງ ຍັງສືບຕໍ່ມີສະຖຽນລະພາບ ທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ ໂດຍພື້ນຖານ, ເສດຖະກິດສືບຕໍ່ຂະຫຍາຍຕົວ ຕາມທ່າແຮງ ແລະ ເງື່ອນໄຂຄວາມເປັນຈິງຂອງທ້ອງຖິ່ນ ຢ່າງຕໍ່ເນື່ອງໃນລະດັບ 11,1%, ການຂຸດຄົ້ນເກັບລາຍຮັບ ເຂົ້າງົບປະມານຂອງແຂວງ ບັນລຸໄດ້ 112,7%, ຮັບປະກັນການເບີກຈ່າຍເງິນເດືອນ ພະນັກງານ, ເງິນນະໂຍບາຍ ແລະ ເງິນບໍລິຫານຂອງຂະແໜງການຢ່າງເປັນປົກກະຕິ, ສາມາດຈັດຕັ້ງປະຕິບັດ ໂຄງການລົງທຶນຂອງລັດ ທີ່ສະພາແຫ່ງຊາດອະນຸມັດ ຖືກຕ້ອງຕາມລະບຽບຫຼັກການ ລົງທຶນສຳເລັດ 100%, ການພັດທະນາພື້ນຖານໂຄງລ່າງ ເສັ້ນທາງຄົມມະນາຄົມ, ຊົນລະປະທານ ແລະ ດ້ານພະລັງງານໄຟຟ້າ ກໍ່ໄດ້ຮັບການປັບປຸງ ແກ້ໄຂຂະຫຍາຍອອກ ສູ່ເຂດຊົນນະບົດ ຫ່າງໄກສອກຫຼີກ ເຮັດໃຫ້ການສັນຈອນໄປມາ ສະດວກຫຼາຍຂຶ້ນ, ການກໍ່ສ້າງຂົວຂ້າມນ້ຳເຊກອງ ປະຕິບັດໄດ້ 84,7%, ກໍ່ສ້າງດ່ານຊາຍແດນດາກຕະອອກ ເພື່ອກະກຽມ ເປີດເປັນດ່ານສາກົນ ໃນທ້າຍປີ 2017 ປະຕິບັດໄດ້ 87%, ພ້ອມນັ້ນ ກໍໄດ້ປັບປຸງລະບົບ ຊົນລະປະທານ-ອ່າງເກັບນ້ຳ ສະໜອງໃຫ້ການບໍລິໂພກ ແລະ ການຜະລິດພຽງພໍ; ອັດຕາການຊົມໃຊ້ໄຟຟ້າຄົວເຮືອນ ໄດ້ເພີ່ມຂຶ້ນກວມເອົາ 72,9% ຂອງຈຳນວນຄົວເຮືອນ ທັງໝົດ; ຂະບວນການຜະລິດ ເປັນສິນຄ້າ, ການແກ້ໄຂຄວາມທຸກຍາກ ຂອງປະຊາຊົນ ແມ່ນມີລັກສະນະຂະຫຍາຍຕົວກວ້າງຂວາງ ແລະ ເພີມຂຶ້ນ, ນອກຈາກການປູກກາເຟ-ພືດຜັກຍັງໄດ້ຊຸກຍູ້ສົ່ງເສີມການລົງທຶນ ປູກໜໍ່ໄມ້ຢູ່ເມືອງກະລຶມ ແລະ ປູກພືດຜັກ-ດອກໄມ້ເຂດໜາວ, ຂະຫຍາຍການປູກໂສມ ຢູ່ເມືອງດາກຈຶງ; ກຸ່ມລ້ຽງສັດ ເມືອງລະມາມ ແລະ ເມືອງທ່າແຕງ ໄດ້ເຊັນສັນຍາຮັບຮອງ ສະໜອງຊີ້ນ, ປາ, ພືດຜັກໃຫ້ກຸ່ມບໍລິສັດພອນສັກ ປີລະ 5.000 ກວ່າໂຕນ ໂດຍໃຫ້ຕິດພັນ ກັບການແກ້ໄຂຄວາມທຸກຍາກ ຂອງປະຊາຊົນ, ປະຈຸບັນສິນຄ້າກະສິກຳຂອງແຂວງ ນອກຈາກສະໜອງຢູ່ພາຍໃນ ຍັງມີແຜນຈະອອກສູ່ຕະຫຼາດ ບັນດາແຂວງ ຂອງກຳປູເຈຍ ເຊິ່ງທັງສອງຝ່າຍ ໄດ້ຈັດກອງປະຊຸມ ປຶກສາຫາລືກັນແລ້ວ; ດ້ານວຽກງານການສຶກສາ ປີ 2016 ນີ້ ໄດ້ປະກາດເມືອງລະມາມ ແລະ ເມືອງທ່າແຕງ ເປັນເມືອງຈົບມັດທະຍົມຕອນຕົ້ນ ບຳລຸງສໍາເລັດ, ນອກນີ້ ກໍ່ໄດ້ເອົາໃຈໃສ່ ສ້າງບ້ານວັດທະນະທຳ, ບ້ານປອດຕຄະນດີ ແລະ ບ້ານສາທາລະນະສຸກແບບຢ່າງໄດ້ເພີ່ມຂຶ້ນໃນແຕ່ລະປີ, ໂດຍສະເພາະຂະບວນການເຝົ້າລະວັງ ແລະ ສະກັດກັ້ນພະຍາດຕາມລະດູການໄດ້ຢ່າງທັນການ ບໍ່ມີກໍລະນີຄົນເສຍຊີວິດ.
     ໃນໂອກາດນີ້, ທ່ານ ຈູມມາລີ ໄຊຍະສອນ ໄດ້ໂອ້ລົມ ແລະ ເນັ້ນ ໃຫ້ຄະນະນໍາ ຂອງແຂວງເຊກອງ ສ້າງພື້ນຖານການເມືອງ ໃຫ້ໜັກແໜ້ນ, ເຂັ້ມແຂງ ໂດຍສະເພາະ ແມ່ນການຜັນຂະຫຍາຍ ເນື້ອໃນຈິດໃຈ ມະຕິກອງປະຊຸມໃຫຍ່ ຄັ້ງທີ x ຂອງພັກ ໃຫ້ປະກົດຜົນເປັນຈິງ, ສືບຕໍ່ຈັດຕັ້ງປະຕິບັດຍຸດທະສາດ 3 ສ້າງ, ສືບຕໍ່ປະຕິບັດ 4 ບຸກທະລຸໃຫ້ໄດ້ເທື່ອລະກ້າວ, ເອົາໃຈໃສ່ ສົ່ງເສີມການຜະລິດກະສິກໍາ ໃຫ້ມີຄຸນນະພາບ ແລະ ຫັນໄປສູ່ການນໍາໃຊ້ວິທະຍາສາດ ທີ່ທັນສະໄໝເທື່ອລະກ້າວ, ການລ້ຽງສັດຕ້ອງສຸມໃສ່ການລ້ຽງ ແບບເປັນຟາມ ເພື່ອສ້າງໃຫ້ໄດ້ຄອບຄົວຕົວແບບ, ສ້າງຕົວແບບຂອງເມືອງ ຄື 1 ເມືອງຕ້ອງໃຫ້ມີ 1 ຜະລິດຕະພັນ ເຊິ່ງການສ້າງຕົວແບບ ແມ່ນພື້ນຖານອັນໃໝ່ ແມ່ນໄມ້ຫຼາວັດແທກ ຂອງການຊີ້ນໍາໆພາທຸກຂັ້ນ, ທັງເປັນການປະຕິບັດ ຄາດໝາຍສູ້ຊົນ ນໍາພາປະເທດຊາດ ຫຼຸດພົ້ນອອກຈາກຄວາມດ້ອຍພັດທະນາໃຫ້ໄດ້  ໃນປີ 2020.
                                                                                            ຂ່າວ:ພຸດທະສອນ