ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເມືອງລະມາມ ຕີລາຄາ ການປະຕິບັດແຜນການຄຸ້ມຄອງອາວຸດລ່າເນື້ອ.

    ຕອນເຊົ້າວັນທີ 20 ຕຸລາ 2016 ນີ້ ຢູ່ທີ່ສະໂມສອນ ຫ້ອງວ່າການປົກຄອງ ເມືອງລະມາມ ແຂວງເຊກອງ ໄດ້ຈັດກອງປະຊຸມ ສະຫຼຸບວຽກງານ ການຈັດຕັ້ງປະຕິບັດ ການຄຸ້ມຄອງ ອາວຸດລ່າເນື້ອ, ໂດຍການເຂົ້າຮ່ວມ ເປັນປະທານຂອງທ່ານ ປອ ແພງສີ ສີລາວີ ກຳມະການພັກແຂວງ ເລຂາພັກເມືອງ ເຈົ້າເມືອງລະມາມ; ມີທ່ານ ຮຽມ ໄຊຍະລາດ ຄະນະປະຈຳພັກເມືອງ ຫົວໜ້າກອງບັນຊາ ປກສ ເມືອງລະມາມ ພ້ອມດ້ວຍພະນັກງານ ວິຊາການ ແລະ ນາຍບ້ານ 6 ກຸ່ມບ້ານທົ່ວເມືອງລະມາມ ເຂົ້າຮ່ວມ.
    ທ່ານ ພັນຕີ ຄຳເວີນ ສຸນິອິງ ຫົວໜ້າພະແນກ ຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ລາຍງານວ່າ: ໄລຍະຜ່ານມາ ກຳລັງ ປກສ ບໍລິການ ປະຊາຊົນ ແລະ ກຳລັງ ປກສ ບ້ານ ໄດ້ເອົາໃຈໃສ່ ປະສານສົມທົບ ກັບ ອຳນາດປົກຄອງບ້ານ ແລະ ອົງການຈັດຕັ້ງ ທີ່ກ່ຽວຂ້ອງທຸກພາກສ່ວນ, ປະຕິບັດ ການກວດກາ ແລະ ຄຸ້ມຄອງ ແກ້ໄຂປະກົດການຫຍໍ້ທໍ້ ໃນສັງຄົມ ຢ່າງຈິງຈັງ ໂດຍສະເພາະ ການທ້ອນໂຮມ ອາວຸດລ່າເນື້ອ ແລະ ອາວຸດເສິກໃນ 6 ກຸ່ມບ້ານ ທົ່ວເມືອງລະມາມ ສາມາດຢຶດ ແລະ ທ້ອນໂຮມໄດ້ ທັງໝົດ 676 ກະບອກ ແລະ ອາວຸດເສິກ 08 ກະບອກ, ໂດຍຜົນສໍາເລັດດັ່ງກ່າວນີ້ ແມ່ນເນື່ອງຈາກ ຄວາມເອົາໃຈໃສ່ຂອງຄະນະພັກ, ອຳນາດການປົກຄອງທ້ອງຖິ່ນ ການປະສານສົມທົບ ຂອງພາກສ່ວນຕ່າງໆ ທີ່ກ່ຽວຂ້ອງຢ່າງກົມກຽວ ແລະ ຍ້ອນໄດ້ຮັບການຮ່ວມມື ຈາກພໍແມ່ປະຊາຊົນບັນດາເຜົ່ າເປັນຢ່າງດີ ຈຶ່ງເຮັດໃຫ້ ການຈັດຕັ້ງປະຕິບັດວຽກງານໃນຄັ້ງນີ້ ບັນລຸຕາມລະດັບ ຄາດໝາຍ.
    ໂອກາດນີ້; ທ່ານ ປອ ແພງສີ ສີລາວີ ກໍຳມະການພັກແຂວງ ເລຂາພັກເມືອງ ເຈົ້າເມືອງລະມາມ ກໍ່ເນັ້ນໃຫ້ ອຳນາດການປົກຄອງບ້ານ ເປັນເຈົ້າການ ເອົາໃຈໃສ່ ສືບຕໍ່ສຶກສາອົບຮົມ ການເມືອງແນວຄິດ ໃຫ້ແກ່ປະຊາຊົນ ເພີ່ມທະວີຄວາມສາມັກຄີ ໃຫ້ໜັກແໜ້ນ ຕ້ານ ແລະ ສະກັດກັ້ນບຸກຄົນ-ກຸ່ມຄົນ ທີ່ລັກລອບ ທຳລາຍ ຊັບພະຍາກອນທຳມະຊາດ ອັນເປັນຂອງສ່ວນລວມ ຂອງປະເທດຊາດ, ເອົາໃຈໃສ່ ຊຸກຍູ້ປຸກລະດົມ ລູກຫຼານ ປະກອບສ່ວນຢ່າງຕັ້ງໜ້າ ເຂົ້າໃນວຽກງານດັ່ງກ່າວນີ້ ໃຫ້ເປັນກໍາລັງແຮງ ທີ່ເຂັ້ມແຂງ ໜັກແໜ້ນ.
                                                                                                                      ຂ່າວ-ພາບ: ໜູໄຊ ສັກພາສິດລາຍງານ