ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ຮອງເລຂາພັກແຂວງເຊກອງຊຸກຍູ້ວຽກງານຢູ່ເມືອງກະລຶມ

    ໃນວັນທີ 10 ກຸມພາ 2016 ນີ້ ທ່ານ ພອນເພັດ ຄິວລະວົງ ຮອງເລຂາພັກແຂວງເຊກອງ ພ້ອມຄະນະໄດ້ເຄື່ອນໃຫວ ຊຸກຍູ້ວຽກງານ ຢູ່ເມືອງກະລືມ, ໃຫ້ການຕ້ອນຮັບໂດຍ ທ່ານ ອໍບົວລາ ອ່ອນມະໄລວົງ ຮອງເລຂາພັກເມືອງກະລຶມ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ ອ້ອມຂ້າງເມືອງເຂົ້າຮ່ວມ.
    ການລົງເຄື່ອນໃຫວວຽກງານຂອງ ທ່ານ ຮອງເລຂາພັກແຂວງເຊກອງ ໃນຄັ້ງນີ້, ເພື່ອຮັບຟັງ ການລາຍງານສະພາບການ ຈັດຕັ້ງປະຕິບັດ ວຽກງານຂອງເມືອງ ຊຶ່ງແມ່ນ ທ່ານ ອໍບົວລາ ອ່ອນມະໄລວົງ ຮອງເລຂາພັກເມືອງກະລຶມ ກ່າວວ່າ: ໃນໄລຍະ 4 ເດືອນຜ່ານມາ ຄະນະພັກ ອົງການປົກຄອງເມືອງ ແລະ ສອງກຳລັງປະກອບອາວຸດ ໄດ້ເປັນເຈົ້າການ ໃນການຈັດຕັ້ງຜັນຂະຫຍາຍ ມະຕິ ກອງປະຊຸມໃຫຍ່ຄັ້ງທີ 8 ຂອງອົງຄະນະພັກ ເມືອງກະລຶມ ເຊິ່ງເຫັນວ່າມີຜົນ ສຳເລັດຫຼາຍດ້ານ ເປັນຕົ້ນວຽກ ງານປ້ອງກັນຊາດ ປ້ອງກັນຄວາມສະຫງົບສຸກ ໄດ້ເອົາໃຈໃສ່ ສຶກສາອົບຮົມການ ເມືອງແນວຄິດ ໃຫ້ແກ່ພະນັກງານ ນັກຮົບ ແລະ ປະຊາຊົນບັນດາເຜົ່າ ເຊື່ອມຊຶມ ຕໍ່ແນວທາງນະໂຍບາຍຂອງພັກ ລະບຽບກົດໝາຍຂອງລັດ, ຕ້ານ ແລະ ສະກັດກັ້ນ ປະກົດການຫຍໍ້ທໍ້ຢ່າງທັນການ ເຮັດໃຫ້ເມືອງກະລຶມ ມີຄວາມສະຫງົບປອດໄພ ໂດຍພື້ນຖານ, ຈັງຫວະການເຕີບໂຕ ຂອງເສດຖະກິດເມືອງກະລຶມ ມີທ່າອ່ຽງສູງຂື້ນ ຕາມລຳດັບ, ນອກນີ້ ຍັງໄດ້ເອົາໃຈໃສ່ ໃນການປະຕິບັດນະໂຍບາຍ ການເບີກຈ່າຍເຂົ້າສານ ໃຫ້ແກ່ປະຊາຊົນສືບເນື່ອງ ມາຈາກໂຄງການກໍ່ສ້າງ, ຈັດສັນ ແລະ ຍົກຍ້າຍເມືອງກະລືມໃໝ່ ໃນງວດ ທີ 2 ປີ 2016 ໃຫ້ສອງບ້ານຄື: ບ້ານແກ້ງກຸຍ ແລະ ແກ້ງກຽນ ໄດ້ສຳເລັດ ເຊິ່ງໄດ້ຈັດຕັ້ງປະຕິບັດມາແຕ່ ວັນທີ 18 ທັນວາ 2015 ຈຳນວນເຂົ້າສານ ທັງໝົດ 245.000 ໂຕນ.
    ໂອກາດດຽວກັນນີ້, ທ່ານ ພອນເພັດ ຄິວລະວົງ ຮອງເລຂາພັກແຂວງເຊກອງ ກໍ່ໄດ້ສະແດງຄວາມ ຍ້ອງຍໍຊົມເຊີຍ ຜົນສຳເລັດທີ່ຍາດມາໄດ້ ໃນໄລຍະ 4 ເດືອນຜ່ານມາ, ພ້ອມທັງເນັ້ນໃຫ້ຄະນະພັກ ອົງການປົກຄອງເມືອງກະລຶມ ເອົາໃຈໃສ່ ຈັດຕັ້ງປະຕິບັດ ໜ້າທີ່ວຽກງານທີ່ຢູ່ໃນຄວາມຮັບຜິດຊອບ ໃຫ້ສຳເລັດ, ການປະຕິບັດໜ້າທີ່ວຽກງານ ແຕ່ລະໄລຍະ ຕ້ອງໄດ້ປັບປຸງແບບແຜນ ການຊີ້ນຳ-ນຳພາ ຕາມຫຼັກການຂອງພັກ, ມີການແບ່ງງານ, ແບ່ງຄວາມຮັບຜິດຊອບ ຢ່າງຈະແຈ້ງ, ພ້ອມທັງເຮັດໜ້າທີ່ ສຶກສາອົບຮົມ ການເມືອງແນວຄິດ ໃຫ້ແກ່ປະຊາຊົນບັນດາເຜົ່າ ໃຫ້ເຂົ້າໃຈແຈ້ງ ຕໍ່ແນວທາງຂອງພັກ, ລະບຽບກົດໝາຍຂອງລັດ, ສ້າງຄວາມເຊື່ອໝັ້ນຕໍ່ການ ຊີ້ນຳ-ນຳພາຂອງພັກ, ແກ້ໄຂແນວຄິດແບບຮີດເກົ່າຄອງເດີມ ທີ່ຂັດກັບລະບຽບກົດໝາຍບ້ານເມືອງ, ນອກຈາກນີ້, ການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມຂອງເມືອງ ຕ້ອງໃຫ້ຕິດພັນ ກັບການຮັກສາສິ່ງແວດລ້ອມ, ແຫຼ່ງນ້ຳຕ່າງໆ ໃຫ້ມີຄວາມຍືນຍົງ ແລະ ໃຫ້ມີຜົນກະທົບໜ້ອຍທີ່ສຸດ ຕໍ່ສະພາບແວດລ້ອມ, ເອົາໃຈໃສ່ນຳພາປະຊາຊົນ ສ້າງເສດຖະກິດຄອບຄົວໂດຍສະເພາະ ການຜະລິດໃຫ້ກຸ້ມຢຸ່ກຸ້ມກິນ ແລ້ວຂະຫຍາຍຕົວຂຶ້ນ ໃຫ້ກາຍເປັນສິນຄ້າ ເພື່ອສ້າງໃຫ້ປະຊາຊົນມີລາຍຮັບເພີ່ມສູງຂື້ນກວ່າເກົ່າ ແລະ ສາມາດ ຫຼຸດພົ້ນອອກຈາກຄວາມທຸກຍາກ ເທື່ອລະກ້າວ.
ຂ່າວ: ທິດສາຄອນ ວົງມະນີ,ໂທ: 020 5550 3434.