ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເຊກອງສະຫຼຸບຜົນງານປະຈຳປີ 2015 ຂອງອົງການຊ່ວຍເຫຼືອລ້າ ປະຊາຊົນ ນ໋ອກແວ


    ກອງປະຊຸມ ສະຫຼຸບຜົນງານ ປະຈຳປີ 2015 ຂອງອົງການຊ່ວຍເຫຼືອລ້າ ປະຊາຊົນ ນ໋ອກແວ ປະຈຳ ແຂວງເຊກອງ ຫຼື NPA ໄດ້ມີຂື້ນໃນ ວັນທີ 17 ກຸມພາ 2016 ນີ້, ທີ່ຫ້ອງປະຊຸມພະແນກ ແຜນການ ແລະການລົງທຶນແຂວງເຊກອງ,ໂດຍການເຂົ້າຮ່ວມຂອງທ່ານ ຖາວອນ ພົມມະໄລລຸນ ກຳມະການປະຈຳພັກແຂວງ, ຮອງເຈົ້າແຂວງເຊກອງ, ມີທ່ານ ນາງ ໂອຊາ ກີວເບີດ ຫົວໜ້າຄຸ້ມຄອງຝ່າຍປະຕິບັດງານ ອົງການຊ່ວຍເຫຼືອລ້າ ປະຊາຊົນນ໋ອກແວ ປະຈຳລາວ ທ່ານ ຄຼິສໂຕເຟີ ຫົວໜ້າຄຸ້ມຄອງທາງດ້ານວິຊາການ ພາກສະໜາມ ພ້ອມຄະນະ ພັດທະນາຊົນນະບົດແລະ ລຶບລ້າງຄວາມທຸກຍາກ ແຂວງເຊກອງ ແລະ ພາກສ່ວນກ່ຽວຂ້ອງເຂົ້າຮ່ວມ.
    ທ່ານ ນາງ ວັນນີ ສຸດທະສີ ຫົວໜ້າປະຕິບັດງານພາກສະໜາມ ອົງການຊ່ວຍເຫຼືອລ້າ ປະຊາຊົນນ໋ອກແວ ຫຼື NPA ໄດ້ກ່າວວ່າ: ອົງການ NPA ໄດ້ເລີ່ມຕົ້ນ ດຳເນີນງານຢູ່ແຂວງເຊກອງ ມາແຕ່ເດືອນ ພະຈິກ ປີ 2009 ເຊິ່ງປະກອບມີ 3 ທິມງານພາກສະໜາມ ເຄື່ອນໃຫວສຳຫຼວດ ເກັບກູ້ລະເບີດບໍ່ທັນແຕກ ໃນຂອບເຂດພື້ນທີ່ ທີ່ມີຄວາມສ່ຽງ ໃນການດຳລົງຊີວິດຂອງປະຊາຊົນ ແຂວງເຊກອງ, ຜ່ານການຈັດຕັ້ງປະຕິບັດຕົວຈິງ, ນອກຫຼັກວິຊາການໄດ້ 207ບ້ານ,ໃນນັ້ນມີ 105 ບ້ານທີ່ຖືກຜົນກະທົບຈາກລະເບີດກະປາງ ໃນເນື້ອທີ່ຫຼາຍກວ່າ 75 ກວ່າຕາລາງກິໂລແມັດ ແລະ ໄດ້ກຳນົດເປັນເຂດອັນຕະລາຍ ຈຳນວນ 709 ເຂດ, ກວມເອົາເນື້ອທີ່ ຫຼາຍກວ່າ 41 ກວ່າຕາລາງກິໂລແມັດ, ມີລະເບີດກະປາງ ທີ່ຖືກທຳລາຍ ລະຫວ່າງການສຳຫຼວດມີ 12.393 ໜ່ວຍ, ລະເບີດ ອື່ນໆ 1.061 ໜ່ວຍ, ສຳລັບປີ 2015 ນີ້ສາມາດສຳຫຼວດ ຕາມຫຼັກວິຊາການຢູ່ 4 ເມືອງຄື: ເມືອງລະມາມ, ເມືອງທ່າແຕງ, ເມືອງດາກຈຶງ ແລະ ເມືອງກະລືມ ໃນ 148 ບ້ານ, ກວມເອົາພື້ນທີ່ 13 ພັນ 877 ກວ່າຕາແມັດ, ໃນນັ້ນມີພື້ນທີອັນຕະລາຍ 5 ພັນ 345 ກວ່າຕາແມັດ, ພົບລະເບີດທັງໝົດ 2.388 ໜ່ວຍ, ໃນນັ້ນ, ບົມບີ 1.941 ໜ່ວຍ,ລະເບີດ ອື່ນໆ 477 ໜ່ວຍ, ໃນປີ 2015 ນີ້ໄດ້ທຳລາຍ ລະເບີດທັງໝົດໃນແຂວງເຊກອງ ຈຳນວນ 2.958 ໜ່ວຍ,ໃນນີ້ ລະເບີດກະປາງ 2.419 ໜ່ວຍ, ລະເບີດ ອື່ນໆ 539 ໜ່ວຍ.
    ຂະນະດຽວກັນນີ້ ທ່ານ ນາງ ໂອຊາ ກີວເບີດ ຫົວໜ້າຄຸ້ມຄອງຝ່າຍປະຕິບັດງານ ອົງການຊ່ອຍເຫຼືອລ້າ ປະຊາຊົນນ໋ອກແວ ປະຈຳລາວ ກໍ່ໄດ້ກ່າວວ່າ: ສຳລັບໃນປີ 2016 ນີ້ອົງການ NPA ແມ່ນມີເຕັກນິກ ອັນໃໝ່ໃນການສຳຫຼວດ ຊອກຫາວັດຖຸລະເບີດຢູ່ໜ້າດິນ ແລະ ພື້ນດິນ ດ້ວຍການນຳໃຊ້ ສັດດົມກິ່ນເພື່ອຊອກຫາ ວັດຖຸ ດິນລະເບີດເຊິ່ງມີປະສິດທິຜົນສູງ ແລະ ປະຢັດເວລາ ໃນການສຳຫຼວດ, ວິທີ່ດັ່ງກ່າວນີ້ ແມ່ນຖຶກນຳໃຊ້ແລ້ວ ຢູ່ແຂວງສາລະວັນເຫັນວ່າມີປະສິດທິຜົນສູງ ແລະ ສະເໜີ ອຳນາດການປົກຄອງແຂວງເຊກອງ ຄົ້ວຄົ້ວ ປືກສາຫາລື ເປັນເອກະພາບເພື່ອຮັບຮອງເອົາ ເຕັກນິກດັ່ງກ່າວ, ທັງໜີ້ກໍ່ເພື່ອເຮັດໃຫ້ລະເບີດທີ່ບໍ່ທັງແຕກ ທີ່ຕົກຄ້າງແຕ່ສະໄໝສົງຄາມ ຢູ່ໃນ ສປປ ລາວ, ເວົ້າລວມ, ເວົ້າສະເພາະ ແມ່ນແຂວງເຊກອງ ໃຫ້ໝົດໄປ ແລະ ເຮັດໃຫ້ການດຳລົງຊີວິດ ປະຊາຊົນບັນດາເຜົ່າມີຄວາມປອດໄພ ຈາກລະ ເບີດບໍທັນແຕກ.
ຂ່າວ: ທິດສາຄອນ ວົງມະນີ,ໂທ: 020 5550 3434.