ວັນຈັນ, 15 ຕຸລາ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ພິທີເປີດບຸນຊ້າງ ປະຈຳປີ 2015 ຈັດຂຶ້ນ ຢ່າງຍິ່ງໃຫຍ່

ໃນວັນທີ 14 ກຸມພາ 2015 ທີ່ເມືອງ ແລະ ແຂວງໄຊຍະບູລີ ໄດ້ມີພິທີເປີດມະຫາກຳບຸນຊ້າງ ຄັ້ງທີ 9 ປະຈຳປີ 2015 ຂຶ້ນຢ່າງຍິ່ງໃຫຍ່. ໂດຍໃຫ້ກຽດເຂົ້າຮ່ວມຂອງທ່ານ ທອງສິງ ທຳມະວົງ ນາຍົກລັດຖະມົນຕີ; ມີທ່ານເຈົ້າແຂວງໆໄຊຍະບູລີ; ທ່ານລັດຖະມົນຕີ, ຫົວໜ້າຫ້ອງວ່າການລັດຖະບານ; ທ່ານລັດຖະມົນຕີວ່າການ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ; ທ່ານລັດ ຖະມົນຕີຊ່ວຍວ່າການ ກະຊວງພະລັງງານ ແລະ ບໍ່ແຮ່; ບັນດາທ່ານ-ແຂກທີ່ຖືກເຊີນ, ສື່ມວນຊົນທັງພາຍໃນ ແລະ ຕ່າງປະເທດ, ຕະຫຼອດຮອດພໍ່ແມ່ປະຊາຊົນ ຊາວແຂວງໄຊຍະບູລີ ເຂົ້າຮ່ວມຢ່າງ ຫຼວງຫຼາຍ.
    
ການດຳເນີນພິທີເປີດ, ຜູ້ເຂົ້າຮ່ວມໄດ້ຮັບຊົມການແຫ່ກ້ອນຂະບວນ ທີ່ມາຈາກເມືອງຕ່າງໆ ພາຍໃນແຂວງໄຊຍະບູລີ, ເຊິ່ງມີເນື້ອໃນສ່ອງແສງເຖິງ ມູນເຊື້ອປະຫວັດສາດ, ຄວາມອຸດົມສົມບູນ- ຮັ່ງມີທາງທຳມະຊາດ ຂອງທ້ອງຖິ່ນ; ວັດທະນະທໍາ, ຮີດຄອງປະເພນີ ອັນດີງາມ, ຄວາມເປັນເອກະລັກຂອງປະຊາຊົນເຜົ່າຕ່າງໆ ແລະ ອື່ນໆ; ຮັບຊົມການສະແດງໂດດຈ້ອງ; ຮັບຊົມການແຫ່ຂະບວນ ຊ້າງ, ພິທີບາສີສູ່ຂວັນຊ້າງ, ການສະແດງຄວາມສາມາດຂອງຊ້າງຄຳຮູ້  ເປັນຕົ້ນ ເຕະບານ, ແກວ່ງບ້ວງ, ນັ່ງ, ຊັກທຸງຂຶ້ນຍອດເສົາ, ເຕັ້ນລຳ, ມອບຊໍ່ດອກໄມ້ ແລະ ອື່ນໆ; ເຊິ່ງເຕັມໄປດ້ວຍບັນຍາກາດ ຟົດຟື້ນ- ມ່ວນຊື່ນ ແລະ ໄດ້ຮັບຄວາມນິຍົມຊົມຊອບ ຈາກຜູ້ເຂົ້າຮ່ວມ ເປັນຢ່າງດີ.
    
ໃນໂອກາດດຽວກັນ, ທ່ານ ຍັນຍົງ ສີປະເສີດ ຮອງເຈົ້າແຂວງໆໄຊຍະບູລີ ໄດ້ລາຍງານໃຫ້ຮູ້ວ່າ: ການຈັດບຸນຊ້າງປະຈຳປີ 2015 ນີ້, ດຳເນີນຢ່າງເປັນທາງການເປັນເວລາ 2 ວັນ (14-15 ກຸມພາ), ມີຊ້າງເຂົ້າຮ່ວມ ທັງໝົດ 66 ໂຕ, ປະກອບມີກິດຈະກຳຕ່າງໆ ເປັນຕົ້ນ ພິທີປະກວດນາງສາວງາມບຸນຊ້າງ, ການສະແດງຄອນເສີດ-ສິນລະປະວັນນະຄະດີ, ການປະກວດອາຫານພື້ນເມືອງ, ເປີດຕະຫຼາດນັດ ວາງສະແດງສິນຄ້າ ລວມຫຼາຍກວ່າ 100 ຮ້ານ, ການບໍລິການຂີ່ຊ້າງ-ຂີ່ຊ້າງຊົມເມືອງ, ການໃຫ້ອາຫານຊ້າງ, ສາທິດການໃຊ້ແຮງງານຊ້າງ, ການອາບນ້ຳຂອງຊ້າງ ລວມທັງ ບັນດາກິດຈະ ກຳທີ່ໄດ້ຮັບຊົມໄປ ກ່ອນແລ້ວນັ້ນ.
ໃນພິທີທີ່ມີຄວາມໝາຍສໍາຄັນນີ້, ທ່ານນາຍົກລັດຖະມົນຕີ, ພ້ອມດ້ວຍບັນດາທ່ານການນຳພັກ-ລັດ ຕະຫຼອດຮອດແຂກທີ່ຖືກເຊີນ ທີ່ເຂົ້າຮ່ວມ ໄດ້ໃຫ້ກຽດຕັດແຖບຜ້າ ແລະ ລັ່ນຄ້ອງ ເພື່ອ ເປີດພິທີ ຢ່າງເປັນທາງການ.