ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ຈະຍົກຍ້າຍປະຊາຊົນໄປຢູ່ເມືອງກະລຶມໃໝ່ໃນເດືອນ ກຸມພາ ນີ້

 

             ໃນວັນທີ 25-26 ມັງກອນ 2015,ຄະນະກຳມະການຄຸ້ມຄອງໂຄງການກໍ່ສ້າງ,ຍົກຍ້າຍ ແລະ ຈັດສັນເມືອງກະລືມໃໝ່ ແຂວງເຊກອງ ໄດ້ລົງກວດກາປະເມີນຜົນ 100% ມີ 3 ໜ້າວຽກໃນ 11 ໜ້າວຽກທັງໝົດຂອງໂຄງການ, ມີໜ້າວຽກ ກວດໄດ້ 100% ແລ້ວ 5 ໜ້າວຽກ ຊຶ່ງຜົນ ຄວາມຄືບໜ້າ ຂອງໂຄງການ ໂດຍລວມ ປະຕິບັດໄດ້ ທັງໝົດ 82%,ທາງ ຄະນະ ກຳມະການ ຄຸ້ມຄອງ ໂຄງການ ໄດ້ຕີລາຄາວ່າ: ມີເງື່ອນໄຂ ເກືອບຄົບຖ້ວນແລ້ວ ທີ່ຈະຍົກຍ້າຍປະຊາຊົນ ໄປຢູ່ ເມືອງກະລືມໃໝ່ ໂດຍຄາດວ່າຈະຍົກຍ້າຍໃນເດືອນ ກຸມພາ 2015 ນີ້.

             ທ່ານ ສາຍຄຳ ສຸກວັນເຮືອງ ຫົວໜ້າທິມງານ ບໍລິສັດທີ່ປຶກສາ ໃຫ້ສຳພາດວ່າ: ປັດຈຸບັນແມ່ນເລັ່ງໃນການຈັດຕັ້ງປະຕິບັດບັນດາໜ້າວຽກທີ່ຍັງຄົງຄ້າງບາງວຽກໃຫ້ສຳເລັດ ໂດຍສະເພາະສິ່ງອຳນວຍຄວາມສະດວກໃນການຂົນສົ່ງ ແລະ ເຄື່ອນຍ້າຍ ປະຊາຊົນເປັນຕົ້ນ: ວຽກກໍ່ສ້າງເສັ້ນທາງແຕ່ເມືອງເກົ່າຫາເມືອງໃໝ່ ສຳເລັດ 100%, ວຽກກໍ່ສ້າງທີ່ຢູ່ອາໄສຂອງປະຊາຊົນ ຈຳນວນ 439 ຫຼັງ, ກໍ່ສ້າງອາຄານຂອງລັດ 38 ຫຼັງ, ວຽກກໍ່ສ້າງລະບົບໄຟຟ້າ, ນ້ຳປະປາ ສຳເລັດ 100% ພ້ອມທັງນີ້ກໍແມ່ນຂຸ້ນຂ້ຽວກໍ່ສ້າງເສັ້ນທາງໃນເທສະບານເມືອງ ( ປະກອບລະບົບໄຟເຍືອງທາງ) ເພື່ອຮອງຮັບ ແລະເອື້ອຍອຳນວຍໃນການດຳລົງຊີວິດຂອງປະຊາຊົນໃຫ້ສະດວກຂຶ້ນ.

                 ຫົວໜ້າບໍລິສັດທີ່ປຶກສາ ໃຫ້ຮູ້ຕື່ມອີກວ່າ: ສຳລັບ ການເຄື່ອນຍ້າຍ ປະຊາຊົນ ແນ່ນອນ ຕ້ອງໃຫ້ໄດ້ ຍ້າຍພາຍໃນເດືອນ ກຸມພາ ນີ້ ໂດຍຈະແບ່ງເປັນ 3 ໄລຍະ ຊຶ່ງເບື້ອງຕົ້ນ ແມ່ນຈະເຄື່ອນຍ້າຍໃນ ສິ່ງທີ່ຈຳເປັນ ມາກ່ອນ, ສ່ວນສິ່ງ ປຸກສ້າງ ເກົ່າອື່ນໆ ແມ່ນຈະຍົກຍ້າຍພາຍຫຼັງ ໂດຍຄາດວ່າຈະໃຫ້ສຳເລັດໃນເດືອນ ພຶດສະພາ; ສ່ວນການເປີດນຳໃຊ້ເມືອງກະລຶມໃໝ່ ກໍຕ້ອງໃຫ້ທັນກັບເວລາ ເຖິງວ່າ: ຍັງມີບາງໜ້າວຽກທີ່ບໍ່ທັນສຳເລັດ ແຕ່ກໍ ເປັນວຽກ"ກັບລະອຽດເທົ່ານັ້ນ ຊຶ່ງທາງໂຄງການຈະໄດ້ສືບຕໍ່ຂຸ້ນຂ້ຽວເຮັດສຳເລັດຕາມສັນຍາຂອງໂຄງການທຸກປະການ.

 

          ຂ່າວ: ແພງຕາ

          ຮູບ: 0917, 1027, 0944