ວັນອາທິດ, 19 ສິງຫາ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ທ່ານ ດຣ. ບຸນປອນ ບຸດຕະນະວົງ ລົງຕິດຕາມ ການສຳຫຼວດພົນລະເມືອງ ແລະ ທີ່ຢູ່ອາໄສ ຢູ່ແຂວງສາລະວັນ

 

ວັນທີ 3 ມີນາ 2015 ຜ່ານມາ, ທ່ານ ດຣ. ບຸນປອນ ບຸດຕະນະວົງ ຮອງນາຍົກລັດຖະມົນຕີ, ຜູ້ຊີ້ນຳວຽກງານ ເສດຖະກິດມະຫາພາກ ແລະ ບໍລິການ, ທັງເປັນຫົວໜ້າຄະນະຊີ້ນຳ ການສຳຫຼວດພົນລະເມືອງ ແລະ ທີ່ຢູ່ອາໄສລະດັບຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມຊຸກຍູ້ ການສຳຫຼວດພົນລະເມືອງ ຢູ່ບ້ານນະຄອນສີກາງ ເມືອງລະຄອນເພັງ ແຂວງສາລະວັນ ໂດຍໃຫ້ການຕ້ອນຮັບ ແລະ ນຳພາລົງຕິດ ຕາມຂອງທ່ານ ຄຳບຸ່ນ ດ້ວງປັນຍາ ເຈົ້າແຂວງໆສາລະວັນ ມີຄະນະນຳແຂວງ, ຄະນະນຳເມືອງລະຄອນເພັງ, ຄະນະຊີ້ນຳການເດີນສຳຫຼວດ ຂັ້ນແຂວງ, ຂັ້ນເມືອງ ຕະຫຼອດຮອດອຳນາດການປົກຄອງ ແລະ ພໍ່ແມ່ປະຊາ ຊົນເຂົ້າຮ່ວມ.

 

ໃນໂອກາດນີ້, ທ່ານ ຄຳບຸ່ນ ດ້ວງປັນຍາ ໄດ້ລາຍງານສະພາບການສຳຫຼວດ ຂອງແຂວງ ວ່າ: ສຳລັບການສຳຫຼວດພົນລະເມືອງ ແລະ ທີ່ຢູ່ອາໄສ ທົ່ວປະເທດ ຄັ້ງທີ IV. ຜ່ານມາແຂວງສາລະວັນ ໄດ້ມີການ ຫ້າງຫາກະກຽມ ການເຮັດວຽກ 3 ໄລຍະ ຄື: ການກະກຽມ ກ່ອນການສຳຫຼວດ, ການຝຶກອົບຮົມ ແລະ ດຳເນີນ ການສຳຫຼວດພາກສະໜາມ ເຫັນວ່າ ທົ່ວແຂວງ ມີຈຳນວນບ້ານທັງໝົດ 588 ບ້ານ, 1.242 ເຂດສຳຫຼວດ, ມີນັກເດີນສຳຫຼວດ 1.366 ຄົນ. ໃນນັ້ນ, ມີນັກເດີນສຳຫຼວດສຳຮອງ 124 ຄົນ, ນັກກວດກາ 317 ຄົນຈາກສູນກາງ 2 ຄົນ, ຂັ້ນແຂວງ 3 ຄົນ ສ່ວນທີ່ເຫຼືອ ແມ່ນຢູ່ຂັ້ນເມືອງ. ມາຮອດປະຈຸບັນ, ການສຳຫຼວດພົນລະເມືອງໃນ 8 ເມືອງ ທົ່ວແຂວງ ໄດ້ຈັດຕັ້ງປະຕິບັດສຳເລັດແລ້ວ 27ສ່ວນຮ້ອຍ.

 

ຈາກນັ້ນ, ທ່ານຮອງນາຍົກ ລັດຖະມົນຕີ ໄດ້ກ່າວຍ້ອງຍໍ ຊົມເຊີຍ ຕໍ່ຜົນງານ ຂອງການສຳຫຼວດພົນລະເມືອງ ແລະ ທີ່ຢູ່ອາໄສ ຂອງແຂວງຄັ້ງນີ້. ພ້ອມທັງໄດ້ເນັ້ນໜັກ ໃຫ້ຄະນະຮັບຜິດຊອບ ຂັ້ນແຂວງ ແລະ ເມືອງ ຕະຫຼອດຮອດ ນັກເດີນສຳຫຼວດ ຈົ່ງສືບຕໍ່ ເອົາໃສ່ແກ່ການສຳຫຼວດຄັ້ງນີ້ ໃຫ້ບັນລຸຜົນສຳເລັດ ຕາມເປົ້າໝາຍທີ່ໄດ້ກຳນົດໄວ້. ສ່ວນຈຳນວນບ້ານ ທີ່ຢູ່ເຂດຫ່າງໄກສອກ ໃຫ້ຊອກຫາວິທີທາງແກ້ໄຂຮ່ວມກັນ ໃຫ້ທັນເວລາ.

 

ແຫລ່ງ: ຫ້ອງວ່າການລັດຖະບານ