ວັນພຸດ, 20 ມິຖຸນາ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ຫົວໜ້າຫ້ອງວ່າການລັດຖະບານ ຕ້ອນຮັບຜູ້ຈັດການທົ່ວໄປ ຂອງບໍລິສັດ ມິດຊູບິຊິມໍເຕີ.

ທ່ານຜູ້ຈັດການຮ່ວມມືທົ່ວໄປ ຂອງບໍລິສັດດັ່ງກ່າວ ໄດ້ນຳສະເໜີລົດຍີ່ຫໍ້ມິດຊູບິຊິ ລຸ້ນໄອມິຟ (I-MiEV) ໃຫ້ທ່ານລັດຖະມົນຕີ, ຫົວໜ້າຫ້ອງວ່າການລັດຖະບານ ໄດ້ຮັບຊາບ. ເຊິ່ງລົດລຸ້ນດັ່ງກ່າວ ເປັນລົດແລ່ນດ້ວຍໄຟຟ້າ ທີ່ທັນສະໄໝ, ສັງຄົມໃຫ້ການຕອບຮັບເປັນຢ່າງດີ ແລະ ໄດ້ລາງວັນຕ່າງໆ ໃນທົ່ວໂລກມາແລ້ວຫຼາຍລາງວັນ. ພ້ອມທັງສະແດງຄວາມເຊື່ອໝັ້ນວ່າ: ລົດທີ່ແລ່ນດ້ວຍໄຟຟ້າດັ່ງກ່າວ ຈະປະກອບສ່ວນ ເຂົ້າໃນວຽກງານປົກປັກຮັກສາສິ່ງແວດລ້ອມໂລກ ກໍ່ຄື ສປປ ລາວ ແລະ ຫວັງເປັນຢ່າງຍິ່ງວ່າ ໃນຕໍ່ໜ້າຄົນລາວ ຈະຫັນມານຳໃຊ້ລົດລຸ້ນດັ່ງກ່າວ ນັບມື້ຫຼາຍຂຶ້ນ. ເພື່ອໃຫ້ເຫັນໄດ້ຄຸນນະພາບ ແລະ ປະສິດທິຜົນຂອງລົດ ຍີຫໍ້ດັ່ງກ່າວນັ້ນ, ທ່ານກໍ່ໄດ້ຖືໂອກາດ ມອບລົດຍີ່ຫໍ້ມິດຊູບິຊິ ລຸ້ນໄອມິຟ (I-MiEV) ໃຫ້ແກ່ຫ້ອງວ່າການລັດຖະບານ ຈໍານວນ 2 ຄັນ ເພື່ອນໍາໃຊ້ ເຂົ້າໃນການປະຕິບັດວຽກງານ ຕາມຄວາມເໝາະສົມ ແລະ ເກີດຜົນປະໂຫຍດສູງສຸດ.
ໃນໂອກາດດຽວກັນ, ທ່ານລັດຖະມົນຕີ, ຫົວໜ້າຫ້ອງວ່າການລັດຖະບານ ສະແດງຄວາມຂອບໃຈ ແລະ ໄດ້ກ່າວຍ້ອງຍໍຊົມເຊີຍ ຕໍ່ກັບຜົນງານທີ່ບໍລິສັດຍາດມາໄດ້ ແລະ ເຊື່ອໝັ້ນວ່າ ທາງບໍລິສັດ ຈະປະສົບຜົນສຳເລັດ ໃນວຽກງານການຕະຫຼາດຢູ່ ສປປ ລາວ ແລະ ປະກອບສ່ວນສະໜອງ ພາຫະນະທີ່ທັນສະໄໝ ເຂົ້າໃນການດໍາລົງຊີວິດ ຂອງປະຊາຊົນລາວ ໃຫ້ມີຄວາມສະດວກສະບາຍ, ປະຢັດ ແລະ ຄຸ້ມຄ່າກັບການຊົມໃຊ້ ເປັນຢ່າງດີ.


ແຫລ່ງ: ຫ້ອງວ່າການລັດຖະບານ