ວັນອາທິດ, 19 ສິງຫາ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເສີມຂະຫຍາຍ ການຮ່ວມມື ສອງຫ້ອງວ່າການ ລັດຖະບານ ລາວ-ຫວຽດນາມ

ໂດຍຕອບສະໜອງຕາມຄຳເຊື້ອເຊີນ ຂອງທ່ານ ຫງວຽນ ວັນເນນ ກຳມະການສູນກາງພັກ, ລັດຖະມົນຕີ, ຫົວໜ້າຫ້ອງວ່າການລັດຖະບານຫວຽດນາມ ໃນວັນທີ 8-10 ຕຸລາ 2014 ທ່ານ ສອນໄຊ ສີພັນດອນ ກຳມະການສູນກາງພັກ, ລັດຖະມົນຕີ, ຫົວໜ້າຫ້ອງວ່າການລັດຖະບານລາວ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຮ່ວມກັບຄະນະຫ້ອງວ່າການ ລັດຖະບານຫວຽດນາມ.

ໃນການພົບປະຄັ້ງນີ້ ທັງສອງຝ່າຍໄດ້ຕີລາຄາສູງ ຕໍ່ສາຍພົວພັນມິດຕະພາບ, ການຮ່ວມມືແບບພິເສດ ຂອງສອງຫ້ອງວ່າການລັດຖະບານ ລາວ-ຫວຽດນາມ ໃນໄລຍະຜ່ານມາ ແລະ ລາຍງານ ສະພາບພົ້ນເດັ່ນ ໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ພາຍໃນປະເທດຂອງຕົນໃຫ້ກັນຊາບ. ພ້ອມນັ້ນ, ທັງສອງຝ່າຍໄດ້ສະແດງຄວາມຊົມເຊີຍ, ຕີລາຄາສູງຕໍ່ຜົນສຳເລັດ ການຮ່ວມມືຂອງສອງຫ້ອງວ່າການລັດຖະບານ ໃນໄລຍະຜ່ານມາ ໂດຍສະເພາະ ແມ່ນການຈັດຕັ້ງປະຕິບັດໂຄງການຮ່ວມມື ໃນໄລຍະປີ 2011 – 2013 ຊຶ່ງເປັນໂຄງການໜຶ່ງທີ່ນອນຢູ່ໃນ 10 ໂຄງການ ຊ່ວຍເຫຼືອລັດຖະບານລາວ ຂອງລັດຖະບານຫວຽດນາມ ທີ່ຈັດຕັ້ງປະຕິບັດສຳເລັດຕາມແຜນການທີ່ໄດ້ວາງໄວ້ ແລະ ມີປະສິດທິຜົນສູງ. ນອກຈາກນັ້ນ, ສອງຝ່າຍຍັງໄດ້ປຶກສາຫາລືແລກປ່ຽນບົດຮຽນ, ປະສົບການ ໃນວຽກງານການເປັນເສນາທິການ, ບໍລິການຮັບໃຊ້ລັດຖະບານ, ນາຍົກລັດຖະມົນຕີ.
ຜ່ານການພົບປະ ທັງສອງຝ່າຍ ຍັງໄດ້ເປັນເອກະພາບກັນວ່າ ຈະສືບຕໍ່ຮັກສາ ແລະ ເສີມຂະຫຍາຍສາຍພົວພັນ, ຮ່ວມມືສາມັກຄີ ອັນເປັນມູນເຊື້ອທີ່ສອງພັກ, ສອງລັດ ໄດ້ຈັດຕັ້ງປະຕິບັດ ພ້ອມນັ້ນ, ສອງຝ່າຍ ຈະສືບຕໍ່ແລກປ່ຽນ ລະຫວ່າງຄະນະນໍາ, ວິຊາການ ຂອງສອງຫ້ອງວ່າການຢ່າງເປັນປົກກະຕິ. ໃນຕໍ່ໜ້າຫ້ອງວ່າການລັດຖະບານຫວຽດນາມ ຍັງຈະສືບຕໍ່ຊ່ວຍເຫຼືອຝຶກອົບຮົມ ຍົກລະດັບດ້ານວິຊາການ ໃຫ້ພະນັກງານຫ້ອງວ່າການລັດຖະບານລາວ ກ່ຽວກັບວຽກງານເສນາທິການ, ການຄຸ້ມຄອງຈໍລະຈອນເອກະສານ, ການຄຸ້ມຄອງບໍລິຫານເວບໄຊລັດຖະບານລາວ ແລະ ຊ່ວຍຫ້ອງວ່າການລັດຖະບານລາວ ໃນການສ້າງລະບົບຊອບແວຄຸ້ມຄອງພະນັກງານ-ລັດຖະກອນ ຫ້ອງວ່າການລັດຖະບານລາວ.
ໃນໂອກາດດັ່ງກ່າວ, ທ່ານລັດຖະມົນຕີ, ຫົວໜ້າຫ້ອງວ່າການລັດຖະບານລາວ ກໍ່ໄດ້ກ່າວສະແດງຄວາມຂອບໃຈມາຍັງ ລັດຖະບານຫວຽດນາມ ເວົ້າລວມ, ເວົ້າສະເພາະກໍ່ແມ່ນ ຫ້ອງວ່າການລັດຖະບານຫວຽດນາມ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອບໍ່ວ່າດ້ານທຶນຮອນ ກໍ່ຄືວິຊາການ ແລະ ຫວັງຢ່າງຍິ່ງວ່າ ໃນຕໍ່ໜ້າກໍ່ຈະໄດ້ຮັບການສະໜັບສະໜູນ ຕື່ມອີກ. ໃນໄລຍະຢ້ຽມຢາມ ແລະ ເຮັດວຽກຢູ່ຫ້ອງວ່າການລັດຖະບານຫວຽດນາມນັ້ນ ຄະນະຫ້ອງວ່າການລັດຖະບານລາວ ຍັງໄດ້ຢ້ຽມຢາມສູນຂໍ້ມູນຂ່າວສານເອເລັກໂຕນິກ ແລະ ພະແນກຄຸ້ມຄອງ ຈໍລະຈອນເອກະສານ ຂອງຫ້ອງວ່າການລັດຖະບານຫວຽດນາມ ຕື່ມອີກ. http://laogov.gov.la/activities/pages/office.aspx?ItemID=62