ວັນພຸດ, 20 ມິຖຸນາ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ທ່ານນາຍົກລັດຖະມົນຕີ ລົງເຄື່ອນໄຫວຊີ້ນໍາວຽກງານ ຢູ່ ແຂວງເຊກອງ

ທ່ານນາຍົກລັດຖະມົນຕີ ທອງສິງ ທຳມະວົງ ພ້ອມດ້ວຍຄະນະ ໄດ້ເດີນທາງໄປ ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງເຊກອງ ໃນວັນທີ 7 ມັງກອນ 2015 ໂດຍມີ ທ່ານ ຄໍາເຜີຍ ບຸດດາວຽງ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆເຊກອງ ພ້ອມດ້ວຍບັນດາຄະນະນຳຂອງແຂວງ, ຄະນະນໍາຂອງເມືອງ, ບັນດາພະແນກການ ອ້ອມຂ້າງພາຍໃນແຂວງ ໄດ້ໃຫ້ກຽດຕ້ອນຮັບ.
ໃນການມາເຄື່ອນໄຫວຢ້ຽມຢາມ ແລະ ເຮັດວຽກ ຂອງຄະນະທ່ານນາຍົກລັດຖະມົນຕີ ຄັ້ງນີ້ ທ່ານ ຄໍາເຜີຍ ບຸດດາວຽງ ໄດ້ລາຍງານໃຫ້ຊາບ ກ່ຽວກັບ ສະພາບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຢູ່ແຂວງເຊກອງ ໃນສົກປີ 2013 – 2014 ວ່າ:ເຖິງແມ່ນວ່າ ໃນໄລຍະສົກປີຜ່ານມາ ຢູ່ພາຍໃນແຂວງ ຈະປະເຊີນກັບຜົນກະທົບ ໄພພິບັດທາງທໍາມະຊາດ ຝົນຕົກໜັກແກ່ຍາວຫຼາຍເດືອນ ເຊິ່ງເຮັດໃຫ້ພື້ນຖານໂຄງລ່າງ ທາງດ້ານຄົມມະນາຄົມ ຂົນສົ່ງ, ຖະໜົນຫົນທາງຫຼາຍເສັ້ນ ໄດ້ຮັບຄວາມເປ່ເພ ແລະ ຖືກຕັດຂາດຫຼາຍເສັ້ນ ບໍ່ສາມາດສັນຈອນໄປມາໄດ້, ພື້ນຖານການຜະລິດຂອງປະຊາຊົນ ຖືກນໍ້າຖ້ວມ ເສຍຫາຍຫຼາຍຮ້ອຍເຮັກຕາ, ແຕ່ຍ້ອນພາຍໃຕ້ການຊີ້ນໍາ-ນໍາພາ ຂອງຂັ້ນເທິງ ບວກກັບ ຄວາມເປັນເຈົ້າການ ແລະ ເປັນຈິດໜຶ່ງໃຈດຽວ ຂອງຄະນະພັກອໍານາດການປົກຄອງ ກັບພໍ່ແມ່ປະຊາຊົນ ຈິ່ງສາມາດຜ່ານຜ່າ ແກ້ໄຂຟື້ນຟູເຮັດໃຫ້ຊີວິດການເປັນຢູ່ ຂອງປະຊາຊົນ ກັບຄືນສູ່ປົກກະຕິໂດຍໄວ. ມາຮອດປະຈຸບັັນ ໂດຍລວມແລ້ວ ສະພາບພາຍໃນແຂວງ ແມ່ນຍັງສືບຕໍ່ຮັກສາໄດ້ ຄວາມມີສະຖຽນລະພາບທາງດ້ານການເມືອງ ຢ່າງໜັກແໜ້ນ, ສັງຄົມມີຄວາມສະຫງົບປອດໄພ, ເສດຖະກິດ ສືບຕໍ່ຂະຫຍາຍຕົວຢ່າງຕໍ່ເນື່ອງ ລວມຍອດຜະລິດຕະພັນພາຍໃນ ບັນລຸໃນລະດັບ 14,5%, ສະເລ່ຍລາຍຮັບຕໍ່ຫົວຄົນ ບັນລຸໄດ້ເຖິງ 1.137 ໂດລາຕໍ່ຄົນຕໍ່ປີ. ດ້ານການລົງທຶນຂອງລັດ ຢູ່ແຂວງເຊກອງ ທີ່ໄດ້ຮັບຮອງຈາກສະພາແຫ່ງຊາດ ໃນສົກປີ 2013 – 2014 ມີທັງໝົດ 162 ໂຄງການ, ມູນຄ່າ 101,2 ຕື້ກີບ ແມ່ນສາມາດປະຕິບັດສໍາເລັດ 100%. ປະຈຸບັນ ເສັ້ນທາງທີ່ສາມາດທຽວໄດ້ສອງລະດູ ກວມ 50%. ບ້ານທີ່ໄດ້ຊົມໃຊ້ໄຟຟ້າ ກວມເອົາ 59%. ສໍາລັບການຈັດຕັ້ງປະຕິບັດ ບັນດາໂຄງການບູລິມະສິດ ຂອງລັດຖະບານ ເຊັ່ນ: ໂຄງການກໍ່ສ້າງ-ການຍົກຍ້າຍຈັດສັນ ຕົວເມືອງກະລຶມໃໝ່, ໂຄງການກໍ່ສ້າງ ເຂື່ອນໄຟຟ້າຫ້ວຍລໍາພັນໃຫຍ່ ລ້ວນແລ້ວ ແຕ່ມີຄວາມຄືບໜ້າ.ໃນຂົງເຂດການຜະລິດ ກະສິກຳກໍ່ໄດ້ຂະຫຍາຍຕົວ ຢ່າງກ້ວາງຂວາງ ເປັນຕົ້ນແມ່ນ: ຂະບວນການປູກເຂົ້າ ໃນເນື້ອທີ່ທັງໝົດ 12 ພັນກວ່າເຮັກຕາ, ຜົນຜະລິດເຂົ້າໄດ້ 43 ພັນກ່ວາໂຕນ, ການປູກພືດ ເປັນສິນຄ້າ ບັນລຸໄດ້ 467.018 ໂຕນ ໃນເນື້ອທີ່ 37.003 ເຮັກຕາ. ໃນນັ້ນ, ອັນພົ້ນເດັ່ນແມ່ນ ຜົນຜະລິດກາເຟ, ຜັກກາດຫໍ່, ກະລໍ່າປີ, ສາລີແຂງ. ນອກຈາກການປູກກາເຟ ແລະ ພືດຜັກແລ້ວ. ປະຈຸບັນ ແຂວງຍັງໄດ້ລິເລີ່ມທົດລອງ ຂະບວນການປູກໝາກພິກໄທ ແລະ ທົດລອງການປູກໂສມງອກລິ່ງ; ສໍາລັບຂະບວນການລ້ຽງສັດ ກໍ່ມີລັກສະນະຂະຫຍາຍຕົວ ຢ່າງກ້ວາງຂວາງ ແລະ ເພີ່ມຂຶ້ນຢ່າງຕັ້ງໜ້າ; ສ່ວນວຽກງານວັດທະນະທໍາ-ສັງຄົມ ແມ່ນໄດ້ສໍາເລັດ ໃນການປະກາດຈົບຂັ້ນປະຖົມບໍາລຸງ ໃນທົ່ວແຂວງ. ການສ້າງບ້ານວັດທະນະທໍາ, ບເານປອດຄະດີ ແລະ ບ້ານສາທາລະນະສຸກແບບຢ່າງ ກໍ່ໄດ້ເພີ່ມຂຶ້ນ.
ໃນໂອກາດນີ້ ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍ ຕໍ່ບັນດາຜົນສຳເລັດຂອງແຂວງ, ເມືອງ ກໍ່ຄື ບ້ານ ໃນໄລຍະຜ່ານມາ ທີ່ໄດ້ມີຄວາມພະຍາຍາມສູງ ໃນການຈັດຕັ້ງປະຕິບັດ ນະໂຍບາຍຂອງພັກ, ຂອງລັດ ເຊິ່ງເຮັດໃຫ້ມີຫຼາຍອັນ ໄດ້ຮັບການປ່ຽນແປງ ແລະ ມີການປັບປຸງດີຂຶ້ນ, ພື້ນຖານໂຄງລ່າງກໍ່ໄດ້ຮັບການພັດທະນາ, ນອກຈາກນັ້ນ ວຽກງານການເມືອງແນວຄິດ ກໍ່ໄດ້ມີການສຶກສາອົບຮົມ, ວຽກງານປ້ອງກັນຊາດ-ປ້ອງກັນຄວາມສະຫງົບ ເຮັດໃຫ້ທົ່ວແຂວງ ມີຄວາມສະຫງົບຢ່າງໜັກແໜ້ນ, ເຮັດໃຫ້ຮາກຖານ ມີລະບົບປ້ອງກັນຊາດ-ປ້ອງກັນຄວາມສະຫງົບໜາແໜ້ນ. ວຽກງານເສດຖະກິດ ກໍ່ມີບາດກ້າວຂະຫຍາຍຕົວພໍສົມຄວນ ເຊິ່ງເຮັດໃຫ້ລາຍຮັບ ຂອງແຂວງສູງຂຶ້ນ, ຊີວິດການເປັນຢູ່ຂອງປະຊາຊົນ ກໍ່ນັບມື້ນັບດີຂຶ້ນ ເຮັດໃຫ້ບັນດາຄອບຄົວທຸກຍາກ ມີຈຳນວນຫຼຸດລົງເທື່ອລະກ້າວ, ປະຊາຊົນ ມີຄວາມຕື່ນຕົວເປັນເຈົ້າຕົນເອງຫຼາຍຂຶ້ນ ແລະ ເດັ່ນກວ່າໝູ່ແມ່ນຂະບວນການລ້ຽງສັດ ແລະ ຂະບວນການຜະລິດເປັນສິນຄ້າຢູ່ໃນແຂວງ ເຊິ່ງເປັນການປະກອບສ່ວນ ເຂົ້າໃນການບັນລຸເປົ້າໝາຍສະຫັດສະຫວັດ ດ້ານການພັດທະນາຢ່າງຕັ້ງໜ້າ. ແຕ່ເຖິງຢ່າງໃດກໍ່ດີ ໃນໂອກາດທີ່ມາຢ້ຽມຢາມນີ້, ທ່ານນາຍົກລັດຖະມົນຕີໄດ້ສະເໜີໃຫ້ແຂວງ ແລະ ເມືອງ ເອົາໃຈໃສ່ບາງບັນຫາຕື່ມ ດັ່ງນີ້:
ດ້ານການເມືອງແນວຄິດ ຕ້ອງໄດ້ສຸມໃສ່ ສຶກສາອົບຮົມພະນັກງານ, ທະຫານ, ຕຳຫຼວດ, ເຈົ້າໜ້າທີ່ທຸກຂັ້ນ, ຕະຫຼອດຮອດພໍ່ແມ່ປະຊາຊົນ ໃຫ້ເຂົ້າໃຈເລິກເຊິ່ງເຖິງຖອງ, ມີຄວາມສະຫງົບອຸ່ນອ່ຽງ, ເຊື່ອໝັ້ນຕໍ່ການນໍາພາຂອງພັກ-ລັດ ກໍ່ຄື ການພັດທະນາປະເທດ ໃນໄລຍະໃໝ່, ເນື່ອງຈາກວ່າ ປະຈຸບັນຜູ້ບໍ່ຫວັງດີ ໄດ້ໃຊ້ທຸກເລ່ລ່ຽມ ແລະ ທຸກກົນອຸບາຍ ໃນການໃສ່ຮ້າຍປ້າຍສີ, ໂຈມຕີພັກ-ລັດ, ບັນດາຜູ້ນໍາທັງຢູ່ສູນກາງ ແລະ ທ້ອງຖິ່ນ ດ້ວຍວິທີການ ໃຊ້ພາຫະນະສື່ສານທັນສະໄໝ ຫຼື ສື່ອອນໄລຕ່າງໆ ເປັນເຄື່ອງມື; ເອົາໃຈໃສ່ ເຮັດວຽກງານປກຊ-ປກສ ຢູ່ຮາກຖານໃຫ້ດີຂຶ້ນກວ່າເກົ່າ. ໂດຍສະເພາະ ແມ່ນການສຶກສາອົບຮົມ ທາງດ້ານການເມືອງແນວຄິດ; ດ້ານເສດຖະກິດ ສືບຕໍ່ຕັ້ງໜ້າເສີມຂະຫຍາຍ ເພື່ອຊອກໃຫ້ໄດ້ທ່າແຮງ ການຜະລິດກະສິກຳເປັນສິນຄ້າ; ດ້ານວຽກງານວັດທະນະທຳ-ສັງຄົມ ເຖິງແມ່ນວ່າ ຈະປະກາດຈົບຊັ້ນບໍາລຸງແລ້ວ ກໍ່ຈະຕ້ອງເອົາໃຈໃສ່ ຈັດຕັ້ງບໍາລຸງການສຶກສາຕື່ມອີກ. ຄຽງຄູ່ກັນນັ້ນ ສືບຕໍ່ເອົາໃຈໃສ່ ປ້ອງກັນພະຍາດຕາມລະດູ; ເອົາໃຈໃສ່ ດໍາເນີນຊີວິດການເມືອງ ໃຫ້ເລິກເຊິ່ງເຖິງຖອງ ສາມາດຕີລາຄາຖອດຖອນໄດ້ ບົດຮຽນທັງດ້ານດີ, ດ້ານອ່ອນ ແລະ ດ້ານຄົງຄ້າງ ຊອກໃຫ້ໄດ້ ສາຍເຫດທີ່ພາໃຫ້ເກີດ ການນໍາພາ ຂອງຄະນະພັກຕົນ ໃນໄລຍະຜ່ານມາ; ເອົາໃຈໃສ່ ໃນການຈັດຕັ້ງຜັນຂະຫຍາຍ ມະຕິຜົນກອງປະຊຸມ ສະຫຼຸບຖອດຖອນທົດລອງວຽກງານ 3 ສ້າງ ໃຫ້ລົງເລິກ ແລະ ເຂົ້າສູ່ຊີວິດຕົວຈິງ ໃຫ້ໄວຂຶ້ນ; ໃນຕໍ່ໜ້າຕ້ອງ ໃຫ້ເອົາໃຈໃສ່ ໃນການຄັດເລືອກຍ້ອງຍໍ ບຸກຄົນທີ່ດີເດັ່ນ ຕໍ່ຜູ້ທີ່ມີຜົນງານ ໃນການຈັດຕັ້ງປະຕິບັດໜ້າທີ່ວຽກງານ ຕ້ອງຄັດເລືອກບຸກຄົນ ແລະ ພາກສ່ວນໃນຂັ້ນຕ່າງໆ ໃຫ້ໄດ້ນາມມະຍົດນັກຮົບແຂ່ງຂັນແຮງງານ, ວິລະຊົນແຮງງານ; ບັນຫາສຸດທ້າຍ ຕ້ອງໄດ້ເອົາໃຈໃສ່ ຈັດຕັ້ງປະຕິບັດວຽກງານ 4 ບຸກທະລຸ ໃຫ້ປະກົດຜົນເປັນຈິງ ເວົ້າລວມ, ເວົ້າສະເພາະ ແມ່ນການບຸກທະລຸທາງດ້ານຈິນຕະນາການ.

ໃນໂອກາດຢ້ຽມຢາມ ແລະ ເຮັດວຽກ ຢູ່ແຂວງເຊກອງ ຄັ້ງນີ້ ທ່ານນາຍົກລັດຖະມົນຕີ ພ້ອມດ້ວຍຄະນະກໍ່ໄດ້ເດີນທາງ ໄປຢ້ຽມຢາມ ໂຄງການຈໍານວນໜຶ່ງ ເປັນຕົ້ນແມ່ນ: ໂຄງການ ປູກຕົ້ນໝາກພິກໄທ ຢູ່ບ້ານກະປື, ເມືອງທ່າແຕງ ຂອງກຸ່ມບໍລິສັດ ຮວ່າງແອງຢາລາຍ; ໂຄງການ ປູກໜໍ່ໄມ້ຝຣັ່ງ ຢູ່ບ້ານກໍາກອກ, ເມືອງທ່າແຕງ ຂອງບໍລິສັດ ກ້າວໜ້າການກະເສດ ແລະ ຢ້ຽມຢາມສູນຜະລິດລູກໝູ, ລູກເປັດ, ລູກໄກ່ ຟາມໄຊຊະນະລ້ຽງໝູ ແລະ ສັດປິກຄົບວົງຈອນ ຢູ່ ບ້ານ ໂນນໜອງຫວ້າ, ເມືອງລະນາມ.