ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ສົກ 2014-2015 ນີ້ອັດຕາຄວາມທຸກຍາກຂອງປະຊາຊົນເມືອງກະລຶມຫຼຸດລົງ 31%

    ໃນໄລຍະຜ່ານມາ ອຳນາດການປົກຄອງ ເມືອງກະລຶມ ໄດ້ເອົາໃຈໃສ່ ໃນການແກ້ໄຂ ຊີວິດ ການເປັນຢູ່ ຂອງປະຊົາຊົນ ໃຫ້ດີຂື້ນ ເປັນກ້າວໆ, ດ້ວຍການ ຖືເອົາ ວຽກງານ ພັດທະນາຊົນນະບົດ ລຶບລ້າງ ຄວາມທຸກຍາກ ຂອງປະຊາຊົນ ເປັນບັນຫາ ສຳຄັນ, ຕິດພັນກັບ ການຈັດສັນ ເຕົ້່າໂຮມ ບ້ານນ້ອຍ ເຂົ້າເປັນບ້ານໃຫຍ່, ສ້າງບ້ານໃຫຍ່ ໃຫ້ກາຍເປັນ ຕົວເມືອງນ້ອຍ ໃນຊົນນະບົດ.
    ທ່ານ ສາຍຄຳ ແກ້ວບຸນປານ ຄະນະປະຈຳພັກເມືອງ, ຮອງເຈົ້າເມືອງໆ ກະລຶມ, ຜູ້ຊີ້ນໍາ ວຽກງານເສດຖະກິດ, ໄດ້ຕີລາຄາຄືນ ໃນການ ຈັດຕັ້ງ ປະຕິບັດ ວຽກງານ ພັດທະນາຊົນນະບົດ ແລະ ລຶບລ້າງ ຄວາມທຸກຍາກ ໃນສົກ 2014-2015 ຕໍ່ກອງປະຊຸມ ຄົບຄະນະ ບໍລິຫານງານ ພັກເມືອງ ຄັ້ງທີ 3 ສະໄໝທີ 8 ທີ່ໄຂຂື້ນ ໃນວັນທີ 24 ພະຈິກ 2015 ນີ້ວ່າ: ໃນໄລຍະ 1 ປີຜ່ານມາ ຄະນະພັກ ອຳນາດການປົກຄອງເມືອງ ໄດ້ຖືເອົາ ວຽກງານ ພັດທະນາຊົນນະບົດ ລຶບລ້າງ ຄວາມທຸກຍາກ ເປັນວຽກງານ ຕົ້ນຕໍ ໃນການ ຊີ້ນຳ ນຳພາ ເຊິ່ງ ເຫັນວ່າ ມີຜົນສຳເລັດ ຫຼາຍດ້ານ, ໂດຍສະເພາະ ສາມາດ ເຕົ້າໂຮມ ບ້ານນ້ອຍ ເຂົ້າເປັນ ບ້ານໃຫຍ່ ໄດ້ 6 ບ້ານ, ພ້ອມນີ້ ຍັງໄດ້ສົ່ງເສີມ ໃຫ້ແກ່ຄອບຄົວທຸກຍາກ ເອົາໃຈໃສ່ ໃນການຜະລິດ, ປູກຝັງ ລ້ຽງສັດ ສ້າງ ເສດຖະກິດ ຄອບຄົວ ໃຫ້ກຸ້ມກິນໄດ້ 1.798 ຄອບຄົວ, ເພີ່ມຂື້ນ 69%, ຂອງຄອບຄົວ ທັງໝົດ 2.621 ຄອບຄົວ, ນອກນີ້ ຍັງໄດ້ເຄື່ອນໃຫວ ລົງປະເມີນ ຄອບຄົວທຸກຍາກ ໃນທົ່ວເມືອງ ໄດ້ສຳເລັດ ໃນນັ້ນ ມີຄອບຄົວທຸກຍາກ 823 ຄອບຄົວ, ທຽບໃສ່ ປີຜ່ານມາ ອັດຕາ ຄວາມທຸກຍາກ ຫຼຸດລົງ 31%, ຂອງຄອບຄົວ ທັງໝົດ, ຄຽງຄູ່ກັນນີ້ ກໍ່ ໄດ້ເອົາໃຈໃສ່ ໃນການ ກໍ່ສ້າງ ພື້ນຖານໂຄງຮ່າງ ຍົກຍ້າຍ, ຈັດສັນບ້ານ ທີ່ໄດ້ຮັບ ຜົນກະທົບ ຈາກການຂຸດຄົ້ນ ຖ່ານຫີນ ສຳເລັດ 100%, ເຄື່ອນໃຫວ ຕິດຕາມ ການຍົກຍ້າຍ ເມືອງກະລຶມ ມາຮອດປະຈຸບັນສຳເລັດ100%.
    ທ່ານ ສາຍຄຳ ແກ້ວບຸນປານ ກ່າວຕື່ມວ່າ: ສໍາລັບ ທິດທາງ ໃນຕໍ່ໜ້າ ແມ່ນຈະໄດ້ສືບຕໍ່ ລົງເກັບກໍາ ຂໍ້ມູນບັນດາບ້ານ ເປົ້າໝາຍ ທີ່ຈະເຕົ້າໂຮມ ເຂົ້າເປັນບ້ານໃຫຍ່ ແລະ ຊຸກຍູ້ ສົ່ງເສີມ ປະຊາຊົນ ໃຫ້ຫັນມາ ເຮັດອາຊີບແບບຄົງທີ່ ເພື່ອສ້າງ ໃຫ້ປະຊາຊົນ ມີລາຍຮັບ ໃຫ້ສູງຂື້ນ ແລະ ສ້າງເງື່ອນໄຂ ໃນການ ສ້າງບ້ານ ໃຫ້ກາຍເປັນ ບ້ານພັດທະນາ ໃນຕໍ່ໜ້າ.

ຂ່າວ: ທິດສາຄອນ ວົງມະນີ, ຂ່າວ TV-RO
ໂທ: 020 5550 3434.