ວັນອັງຄານ, 23 ຕຸລາ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ໄຂກອງປະຊຸມສະຫລຸບວຽກງານ ປະຈຳປີ 2014 ຂອງຫ້ອງວ່າການລັດຖະບານ

3.2.2015.2

ກອງປະຊຸມສະຫຼຸບວຽກງານ ປະຈຳປີ 2014 ແລະ ແຜນວຽກຈຸດສຸມປີ 2015 ຂອງຫ້ອງວ່າການລັດຖະບານ (ຫລບ) ໄດ້ໄຂຂຶ້ນໃນຕອນເຊົ້າ ຂອງວັນທີ 3 ກຸມພາ 2015 ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ. ພາຍໃຕ້ການເປັນປະທານ ຂອງທ່ານ ສອນໄຊ ສີພັນດອນ ລັດຖະມົນຕີ, ຫົວໜ້າຫ້ອງວ່າການລັດຖະບານ. ມີບັນດາທ່ານ ລັດຖະມົນຕີປະຈຳຫລບ, ບັນດາທ່ານ ລັດຖະມົນຕີຊ່ວຍວ່າການ, ພະນັກງານຫຼັກແຫຼ່ງ, ແຂກຖືກເຊີນ ແລະ ພະນັກງານງານ ວິຊາການ ທົ່ວຫ້ອງວ່າການລັດຖະບານ ເຂົ້າຮ່ວມຢ່າງພ້ອມພຽງ.

ໃນໂອກາດກ່າວເປີດກອງປະຊຸມ ທ່ານປະທານກອງປະຊຸມ ໄດ້ແຈ້ງໃຫ້ຮູ້ວ່າ: ກອງປະຊຸມຄັ້ງນີ້ ຈະໄດ້ດຳເນີນເປັນເວລາ 2 ວັນ ນັບແຕ່ວັນທີ 3-4 ກຸມພາ 2015 ພາຍໃນກອງປະຊຸມ ຈະໄດ້ຮັບຟັງການເຜີຍແຜ່ ແລະ ເຊື່ອມຊຶມ ບັນດາເອກະສານສຳຄັນຕ່າງໆ ເປັນຕົ້ນ ມະຕິກອງປະຊຸມຄົບຄະນະ ຄັ້ງທີ 9 ສະໄໝທີ IX ຂອງຄະນະບໍລິຫານງານສູນກາງພັກ; ເອກະສານກ່ຽວກັບ ການນຳໃຊ້ສື່ສັງຄົມອອນລາຍ (ອິນເຕີເນັດ); ແຈ້ງການ ຂອງຄະນະຊີ້ນຳລະດັບຊາດ ກ່ຽວກັບການແຂ່ງຂັນ-ຍ້ອງຍໍ ແລະ ພັດທະນາ ກ່ຽວກັບການປະກາດ ນໍາໃຊ້ຫຼຽນນາມມະຍົດ “ວິລະຊົນແຮງງານແຫ່ງຊາດ” ແລະ ຫຼຽນນາມມະຍົດ “ພັດທະນາດີເດັ່ນແຫ່ງຊາດ” ແລະ ມະຕິວ່າດ້ວຍທິດທາງ, ເປົ້າໝາຍ ແລະ ມາດຕະການ ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ, ສ້າງບ້ານເປັນຫົວໜ່ວຍພັດທະນາ; ຜ່ານບົດສະຫຼຸບ ປະຈໍາປີ 2014 ແລະ ແຜນວຽກຈຸດສຸມປະຈຳປີ 2015 ຂອງຫ້ອງວ່າການລັດຖະບານ, ຮັບຟັງການປະກອບຄຳຄິດຄຳເຫັນ ຈາກບັນດາກົມ ແລະ ຄະນະກຳມະການ ພາຍໃນຫ້ອງວ່າການລັດຖະບານ. ພ້ອມດຽວກັນນັ້ນ, ກອງປະຊຸມ ຍັງໄດ້ຈັດພິທີການຍ້ອງຍໍ ໃຫ້ພະນັກງານ-ລັດຖະກອນ ປະຈໍາປີ 2014 ຜູ້ທີ່ມີຜົນງານດີເດັ່ນ ແລະ ເປີດຂະບວນການແຂ່ງຂັນ “ຮັກຊາດ ແລະ ພັດທະນາ” ຂອງຫ້ອງວ່າການລັດຖະບານ. ພິເສດກອງປະຊຸມຄັ້ງນີ້ ຍັງຈະໄດ້ຮັບຟັງການໂອ້ລົມ-ໃຫ້ທິດຊີ້ນຳ ຂອງ ທ່ານ ອາຊາງ ລາວລີ ຮອງນາຍົກລັດຖະມົນຕີ, ຜູ້ຊີ້ນຳວຽກງານໃນຂົງເຂດການປົກຄອງ.
ໃນໂອກາດດຽວກັນ, ທ່ານປະທານກອງປະຊຸມ ໄດ້ຮຽກຮ້ອງ ໃຫ້ຜູ້ເຂົ້າຮ່ວມກອງປະຊຸມຄັ້ງນີ້ ຈົ່ງເຊີດຊູ ແລະ ຍົກສູງຄວາມຮັບຜິດຊອບຂອງຕົນ ເພື່ອເຮັດໃຫ້ກອງປະຊຸມໃນຄັ້ງນີ້ ດຳເນີນໄປດ້ວຍຜົນສຳເລັດ ຜົນຕາມລະດັບຄາດໝາຍ ທັງເປັນການປະກອບສ່ວນທີ່ສຳຄັນ ເຂົ້າໃນພາລະກິດລວມຂອງ ພັກ ແລະ ລັດຖະບານ ເຮັດໃຫ້ປະເທດຊາດ ໄດ້ຮັບການພັດທະນາ ສາມາດບັນລຸຄາດໝາຍທີ່ ພັກ ແລະ ລັດຖະບານ ກໍານົດໄວ້.