ວັນຈັນ, 19 ພະຈິກ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເຊັນ ບົດບັນທຶກ ຄວາມເຂົ້າໃຈ ສຶກສາ ສຳຫຼວດ ຄວາມເປັນໄປໄດ້ ການກໍ່ສ້າງ ເຂື່ອນໄຟຟ້າ ຂະໜາດນ້ອຍ 15 ເມກາວັດ

 

    ຕອນແລງ ວັນທີ 13 ພະຈິກ 2015 ນີ້, ທີ່ ຫ້ອງປະຊຸມ ພະແນກ ແຜນການ ແລະ ການລົງທຶນ ແຂວງ ເຊກອງໄດ້ ຈັດພິທີ ເຊັນ ບົດບັນທຶກ ຄວາມເຂົ້າໃຈ ວ່າດ້ວຍ ສຶກສາ ສຳຫຼວດ ຄວາມ ເປັນໄປໄດ້ ໃນການ ກໍ່ສ້າງ ເຂື່ອນ ໄຟຟ້າຂະໜາດນ້ອຍ 15 ເມກາວັດ ນ້ຳອີເມິນ 1 ແລະ ອີເມິນ 2 ຢູ່ເຂດ ບ້ານ ຕັງປັງ, ເມືອງກະລຶມ, ແຂວງ ເຊກອງ, ລະຫວ່າງແຂວງ ເຊກອງ ຕ່າງໜ້າ ໂດຍ ພະແນກ ແຜນການ ແລະ ການລົງທຶນ ແຂວງ ເຊກອງ ກັບ ບໍລິສັດທັນໃຈ ກໍ່ສ້າງ ຂົວທາງຄົບວົງຈອນ ຈຳກັດຜູ້ດຽວ, ເປັນກຽດ ເຂົ້າຮ່ວມ ພິທີ ຄັ້ງນີ້ມີ ທ່ານ ດຣ ຄຳ ພຽມ ບົວລະພາ ຮອງເລຂາພັກ ແຂວງເຊກອງມີ ຂະແໜງການ ກ່ຽວຂ້ອງ ເຂົ້າຮ່ວມ.
    ການ ຮ່ວມເຊັນ ບົດບັນທຶກ ໃນຄັ້ງນີ້ ທັງສອງຝ່າຍ ໄດ້ ເປັນເອກະພາບກັນ ໃຫ້ ບໍລິສັດ ທັນໃຈ ກໍ່ສ້າງຂົວທາງຄົບວົງຈອນ ຈຳກັດຜູ້ດຽວ ເປັນຜູ້ ສຶກສາ ສຳຫຼວດ ຄວາມ ເປັນໄປໄດ້ ໃນການ ກໍ່ສ້າງ ເຂື່ອນໄຟຟ້າ ຂະໜາດນ້ອຍ 15 ເມກາວັດ ນ້ຳອີເມິນ 1 ແລະ ນ້ຳອີເມິນ 2 ຢູ່ເຂດ ບ້ານ ຕັງປັງ, ເມືອງກະລຶມ, ແຂວງ ເຊກອງ, ສຶກສາ ຄວາມ ເປັນໄປໄດ້ທາງດ້ານ ເສດຖະກິດ-ເຕັກນິກ, ຕ້ອງ ໄດ້ຕາມ ມາດຖານ ເຕັກນິກ ໄຟຟ້າ ຂອງ ສປປ ລາວ ແລະ ຕ້ອງໄດ້ຮັບ ການຢັ້ງຢືນຮັບຮອງ ແບບໂຄງສ້າງ ຂອງຕົວເຂື່ອນ ຈາກ ພະແນກ ພະລັງງານ ແລະ ບໍ່ແຮ່ ແຂວງ, ສຶກສາ ຜົນກະທົບ ທາງດ້ານສິ່ງແວດລ້ອມ ທຳມະຊາດ ແລະ ສັງຄົມ ເອົາໃຈໃສ່ ປະຕິບັດ ຕາມກົດລະບຽບ ກົດໝາຍ ປົກປັກ ຮັກສາ ສະພາບ ແວດລ້ອມ, ສຶກສາ ສຳຫຼວດ ຄວາມ ເປັນໄປໄດ້ ທາງດ້ານ ການເງິນ, ພ້ອມທັງ ເຮັດບົດລາຍງານ ຄວາມ ຄືບໜ້າ ທຸກໆ 3 ເດືອນ, 6 ເດືອນ, ແລະ 9 ເດືອນ ໃຫ້ພະແນກ ແຜນການ ແລະ ການລົງທຶນ ແຂວງ ເຊກອງ ແລະ ພະແນກ ພະລັງງານແລະ ບໍແຮ່ ບົນພື້ນຖານ ການຢັ້ງຢືນ ຈາກເມືອງ, ພາຍຫຼັງ 45 ວັນ ນັບແຕ່ ມື້ລົງລາຍເຊັນ ຜູ້ ພັດທະນາ ຕ້ອງ ໄດ້ນຳສະເໜີ ບໍລິສັດ ທີ່ ຈະເຮັດ ການສຶກສາ ສຳຫຼວດ ທາງດ້ານ ເສດຖະກິດ ເຕັກນິກ ໃຫ້ແກ່ ພະແນກ ແຜນການ ແລະ ການລົງທຶນ, ພະແນກ ພະລັງງານ ບໍແຮ່ ແລະ ຕ້ອງ ມອບເງີນ ຄ້ຳປະກັນ ຕາມລະບຽບ, ຝ່າຍ ແຂວງ ເຊກອງ ຕ້ອງ ອຳນວຍຄວາມສະດວກ ໃຫ້ ບໍລິສັດ, ເປັນ ໃຈກາງ ປະສານງານ ກັບ ຂະແໜງການ ກ່ຽວຂ້ອງ ນັບແຕ່ ສູນກາງ ຮອດ ທ້ອງຖິ່ນ, ຕິດຕາມ ການກວດ ການ ປະເມີນຜົນ, ຊຸກຍູ້ ໃຫ້ ຜູ້ລົງທຶນ ດຳເນີນ ໂຄງການ ໃຫ້ມີ ຄວາມສະດວກ ວ່ອງໄວ ຖຶກຕ້ອງ ຕາມ ກົດໝາຍ ທີ່ວາງໄວ້.
    ຂະນະ ດຽວກັນ ທ່ານ ດຣ ຄຳພຽມ ບົວລະພາ ຮອງເລຂາພັກ ແຂວງ ເຊກອງ ກໍ່ ໄດ້ກ່າວ ຮຽກຮ້ອງ ມາຍັງບໍລິສັດ ທັນໃຈ ກໍ່ສ້າງຂົວທາງ ຄົບວົງຈອນ ຈຳກັດຜູ້ດຽວ ເອົາໃຈໃສ່ ປະສານ ສົມທົບ ກັບ ຂະແໜງການ ກ່ຽວຂ້ອງ ເພື່ອກຳນົດ ຂັ້ນຕອນ ການສຶກສາ ສຳຫຼວດ ຄວາມ ເປັນໄປໄດ້ ໃນການ ພັດທະນາ ເຂື່ອນໄຟຟ້າ, ເປັນເຈົ້າການ ປະຕິບັດພັນທະ ແລະ ລາຍງານ ຜົນການ ຈັດຕັ້ງ ປະຕິບັດ ໃຫ້ ຄະນະ ຮັບຜິດຊອບ ຮັບຊາບ ເປັນ ແຕ່ລະ ໄລຍະ ແລະ ຕໍ່ເນື່ອງ, ຈາກນັ້ນ ໃນພິທີ ກໍ່ໄດ້ ເຊັນ ບົດບັນທຶກ ຮ່ວມກັນ, ຝ່າຍ ແຂວງ ເຊກອງ ໂດຍແມ່ນ ທ່ານ ທອງຄຳ ມະນີວົງ ຫົວໜ້າ ພະແນກ ແຜນການ ແລະ ການລົງທຶນ ແຂວງ ແລະ ຝ່າຍ ບໍລິສັດ ໂດຍແມ່ນ ທ່ານ ອິນປັນ ພົມສະໝຸດ ປະທານ ບໍລິສັດທັນໃຈ ກໍ່ສ້າງຂົວທາງ ຄົບວົງຈອນ ຈຳກັດຜູ້ດຽວ, ມີ ອຳນາດ ການປົກຄອງ ແຂວງ, ຂະແໜງການ ກ່ຽວຂ້ອງ ເຂົ້າຮ່ວມເປັນສັກຂີ ພິຍານ.

ຂ່າວ: ທິດສາຄອນ ວົງມະນີ, ຂ່າວ TV-RO
ໂທ: 020 5550 3434.