ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ໜ່ວຍຊາວໜຸ່ມຮາກຖານພະແນກ ຖວທ ແຂວງ ສຳເລັດກອງປະຊຸມໃຫຍ່ຄັ້ງທີ 10


    ກອງປະຊຸມໃຫຍ່ຄັ້ງທີ 10 ຂອງໜ່ວຍຊາວໜຸ່ມຮາກຖານ ພະແນກ ຖວທ ແຂວງໄດ້ໄຂຂື້ນແລະ ສຳເລັດລົງໃນວັນທີ 12 ກຸມພາ 2016 ນີ້, ທີ່ຫ້ອງປະຊຸມພະແນກ ຖວທ ແຂວງເຊກອງ, ໂດຍການເຂົ້າຮ່ວມຂອງທ່ານ ບູ່ໄຊ ໄຊຍະເສນ ກຳມະການພັກແຂວງ, ເລຂາໜ່ວຍພັກ, ຫົວໜ້າພະແນກ ຖວທ ແຂວງເຊກອງ, ທ່ານ ນາງ ວຽງສະໄໝ ວົງວິຈິດ ຮອງເລຂາ ຄະນະບໍລິຫານງານຊາວໜຸ່ມປະຊາຊົນປະຕິວັດລາວ ແຂວງເຊກອງ, ມີຄະນະໜ່ວຍຊາວໜຸ່ມ ຮາກຖານພະແນກ ຖວທ ແຂວງພ້ອມດ້ວຍສະມາຊິກຊາວໜຸ່ມພາຍໃນພະແນກເຂົ້າຮ່ວມ.
    ທ່ານ ອາທິວັດ ສຸລິວົງ ເລຂາຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ຮາກຖານພະແນກ ຖວທ ແຂວງ ໄດ້ຕີລາຄາຄືນ ຜົນສຳເລັດ ໃນການຈັດຕັ້ງປະຕິບັດ ວຽກງານຊາວໜຸ່ມ ຮາກຖານພະແນກ ຖວທ ແຂວງເຊກອງໃນສົກ 2013-2015 ຜ່ານມາວ່າ: ຄະນະໜ່ວຍຊາວໜຸ່ມ ຮາກຖານພະແນກ ຖວທ ແຂວງ ໄດ້ເອົາໃຈໃສ່ ສຶກສາອົບຮົມ ການເມືອງແນວຄິດ ໃຫ້ແກ່ສະມາຊິກ ພາຍໃນພະແນກ ຢ່າງຕັ້ງໜ້າ ເພື່ອສ້າງ ໃຫ້ສະມາຊິກທຸກສະຫາຍ ມີນ້ຳໃຈຮັກຊາດ, ມີຄຸນສົມບັດ ສິນທຳປະຕິວັດ ແລະ ມີແບບແຜນ ວິທີເຮັດວຽກ ທີ່ຖຶກຕ້ອງ ສອດຄ່ອງກັບແນວທາງ ນະໂຍບາຍຂອງພັກ,ລະບຽບ ກົດໝາຍຂອງລັດ, ໂດຍສະເພາະແມ່ນເນື້ອໃນ 4 ບຸກ ຂອງສູນກາງ ຊາວໜຸ່ມປະຊາຊົນປະຕິວັດລາວວາງອອກ ຕິດພັນກັນການຈັດຕັ້ງປະຕິບັດ ຂະບວນການແຂ່ງຂັນ ຮັກຊາດ ແລະພັດທະນາ ໄດ້ເປັນຢ່າງດີ, ນອກນີ້ ຍັງໄດ້ເອົາໃຈໃສ່ ເຂົ້າຮ່ວມຮັບຟັງ ການປະຖະກາຖາ ຫວນຄືນມູນເຊື້ອ ວັນສຳຄັນຕ່າງໆ ຂອງຊາດ, ຂອງພັກ ຢ່າງເປັນປົກກະຕິ ພ້ອມດຳເນີນການສຳຫຼວດ ກວດກາ,ດຳເນີນ ຊີວິດການເມືອງ, ເຮັດໃຫ້ ບັນດາສະມາຊິກຊາວໜຸ່ມ ທົ່ວພະແນກ ມີຄວາມສາມັກຄີ ເປັນຈິດໜື່ງໃຈດຽວ ແລະ ມີຄວາມສະຫງົບ ປອດໄພໂດຍພື້ນຖານ.
    ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ໃຊ້ສິດ ປະຊາທິປະໄຕ ປ່ອນບັດຄັດເລືອກ ເອົາຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ຮາກຖານພະແນກ ຖວທ ແຂວງເຊກອງ ຊຸດໃໝ່ ໂດຍເປັນເອກະພາບກັນ ຄັດເລືອກເອົາ ທ່ານ ມິດພະໄຊ ດວງມາລາ ເປັນເລຂາຊາວໜຸ່ມ ຮາກຖານພະແນກ ຖວທ ແຂວງ, ທ່ານ ນາງ ແພງຕາ ຈອມພົງ ເປັນຮອງເລຂາ, ທ່ານ ທິນນິກອນ ຍາທອງ ເປັນປະທານກວດກາ, ທ່ານ ບຸນລ້ວນ ພະສະແຫວງ ແລະ ທ່ານ ນາງ ມະໄລສີ ພຸດທະວົງ ເປັນຄະນະ ເພື່ອສືບຕໍ່ ຊີ້ນຳ-ນຳພາ ວຽກງານຊາວໜຸ່ມ ພາຍໃນພະແນກ ຖວທ ແຂວງເຊກອງ ໃຫ້ມີຜົນສຳເລັດດີຂື້ກວ່າເກົ່າ.
    ໃນຕອນທ້າຍ ກອງປະຊຸມ, ທ່ານ ນາງ ວຽງສະໄໝ ວົງວິຈິດ ຮອງເລຂາ ຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ແຂວງເຊກອງ ກໍ່ໄດ້ກ່າວເນັ້ນ ໃຫ້ຄະນະບໍລິຫານງານ ຊາວໜຸ່ມຮາກຖານ ພະແນກ ຖວທແຂວງເຊກອງ ຊຸດໃໝ່ ສືບຕໍ່ ຊີ້ນຳ-ນຳພາ ການເມືອງແນວຄິດ ເປັນກົກ,ເພີ່ມທະວີຄວາມສາມັກຄີ ພາຍໃນໃຫ້ໜັກແໜ້ນ, ພາຍນອກໃຫ້ກວ້າງຂວາງ, ປະຕິບັດໜ້າທີ່ ວິຊາສະເພາະໃຫ້ສຳເລັດ, ຄະນະໜ່ວຍ ຕ້ອງນຳພາສະມາຊິກ ດຳເນີນຊີວິດການເມືອງ ຢ່າງເປັນປົກກະຕິ, ເອົາໃຈໃສ່ ສ້າງກອງທຶນຊ່ວຍ ເຫຼືອເຊິ່ງກັນ ແລະ ກັນ, ພ້ອມກັນຈັດຕັ້ງປະຕິບັດ ທິດທາງແຜນການ ແຕ່ນີ້ ຮອດ 2018 ໃຫ້ສຳເລັດ ຕາມຄາດໝາຍທີ່ວາງໄວ້ ໂດຍຖືເອົາ ການປຶກສາຫາລື ເປັນໝູ່ຄະນະ, ປັບປຸງ ແບບແຜນວິທີເຮັດວຽກ ໃຫ້ສອດຄ່ອງກັບ ເນື້ອໃນ 4 ບຸກ; ຈາກນັ້ນ ຈົ່ງສືບຕໍ່ ຮັກສາມູນເຊື້ອ ແລະ ສ້າງໜ່ວຍຊາວໜຸ່ມ ຮາກຖານພະແນກ ຖວທ ແຂວງເຊກອງ ເປັນໜ່ວຍຊາວໜຸ່ມ 4 ບຸກໃຫ້ໄດ້ອີກຄັ້ງທີ 2 ໃນປີ 2016 ນີ້.
ຂ່າວ: ທິດສາຄອນ ວົງມະນີ,ໂທ: 020 5550 3434.