ວັນຈັນ, 20 ສິງຫາ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ສົກແລ້ວ ຈີດີພີ ເມືອງລະມາມບັນລຸເກືອບ 5 ຮ້ອຍຕື້ກີບ

   ໃນສົກປີຜ່ານມາ ເມືອງລະມາມ ແຂວງເຊກອງ ສາມາດປະຕິບັດແຜນ ການພັດທະນາເສດຖະກິດ-ສັງຄົມໄດ້ບັນລຸຜົນສຳເລັດ, ພ້ອມທັງມີຫຼາຍດ້ານທີ່ພົ້ນເດັ່ນ ໂດຍສະເພາະດ້ານເສດຖະກິດ, ການລົງທຶນ ແລະ ການບໍລິການ ມີບັນຍາກາດຟົດຟື້ນ ຊຶ່ງສົ່ງຜົນໃຫ້ ລວມຍອດຜະລິດຕະພັນພາຍໃນ ຫຼື GDP ບັນລຸໄດ້ເກືອບ 5 ຮ້ອຍຕື້ກີບ.

   ອີງຕາມການຕອບສຳພາດຂອງທ່ານ ແພງສີ ສີລາວີ ເຈົ້າເມືອງໆລະມາມ ໃນວັນທີ 31 ມີນານີ້ວ່າ: ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມໃນສົກ 2015-2016 ສະເພາະດ້ານເສດຖະກິດ ເຫັນວ່າ ຍັງສຶບຕໍ່ຂະຫຍາຍຕົວຢ່າງຕໍ່ເນື່ອງ ແລະ ລວມຍອດຜະລິດຕະພັນພາຍໃນ ຫຼື GDP ປະຕິບັດໄດ້ 474,43 ຕື້ກີບເພີ່ມຂຶ້ນ 12,3% ໃນນີ້, ຂະແໜງກະສິກຳເພີ່ມຂຶ້ນ 14,79% ກວມເອົາ 37,37%; ອຸດ ສາຫະກຳເພີ່ມຂຶ້ນ 14,24% ກວມເອົາ 17,08% ແລະ ການບໍລິການເພີ່ມຂຶ້ນ 18,76% ກວມເອົາ 45,55% ຂອງຈີດີພີ, ສະເລ່ຍໃສ່ຫົວຄົນໄດ້ 12,4 ລ້ານກີບຕໍ່ຄົນຕໍ່ປີ.
  ດ້ານການລົງທຶນເມືອງ ໄດ້ຮັບທັງໝົດ 108 ໂຄງການ, ລວມມູນຄ່າ 124,13 ຕື້ກີບ, ໃນນີ້ເປັນ ໂຄງການລົງທຶນຂອງລັດ 52 ໂຄງການ, ມູນຄ່າ 98,16 ຕື້ກີບ; ໂຄງການທີ່ນຳໃຊ້ທຶນຊ່ວຍເຫຼືອລ້າ-ການກູ້ຢືມ ເພື່ອການພັດທະນາ 4 ໂຄງການ, ມູນຄ່າ 2,55 ຕື້ກີບ; ທຶນ (ທລຍ) ຮອບວຽນທີ 13 ມີ 10 ໂຄງການ, ມູນຄ່າ 1,7 ຕື້ກີບ ແລະ ທຶນສິນເຊື່ອ ທະນາຄານນະໂຍບາຍ 42 ໂຄງການ, ມູນຄ່າ 21,72 ຕື້ກີບ.
  ແນວໃດກໍດີ ທ່ານເຈົ້າເມືອງໆລະມາມ ຍອມຮັບວ່າ: ເຖິງວ່າເສດຖະກິດຈະມີການຂະຫຍາຍຕົວ ເພີ່ມຂຶ້ນ, ແຕ່ເມືອງພວກເຮົາ ຍັງມີສິ່ງທ້າທາຍຈຳນວນໜຶ່ງ ທີ່ເປັນອຸປະສັກຕໍ່ການພັດທະນາ ເປັນຕົ້ນຕໍ ແມ່ນຂາດເຂີນພະນັກງານ ທີ່ມີຄວາມຮູ້, ຄວາມສາມາດ ໃນຂະແໜງການຕ່າງໆ, ການລະດົມຂົນຂວາຍການລົງທຶນ ຈາກນັກທຸລະກິດເອກະຊົນ ພາຍໃນ ແລະ ຕ່າງປະເທດ ຍັງບໍ່ທັນກວ້າງຂວາງ ລວມເຖິງໄພຂົ່ມຂູ່ ທາງທຳມະຊາດ.
  ຢ່າງໃດກໍຕາມ ໃນປີ 2017 ເມືອງຈະສຸມໃສ່ພັດທະນາດ້ວຍຈິດໃຈບຸກທະລຸ ໃຫ້ແຂງແຮງກວ່າເກົ່າ ໃນນີ້ສຳຄັນແມ່ນເຮັດໃຫ້ເມືອງມີສະຖຽນລະພາບ ທາງດ້ານການເມືອງທີ່ໜັກແໜ້ນ, ສັງຄົມມີຄວາມສະຫງົບ, ປະຊາຊົນມີຄວາມສາມັກຄີປອງດອງ ແລະ ສູ້ຊົນໃຫ້ເສດຖະກິດຂະຫຍາຍເພີ່ມຂຶ້ນ, ລວມຍອດຜະລິດຕະພັນພາຍ ໃນໃຫ້ບັນລຸໄດ້ 529,87 ຕື້ກີບ, ສະເລ່ຍໃສ່ຫົວຄົນໜຶ່ງໃຫ້ໄດ້ 14 ລ້ານກວ່າກີບ ໂດຍອາໃສ 3 ຂະແໜງການເປັນເສົາຄ້ຳຄື: ກະສິກຳ, ອຸດສາຫະກຳ ແລະ ການບໍລິການ.
   ເພື່ອບັນລຸໄດ້ແຜນການດັ່ງກ່າວ ຄະນະພັກ-ຄະນະນຳຂອງເມືອງ ຕ້ອງເອົາໃຈໃສ່ຊີ້ນຳໆພາ ຂຸດຄົ້ນທ່າແຮງບົ່ມຊ້ອນ, ປຸກລະດົມຂົນຂວາຍທຸກພາກສ່ວນ ມາມີສ່ວນຮ່ວມໃນການພັດທະນາ ທຸກຂົງເຂດຂອງເມືອງ ຢ່າງຕັ້ງໜ້າ ແລະ ສົ່ງເສີມໃຫ້ໄປຕາມແຜນການທີ່ວາງໄວ້ ໂດຍສະເພາະສຸມໃສ່ພັດທະນາພື້ນຖານໂຄງລ່າງ ໃນບ່ອນທີ່ມີເງື່ອນໄຂ, ຄຽງຄູ່ກັບ ການຫັນພະນັກງານລົງກໍສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ທີ່ສຳຄັນແມ່ນ ຊຸກຍູ້ສົ່ງເສີມການຜະລິດກະສິກຳ ເພື່ອການບໍລິໂພກພາຍໃນ ແລະ ຂາຍເປັນສິນຄ້າສົ່ງອອກ. ທ່ານ ແພງສີ ສີລາວີ ກ່າວ. 
                                                                                   ( ຂ່າວພາບ: ສັນຍາ ແກ້ວໄຊຍະວົງ )

ຜູ້ເຂົ້າຊົມ ເວັບໄຊ

ມື້ນີ້ມື້ນີ້54
ວານນີ້ວານນີ້70
ທິດນີ້ທິດນີ້36
ເດືອນນີ້ເດືອນນີ້1346
ທັງໝົດທັງໝົດ75414