ວັນອາທິດ, 23 ກັນຍາ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ທ່າແຕງ ຊົມເຊີຍບຸກຄົນ, ກົມກອງ ທີ່ຜົນງານຮັບໃຊ້ບັ້ນເລືອກຕັ້ງ ສສຊ ຊຸດທີ VIII ແລະ ສສຂ ຊຸດທີ I

     ຈາກຜົນສຳເລັດ ໃນການຮັບໃຊ້ບັ້ນເລືອກຕັ້ງ ສະມາຊິກສະພາແຫ່ງຊາດ ຊຸດທີ VIII ແລະ ສະມາຊິກ ສະພາປະຊາຊົນແຂວງ ຊຸດທີ I ໃນໄລຍະຜ່ານມາ, ຢູ່ເມືອງທ່າແຕງ ແຂວງເຊກອງ ມີບຸກຄົນ ແລະ ກົມກອງ ຈໍານວນຫຼວງຫຼາຍ ທີ່ໄດ້ຮັບການຍ້ອງຍໍ ປະເພດຫຼຽນໄຊແຮງງານຊັ້ນ II, ຊັ້ນ III, ຫຼຽນກາແຮງານ, ໃບຍ້ອງຍໍລະດັບຊາດ, ລະດັບແຂວງ ແລະ ໃບຊົມເຊີຍຢ່າງສົມກຽດ.
    ທ່ານ ສຸກັນ ຈັນສີປະເສີດ ກໍາມະການພັກເມືອງ ຫົວໜ້າ ຫ້ອງວ່າການປົກຄອງ ເມືອງທ່າແຕງ ຄະນະກໍາມະການ ເລືອກຕັ້ງຂັ້ນເມືອງ ກ່າວລາຍງານ ຜົນສຳເລັດ ໃນການຈັດຕັ້ງປະຕິບັດ ຮັບໃຊ້ບັ້ນເລືອກຕັ້ງ ສະມາຊິກສະພາແຫ່ງຊາດ ຊຸດທີ VIII ແລະ ສະມາຊິກ ສະພາປະຊາຊົນແຂວງ ຊຸດທີ I, ໂດຍໄດ້ຢັ້ງຢືນ ໃຫ້ເຫັນຢ່າງຊັດເຈນ ເຖິງຄວາມຮັບຜິດຊອບ ການເມືອງສູງ ຂອງຄະນະພັກ, ຄະນະກຳມະການ ເລືອກຕັ້ງ ລວມທັງຂັ້ນແຂວງ ແລະ ເມືອງ ກໍຄືພະນັກງານ ລັດຖະກອນ ແລະ ປະຊາຊົນບັນດາເຜົ່າ ໃນທົ່ວເຂດ ເລືອກຕັ້ງ, ທັງແມ່ນໄຊຊະນະ ອັນຍິ່ງໃຫ່ຍ ທີ່ສະແດງໃຫ້ເຫັນ ໃນການປະຕິບັດ ໄດ້ຕາມແຜນທີ່ວາງໄວ້ 300 ສ່ວນຮ້ອຍ ໂດຍສະເພາະ ຮັບປະກັນ ຜູ້ມີສິດເລືອກຕັ້ງ ສະໝັກໃຈ ຕື່ນຕົວ ດ້ວຍຕົນເອງໄປໃຊ້ສິດ ຄົບຖ້ວນໃນວັນເລືອກຕັ້ງ 100 ສ່ວນຮ້ອຍ, ຮັບປະກັນ ບັດລົງຄະແນນສຽງ ຖືກຕ້ອງຕາມກົດໝາຍ ຫຼື ບໍ່ມີບັດຕາຍ 100 ສ່ວນຮ້ອຍ ແລະ ຮັບປະກັນ ຄວາມເປັນລະບຽບ ຮຽບຮ້ອຍ ແລະ ຄວາມສະຫົງບ ປອດໄພ ຢ່າງໜັກແໜ້ນ 100 ສ່ວນຮ້ອຍ.
ຕໍ່ຜົນງານ ແລະ ຜົນສໍາເລັດດັ່ງກ່າວ ມີ 4 ສະຫາຍໄດ້ຮັບຫຼຽນໄຊແຮງງານຊັ້ນ II, ມີ 113 ສະຫາຍ ໄດ້ຮັບຫຼຽນໄຊແຮງງານຊັ້ນ III, ມີ 333 ສະຫາຍ ໄດ້ຮັບຫຼຽນກາແຮງງານ ແລະ ອີກ 6 ກົມກອງ 5 ບ້ານ ໄດ້ຮັບໃບຍ້ອງຍໍລະດັບຊາດ, ສ່ວນ 236   ສະຫາຍ ໄດ້ຮັບໃບຍ້ອງຍໍລະດັບແຂວງ ແລະ 318 ສະຫາຍໄດ້ຮັບໃບຊົມເຊີຍ.
     ພິທີ ມອບ-ຮັບ ຜົນງານດັ່ງກ່າວ ຈັດຂຶ້ນ ໃນກາງເດືອນ ຕຸລານີ້ ຢູ່ທີ່ສະໂມສອນ ຂອງເມືອງ ໂດຍແມ່ນ ທ່ານ ນີສອນ ວືອິນຢາວ ກຳມະການພັກແຂວງ ຮອງປະທານ ສະພາປະຊາຊົນແຂວງ ແລະ ທ່ານ ຄຳສອນ ກອນເຍີ ກຳມະການພັກແຂວງ ເລຂາພັກເມືອງ ເຈົ້າເມືອງໆ ທ່າແຕງ ຜັດປ່ຽນກັນ ຂຶ້ນກ່າວມອບ ຢ່າງສົມກຽດ.
                                                                                            ຂ່າວ: ສະຫຍາມ ຈັນທະສອນ. Tel: 020 99282294.